ខេត្តព្រៃវែង ៖ រមណីយដ្ឋាននគរភ្នំ ឬរមណីយដ្ឋានភ្នំឈើកាច់ គឺជារមណីយដ្ឋានទេសចរណ៍ធម្មជាតិមួយ ដែលកំពុងទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរ ដែលនិយមចូលចិត្តមកលេងកម្សាន្ត នៅថ្ងៃឈប់សម្រាកពីការងារ ពិសេសគឺនៅក្នុងរដូវបុណ្យទានផ្សេងៗ…
ខេត្តព្រៃវែង ៖ រមណីយដ្ឋាននគរភ្នំ ឬរមណីយដ្ឋានភ្នំឈើកាច់ គឺជារមណីយដ្ឋានទេសចរណ៍ធម្មជាតិមួយ ដែលកំពុងទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរ ដែលនិយមចូលចិត្តមកលេងកម្សាន្ត នៅថ្ងៃឈប់សម្រាកពីការងារ ពិសេសគឺនៅក្នុងរដូវបុណ្យទានផ្សេងៗ ។
រមណីយដ្ឋាននេះ មានទីតាំងស្ថិតនៅលើដងភ្នំឈើកាច់ ក្នុងឃុំជើងភ្នំ ស្រុកបាភ្នំ ខេត្តព្រៃវែង មានចម្ងាយប្រមាណជាង២០គីឡូពីទីរួមខេត្តព្រៃវែង និង៧០គីឡូពីរាជធានីភ្នំពេញ ដោយធ្វើដំណើរតាមកំណាត់ផ្លូវជាតិលេខ១ និងបត់ចូលត្រង់ចំណុចផ្លូវកែងផ្សារកំពង់សឹង្ហ ក្នុងឃុំកំពង់សឹង្ហ ស្រុកព្រះស្តេច ។
ផ្លូវបេតុងចំនួន២ខ្សែ ត្រូវបានសាងសង់ឡើងសម្រាប់ឱ្យអ្នកស្រុក ក៏ដូចជាភ្ញៀវទេសចរ អាចធ្វើដំណើរបានយ៉ាងស្រួលចូលទៅលេងកម្សាន្តនៅក្នុងរមណីយដ្ឋាននគរភ្នំនេះ ដោយខ្សែទី១ គឺចូលតាមខ្លោងទ្វាររមណីយដ្ឋាន ដែលស្ថិតនៅខាងជើងសាលាស្រុកបាភ្នំ និង១ខ្សែទៀត គឺចូលតាមខ្លោងទ្វារវត្តវិហារធំ ដែលនៅខាងលិចភ្នំ ។
ពេលភ្ញៀវទេសចរធ្វើដំណើរចូលដល់ជើងភ្នំឈើកាច់ គេនិងឃើញមានកាំជណ្តើរចំនួន២ខ្សែធ្វើឡើងពីថ្ម អមទៅដោយបង្កាន់ដៃដែលឆ្លាក់ចេញជារូបនាគនៅសងខាង សម្រាប់ឱ្យភ្ញៀវទេសចរដើរឡើងទៅលេងនៅចង្កេះភ្នំនិងកំពូលភ្នំ ដែលនៅទីនោះមានសំណង់ប្រាសាទចំនួន១៤ប្រាសាទ នៅឈរបង្អួតរាងយ៉ាងស្រស់សង្ហា ជាមួយនឹងព្រៃព្រឹក្សាដ៏ស្រស់បំព្រង ។
ប្រាសាទនីមួយៗ ត្រូវបានសាងសង់ឡើងតាមបែបសាសនា ដោយបង្កប់នូវក្បាច់ចម្លាក់យ៉ាងប្រណីតគួរឱ្យចង់គយគន់ ។ ក្រៅពីនេះ នៅមានផ្ទាំងថ្មធំៗដែលមានរូបសណ្ឋានប្លែកៗគួរឱ្យចាប់អារម្មណ៍ជាច្រើន ដែលភ្ញៀវទេសចរអាចនាំគ្នាទៅអង្គុយលេងស្រូបយកខ្យល់អាកាសធម្មជាតិបរិសុទ្ធ និងថតរូបកម្សាន្តទុកជាអនុស្សាវរីយ៍ផងដែរ ។ កាន់តែពិសេសទៅទៀតនោះ នៅលើភ្នំនេះមានរូងល្អាងដ៏អាថ៌កំបាំងចំនួន២ គឺល្អាងគុហ៌ា ជាកន្លែងទីសក្ការៈគោរពបូជា និងល្អាងភ្នំធំជាកន្លែងដែលតាបស់ ឬអ្នកកាន់សីលចូលទៅតាំងសមាធិ ហើយល្អាងនេះត្រូវបានអ្នកស្រុកនិយាយថា មានទំហំធំនិងជ្រៅចូលទៅក្នុងដីមិនដឹងទៅដល់ណា ព្រោះមិនដែលមានអ្នកណាហ៊ានចូលទៅទេ ។
ជួបជាមួយលោកស្រី អេឡែន ដែលជាម្ចាស់ប្រាសាទទាំងអស់លើភ្នំឈើកាច់ និងជាអ្នកបង្កើតរមណីយដ្ឋាននគរភ្នំនេះឡើងផងនោះបានឱ្យដឹងថា រមណីយដ្ឋាននគរភ្នំបានត្រៀមខ្លួនរួចជាស្រេចសម្រាប់ទទួលភ្ញៀវទេសចរមកចូលលេងកម្សាន្ត នៅក្នុងឱកាសបុណ្យចូលឆ្នាំចិន និងចូលឆ្នាំខ្មែរខាងមុខនេះ ដោយលោកស្រីបានកសាងបន្ថែមនូវរូបសំណាកជាច្រើន ដូចជារូបសំណាកលោកមេទ័ពកំហែងរិទ្ធិ រូបស្តេចនាគលូនចេញពីរូង រូបព្រះនាងលីវយី ព្រះបាទហ៊ុនទៀន ស្តេចនាគជាបិតាព្រះនាងលីវយី និងស្រះផ្កាឈូកសរផងដែរ ។
ជាមួយគ្នានោះ លោកស្រីបានត្រៀមរៀបចំកម្មវិធីសាសនាជាច្រើន សម្រាប់ឱ្យភ្ញៀវទេសចរដែលមកលេងកម្សាន្ត មានឱកាសបានចូលរួមធ្វើបុណ្យសន្សំកុសល តាមបែបព្រះពុទ្ធសាសនាផងដែរ ហើយលោកស្រីសង្ឃឹមថា នៅក្នុងឱកាសបុណ្យចូលឆ្នាំចិន និងចូលឆ្នាំខ្មែរខាងមុខនេះ និងមានភ្ញៀវទេសចរជាតិ អន្តរជាតិចូលមកលេងកម្សាន្ត នៅក្នុងរមណីយដ្ឋាននគរភ្នំ ឬរមណីយដ្ឋានភ្នំឈើកាច់នេះ យ៉ាងច្រើនកុះករជាក់ជាមិនខាន ។
ដោយឡែកខាងអាជ្ញាធរស្រុកបាភ្នំវិញបានឱ្យដឹងថា រមណីយដ្ឋាននគរភ្នំនេះ មានភ្ញៀវទេសចរមកលេងកម្សាន្តជារៀងរាល់ថ្ងៃ មិនថាតែថ្ងៃបុណ្យទាននោះទេ ដោយសាររមណីយដ្ឋាននេះកន្លែងលេងកម្សាន្តច្រើន គួបផ្សំនិងបងប្អូនប្រជាពលរដ្ឋដែលនាំគ្នាលក់ចំណីអាហារផ្សេងៗនៅតាមជើងភ្នំនេះ មានភាពរួសរាយរាក់ទាក់ និងលក់ចំណីអាហារក្នុងតម្លៃសមរម្យផងនោះ ព្រមទាំងទីតាំងនេះមានសន្តិសុខសុវត្តិភាពល្អថែមទៀតនោះ ទើបជាកត្តាអូសទាញភ្ញៀវទេសចរ មកលេងហើយចង់មកលេងទៀតមិនចេះដាច់រហូតដល់សព្វថ្ងៃនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ