រាជធានីភ្នំពេញ ៖ លោក គួច ចំរើន គណៈអភិបាលខេត្តព្រះសីហនុបានដាក់កំហិតដល់ប្រជាពលរដ្ឋដែលកំពុងរស់នៅលើចំណីផ្លូវអូរ និងចំណីផ្លូវសាធារណៈរបស់រដ្ឋឲ្យរុះរើចេញ ។ យោងតាមការចេញផ្សាយរបស់រដ្ឋបាលខេត្តព្រះសីហនុចេញផ្សាយនៅថ្ងៃទី២៨ ខែមករានេះ បានបញ្ជាក់យ៉ាងដូច្នេះថា ៖«សូមជម្រាបមក បងប្អូនប្រជាពលរដ្ឋជ្រាបថាៈ លំនៅឋានរបស់បងប្អូនដែលកំពុងរស់នៅ គឺស្ថិតនៅលើចំណីអូរ និងចំណីផ្លូវសាធារណៈរបស់រដ្ឋដែលធ្វើឱ្យប៉ះពាល់ដល់ប្រព័ន្ធរំដោះទឹក និងគម្រោងស្ថាបនាផ្លូវក្នុងក្រុងព្រះសីហនុ» ។
ប្រភពបានបញ្ជាក់បន្តថា ៖«ដើម្បីបញ្ចៀសបាននូវការលិចលង់លំនៅឋានរបស់បងប្អូន ប្រជាពលរដ្ឋ ក្នុងក្រុងព្រះសីហនុ ដែលតែងតែទទួលរងដោយជំនន់ទឹកភ្លៀងរដ្ឋបាលខេត្តព្រះសីហនុ សូមណែនាំបងប្អូនធ្វើការរុះរើសំណង់ដែលបានសាងសង់នៅលើចំណីអូរ និងលើចំណីផ្លូវសាធារណៈរបស់រដ្ឋទល់មុខបុរី អេម៉ារីអូណាន់ម៉ារី ស្ថិតនៅតាមបណ្ដោយផ្លូវ២ធ្នូ ភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ចាប់ពីថ្ងៃជូនដំណឹងនេះរហូតដល់ថ្ងៃទី២៩ ខែមករា ឆ្នាំ២០២០ ជាកំហិត» ។
ប្រភពបានបន្ថែមទៀតថា ក្នុងករណីបងប្អូនមិនរុះរើចេញតាមការណែនាំខាងលើរដ្ឋបាលខេត្តនឹងចុះអនុវត្តវិធានការរដ្ឋបាលដោយមិនទទួលខុសត្រូវរាល់ការខូចខាតសម្ភារ ឬការបាត់បង់ទ្រព្យសម្បត្តិរបស់បងប្អូនឡើយ ។
សូមជម្រាបថា ការពេលថ្មីៗកន្លងមកនេះ រដ្ឋបាលខេត្តព្រះសីហនុក៏បានប្រើវិធានការកៅ្តចំពោះសំណង់ដែលធ្វើលើផ្លូវសាធារណៈរបស់រដ្ឋក៏ដូចជា នៅតាមតំបន់ឆ្នេរមួយចំនួនដោយបានវាយកម្ទេចចោល ៕ កែសម្រួលដោយ ៖ សុឃាក់
ចែករំលែកព័តមាននេះ