រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍ដ៏អាក្រក់មួយបានកើតឡើង បណ្ដាលឲ្យបុរសម្នាក់បាត់បង់ជីវិតភ្លាមៗនៅនឹងកន្លែងកើតហេតុ ចំណែកឯអ្នករស់នៅក្នុងភូមិជាមួយគ្នាចំនួន៥នាក់ទៀតរងរបួសធ្ងន់និងស្រាល និងត្រូវបានបញ្ជូនទៅសង្គ្រោះបន្ទាន់ភ្លាមៗដែរ ។ ខណៈដែលជនរងគ្រោះខាងលើកំពុងតែឈប់ស្ងៀមនៅលើចិញ្ចើមផ្លូវអង្គុយនៅលើម៉ូតូ២គ្រឿង រង់ចាំមិត្តភក្ដិមួយចំនួនទៀតដែលជិះម៉ូតូមកតាមក្រោយមិនទាន់ដល់ ។ ស្រាប់តែមានរថយន្តម៉ាកកាមរីហាយប្រ៊ីដ១គ្រឿងបើកបរក្នុងល្បឿនលឿនទៅដល់រេចង្កូតទៅបុករះពេញទំហឹងតែម្ដង ។
ឧប្បត្តិហេតុគ្រោះថ្នាក់ចរាចរនេះ បានកើតឡើង កាលពីវេលាម៉ោង៤និង៣០នាទីជិតភ្លឺថ្ងៃទី២៧ ខែមករា ឆ្នាំ២០២០ នៅលើកំណាត់ផ្លូវជាតិលេខ៤ ត្រង់ចំណុចភ្លើងស្តុប កែងមហាវិថីឈ្នះ ឈ្នះ ហៅផ្លូវអូដឹមកប់ស្រូវ ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ជនរងគ្រោះដែលស្លាប់បាត់បង់ជីវិតភ្លាមៗនោះឈ្មោះ សុន ស៊ីថាន ភេទប្រុស អាយុ៣១ឆ្នាំ រស់នៅក្នុងឃុំត្រពាំងគ្រញូង ស្រុកត្រាំកក់ ខេត្តតាកែវ ។
ចំណែកអ្នករងរបួសធ្ងន់និងស្រាលចំនួន៥នាក់ទៀត មិនត្រូវបានស្គាល់អត្តសញ្ញាណទេ គឺជាអ្នកស្រុកភូមិជាមួយអ្នកបាត់បង់ជីវិតដែរ ហើយជនរងគ្រោះទាំង៦នាក់នេះជិះម៉ូតូ២គ្រឿងម៉ាក YAMAHA EXCITER អត់ស្លាកលេខ ។ ដោយឡែករថយន្តបង្កបានបើករត់គេចបាត់ស្រមោល ប៉ុន្តែបានដាច់ជ្រុះកាងមុខដែលមានជាប់ស្លាកលេខដែរ ហើយត្រូវបាននគរបាលកំណត់ច្បាស់ថាជារថយន្តម៉ាកកាមរីហាយប្រ៊ីដ ពណ៌ស ពាក់ស្លាកលេខភ្នំពេញ 2T-1001 ។
អ្នកឃើញហេតុការណ៍បានឲ្យដឹងថា នៅមុនកើតហេតុ ជនរងគ្រោះទាំង៦នាក់ខាងលើនោះបានជិះម៉ូតូ២គ្រឿងម៉ាក YAMAHA EXCITER ឌុបគ្នាធ្វើដំណើរក្នុងទិសដៅពីកើតទៅលិច ត្រឡប់មកពីចូលរួមមង្គលការសាច់ញាតិនៅឯខេត្តកំពង់ចាម ឆ្ពោះទៅផ្ទះនៅឯខេត្តតាកែវ ។ លុះពេលទៅដល់ត្រង់ចំណុចកើតហេតុ ដោយសារតែមានមិត្តភក្ដិមួយចំនួនទៀតជិះម៉ូតូផ្សេងមកមិនទាន់ ក៏នាំគ្នាឈប់រង់ចាំដោយបានឈប់អែបនៅលើចិញ្ចើមផ្លូវ ផុតពីផ្លូវកៅស៊ូទៅហើយចាំគ្នីគ្នាមកជុំ ។
ប្រភពដដែលបានបន្តទៀតថា លុះបន្តិចក្រោយមកស្រាប់តែរថយន្តបង្កម៉ាកកាមរីហាប្រ៊ីដខាងលើបើកបរក្នុងល្បឿនលឿនក្នុងទិសដៅពីកើតទៅលិចស្របគ្នា ហើយពេលនោះពុំដឹងថាអ្នកបើកបរស្រវឹងធ្លាក់ភ្នែកឬបែបណាទេ បានរេចង្កូតជ្រុលទៅបុករះលើចិញ្ចើមផ្លូវពេញទំហឹង បណ្ដាលឲ្យខ្ទាតផ្លោងដួលរេលពេញផ្លូវស្លាប់ ម្នាក់រងរបួសធ្ងន់និងស្រាល៥នាក់តែម្ដងយ៉ាងរដូករណែល អត់មានអ្នកណាជួយអ្នកណាបានឡើយ ព្រោះរងគ្រោះទាំងអស់គ្នា ។
រីឯម៉ូតូទាំង២គ្រឿងស្ទើរតែធ្លាក់ចូលទៅក្នុងប្រឡាយទឹកស្អុយទៅហើយ ។ ចំណែករថយន្តបង្កនោះបានបើកគេចខ្លួនបាត់ស្រមោល ប៉ុន្តែក៏បានដាច់កាងមុខធ្លាក់ទាំងស្លាកលេខនៅកន្លែងកើតហេតុនោះដែរ ហើយត្រូវបាននគរបាលរើសទុកដើម្បីឆែករកអត្តសញ្ញាណអ្នកបើកបរនាំមកផ្ដន្ទាទោសតាមច្បាប់ ។
ក្រោយពេលកើតហេតុអ្នករបួសត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។ ចំណែកអ្នកស្លាប់ត្រូវបានប្រគល់ជូនក្រុមគ្រួសារនាំយកទៅធ្វើបុណ្យតាមប្រពៃណី ។ចាំមើលបន្តទៀត តើនគរបាលរកម្ចាស់ឡាននេះឃើញដែរអត់ ?
ចែករំលែកព័តមាននេះ