រាជធានីភ្នំពេញ ៖ ទីបំផុតការប្រកួតប្រដាល់ដណ្ដើមខ្សែក្រវាត់ជើងឯក«កម្ពុជា សង្វៀនគុនខ្មែរ»ក្នុងប្រភេទទម្ងន់៦៣,៥គីឡូក្រាមដែលមានប្រាក់រង្វាន់រហូតដល់ទៅ៦ពាន់ដុល្លារឈានចូលដល់វគ្គផ្ដាច់ព្រ័ត្រហើយនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១ កុម្ភៈ ស្អែកនេះ ។ កីឡាករកម្ពុជា ធន់…
រាជធានីភ្នំពេញ ៖ ទីបំផុតការប្រកួតប្រដាល់ដណ្ដើមខ្សែក្រវាត់ជើងឯក«កម្ពុជា សង្វៀនគុនខ្មែរ»ក្នុងប្រភេទទម្ងន់៦៣,៥គីឡូក្រាមដែលមានប្រាក់រង្វាន់រហូតដល់ទៅ៦ពាន់ដុល្លារឈានចូលដល់វគ្គផ្ដាច់ព្រ័ត្រហើយនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១ កុម្ភៈ ស្អែកនេះ ។ កីឡាករកម្ពុជា ធន់ ចាន់តាក់មកពីសមាគមកីឡាប្រដាល់ក្រសួងការពារជាតិដែលជាបេក្ខភាពត្រូវប្រកួតជាមួយកីឡាករ ថៃ រិទ្ធអៃយ៉ារ៉ា ត.សិលាឆ័យ នៅពេលនោះ បានដាក់គោលដៅយកឈ្នះគូប្រកួតដើម្បីសម្រេចក្ដីស្រមៃរបស់ខ្លួនក៏ដូចជាបំពេញចិត្ត អ្នកគាំទ្រ។
ការប្រកួតដណ្ដើមខ្សែក្រវាត់«កម្ពុជា សង្វៀន គុនខ្មែរ»វគ្គ២ដែលនឹងឈានចូលដល់វគ្គផ្ដាច់ព្រ័ត្រនៅថ្ងៃស្អែកមានការរំពឹងថានឹងល្អមើលដោយសារសមាសភាពកីឡាករដែលត្រូវជួបគ្នា ពេលនោះសុទ្ធសឹងតែជាជើងខ្លាំងដូចគ្នានៅក្នុងពិភពប្រដាល់ ។ ជាក់ស្ដែងកីឡាករ ធន់ ចាន់តាក់ ជាប់លេខ១ជុំទី១ ត្រូវប្រកួតជាមួយកីឡាករថៃដែលជាប់លេខ១ក្នុងជុំទី២ ។
តាមការសង្កេតការប្រកួតកន្លងមករវាងគូនេះគឺមានថ្វីដៃប្រហាក់ប្រហែលគ្នា រីឯមាឌនិងកម្ពស់ក៏មិនលើសគ្នានោះដែរ ។ ធន់ ចាន់តាក់ជាអ្នកប្រដាល់មួយរូបដែលមានចិត្តសឿងខ្លាំងណាស់ផ្លែកែងនិងជង្គង់របស់គេក៏ល្អថែមទៀត បើធៀបជាមួយកីឡាករក្នុងស្រុកគឺពិតជាខ្លាំងមិនធម្មតា ។
ចំណែកកីឡាករថៃវិញមិនត្រឹមតែមានកម្លាំងខ្លាំង និងរឹងមាំនោះទេ សូម្បីតែស្នៀតកែងនិងជង្គង់របស់គេក៏ល្អមិនចាញ់ ធន់ ចាន់តាក់ប៉ុន្មាននោះដែរ ។ សម្រាប់ការប្រកួតលើកនេះភាគីទាំងសងខាងមិនអាចមើលស្រាលលើភាគីណាមួយបានឡើយដោយសារម្នាក់ៗសុទ្ធតែបានត្រៀមខ្លួនរួចជាស្រេចដើម្បីដណ្ដើមយកប្រាក់រង្វាន់ដែលមានរហូតដល់ទៅ៦ពាន់ដុល្លារ។
ចំណែកគូប្រកួតមិត្តភាពវិញ កីឡាករជើងខ្លាំងឡៅ ចន្ទ្រា មកពីក្លិបទ័ពពិសេសឆត្រយោង៩១១ប្រកួតជាមួយកីឡាករថៃ ម៉ាំងកនដាំ ស.ដានឆ័យ ក្នុងប្រភេទទម្ងន់៦៧គីឡូក្រាម។ កីឡាករ ពុទ្ធ សំបូរ មកពីក្លិបពុទ្ធសេរីវង្សពោធិសែនជ័យ ប្រកួតជាមួយកីឡាករថៃ តាក់ខាផេ វ៉.រីវើមួយថៃ ក្នុងប្រភេទទម្ងន់៦០គីឡូក្រាម។ និងគូប្រកួតបើកឆាក កីឡាករ តាំង តាក់ មកពីក្លិបរស្មីភូមិគាបខេត្តបន្ទាយមានជ័យ ត្រូវប្រកួតជាមួយកីឡាករ សារឿន ទិត្យ មកពីក្លិបតាព្រហ្មមានជ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ