ខេត្តកោះកុង ៖ មន្ត្រី និងសមត្ថកិច្ចនៅច្រកទ្វារព្រំដែនអន្តរជាតិចាំយាម ខេត្តកោះកុង ឲ្យដឹងថា នៅថ្ងៃ៩ កក្កដា ២០២៥ ទោះជាស្ថានភាពធាតុអាកាសមានភ្លៀងច្រើន…
ខេត្តកោះកុង ៖ មន្ត្រី និងសមត្ថកិច្ចនៅច្រកទ្វារព្រំដែនអន្តរជាតិចាំយាម ខេត្តកោះកុង ឲ្យដឹងថា នៅថ្ងៃ៩ កក្កដា ២០២៥ ទោះជាស្ថានភាពធាតុអាកាសមានភ្លៀងច្រើន ប៉ុន្តែសមត្ថកិច្ច និងអាជ្ញាធរពាក់ពន្ធ័ បន្តសកម្មភាពជួយសម្រួលដល់ដំណើររបស់បងប្អូនប្រជាពលរដ្ឋជាពលករខ្មែរ ដែលវិលត្រឡប់ចូលមកស្រុកកំណើតវិញ ក្នុងពេលដែលប្រទេសថៃ បានបិទច្រកទ្វារព្រំដែនកម្ពុជា-ថៃ ជាស្ថាពរ និងជាឯកតោភាគី ។
បើតាមសមត្ថកិច្ចនៅច្រកទ្វារព្រំដែនអន្តរជាតិចាំយាម ខេត្តកោះកុង ឲ្យក្រុមការងារពត៌មានដឹងថា ជារៀងរាល់ថ្ងៃ មានបងប្អូនប្រជាពលរដ្ឋជាពលករខ្មែរ បានចាកចេញពីប្រទេសថៃ វិលត្រឡប់ចូលមកប្រទេសកម្ពុជា ត្រឡប់ទៅស្រុកកំណើតវិញ ជាបន្តបន្ទាប់ ក្រោមការជួយសម្រួលគ្រប់និតិវិធី និងកិច្ចអន្តរាគមន៍ផ្សេងៗ ដែលពលរដ្ឋត្រូវការ ។
សមត្ថកិច្ចឲ្យដឹងបន្ថែមថា ចំពោះស្ថានភាពទូទៅនៅច្រកទ្វារព្រំដែនអន្តរជាតិចាំយាមខេត្តកោះកុង ជាប់នឹងខេត្តត្រាតប្រទេសថៃ ក្នុងសប្តាហ៍នេះ មានសភាពស្ងប់ស្ងាត់ ប៉ុន្តែនៅមានការចេញ ចូលខ្លះ ដូចជា ការធ្វើដំណើរចេញ ចូលទៅសិក្សារបស់សិស្សានុសិស្សទាំងសងខាង ចំណែកអ្នកជំងឺ ដែលស្ថិតក្នុងសភាពសង្គ្រោះបន្ទាន់ ក៏អាចចេញចូលទៅកាន់មន្ទីរពេទ្យបានដែរ ។
ជាមួយគ្នានេះ អាជ្ញាធររដ្ឋបាលខេត្តកោះកុង បានសហការជាមួយសមត្ថកិច្ចនៅច្រកទ្វារ រង់ចាំទទួលពលករខ្មែរ រៀបចំសម្រួលការធ្វើដំណើរទៅស្រុកកំណើត និងចាំទទួលពលករដែលមានបំណងចង់បម្រើការងារនៅរោងចក្រនៅតំបន់សេដ្ឋកិច្ចពិសេស ក្នុងក្រុងខេមរភូមិន្ទ និងរោងចក្រជេជាំង នៅក្នុងស្រុកស្រែអំបិលខេត្តកោះកុងជាដើម ៕
ចែករំលែកព័តមាននេះ