ខេត្តព្រៃវែង ៖ ដីដុះគឺជារមណីយដ្ឋានធម្មជាតិ១ ស្ថិតនៅតាមដងទន្លេមេគង្គ ត្រង់ចំណុចភូមិសាមគ្គី ឃុំស្វាយភ្លោះ ស្រុកពាមជរ ។ កន្លែងនេះ គឺជាទីពេញនិយមរបស់ប្រជាពលរដ្ឋជិតឆ្ងាយ…
ខេត្តព្រៃវែង ៖ ដីដុះគឺជារមណីយដ្ឋានធម្មជាតិ១ ស្ថិតនៅតាមដងទន្លេមេគង្គ ត្រង់ចំណុចភូមិសាមគ្គី ឃុំស្វាយភ្លោះ ស្រុកពាមជរ ។ កន្លែងនេះ គឺជាទីពេញនិយមរបស់ប្រជាពលរដ្ឋជិតឆ្ងាយ នាំគ្នាទៅហែលទឹកលេងកម្សាន្ត ជាពិសេសនៅក្នុងរដូវបុណ្យទានផ្សេងៗ ។ ប៉ុន្តែជាមួយនេះ ក៏ជាអន្លង់មច្ចុរាជ១ដែលតែងតែឆក់យកជីវិតអ្នកទៅលេងទឹកនៅទីនុះជារៀងរាល់ឆ្នាំផងដែរ ។
ជាក់ស្តែង កាលពីវេលាម៉ោងប្រមាណ៣រសៀលថ្ងៃទី២៧ ខែមករា ក្មេងប្រុសម្នាក់ឈ្មោះ ផេងរដ្ឋា អាយុ១៤ឆ្នាំ មានទីលំនៅក្នុងភូមិ៥ ឃុំព្រែកខ្សាយ«ខ» ស្រុកពាមរក៍ បានលង់ទឹកស្លាប់នៅរមណីយដ្ឋានដីដុះនេះ ខណៈរូបគេជិះពោះវៀនកង់ឡានលេងទឹកចូលទៅដល់ទឹកជ្រៅហើយរបូតដៃពីពោះវៀនកង់ឡាន ក៏បណ្តាលឲ្យលង់ទឹករហូតស្លាប់បាត់បង់ជីវិតតែម្តង ។
សមត្ថកិច្ចឲ្យដឹងថា នៅថ្ងៃកើតហេតុនោះក្មេងប្រុសរងគ្រោះព្រមទាំងមិត្តភក្តិជាច្រើននាក់ទៀតបាននាំគ្នាទៅលេងទឹកនៅរមណីយដ្ឋានខាងលើនិងបានជួលពោះវៀនកង់ឡានគេ ជិះតោងលេងទឹកទាំងអស់គ្នា ។ លុះពេលលេងដេញគ្នាយូរៗទៅ ក៏អណ្តែតទៅដល់កន្លែងទឹកជ្រៅ ឯជនរងគ្រោះដោយប្រឹងស្ទុះគេចពីការដេញចាប់របស់មិត្តភក្តិក៏របូតដៃពីពោះវៀនកង់ឡានទើបបណ្តាលឲ្យលង់ទឹកតែម្តងទៅ។
សមត្ថកិច្ចមូលដ្ឋាននិយាយថា រមណីយដ្ឋានដីដុះនេះ គេបានបោះបង្គោលចងខ្សែកំណត់ព្រំទីតាំងទឹកជ្រៅ ជាសញ្ញាហាមឃាត់ភ្ញៀវទេសចរមិនឲ្យលេងទឹកនៅកន្លែងទាំងនោះដែរប៉ុន្តែមកពីភ្ញៀវទេសចរខ្លួនឯង ដែលប្រមាទនិងលេងភ្លេចខ្លួនរហូតចូលទៅដល់កន្លែងហាមឃាត់ទើបមានគ្រោះថ្នាកបែបនេះ ។
ទោះបីជាយ៉ាងណា ប្រមាណ១ម៉ោងក្រោយកើតហេតុសពជនរងគ្រោះត្រូវបានគេរាវរឃើញ និងប្រគល់ជូនក្រុមគ្រួសារយកទៅធ្វេីបុណ្យតាមប្រណៃណី ៕
ចែករំលែកព័តមាននេះ