រាជធានីភ្នំពេញ ៖ អ្នកជំនាញខាងវិស័យអចលទ្រព្យនៅកម្ពុជាបានលើកឡើងថាទីផ្សារខុនដូនៅកម្ពុជាមានសុខភាពល្អប្រសើរ ជាពិសេសប្រភេទខុនដូទំនើប ឬលំដាប់ខ្ពស់ដែលមានតម្លៃថ្លៃៗគឺទាញស្រួបបានជនជាតិបរទេសជាវច្រើន ខណៈប្រជាជនកម្ពុជាមួយចំនួនក៏កំពុងចាប់អារម្មណ៍ខុនដូផងដែរ ជាក់ស្តែងសម្រាប់ប្រភេទខុនដូទំនើបៗអាចទាញស្រូបអតិថិជនជាជនជាតិខ្មែរពីប្រមាណ ២០ ទៅ ៣០ ភាគរយ ។
លោកស្រី អាន សុធីតា នាយិកាប្រចាំប្រទេសកម្ពុជា នៃក្រុមហ៊ុន អចលនទ្រព្យ CBRE បានអោយដឹងថា ក្នុងទីផ្សារខុនដូទាំងមូល បើនិយាយពីលំដាប់ខ្ពស់ ឬខុនដូទំនើប គឺមានបរទេសទិញច្រើន តែក៏មានជនជាតិខ្មែរប្រមាណ២០ទៅ៣០ភាគរយប៉ុណ្ណោះ ចំណែកខុនដូ ដែលមានតម្លៃសមរម្យ ឬកម្រិតមធ្យមលើសពី៥០ភាគរយជាជនជាតិខ្មែរជាអ្នកទិញ ។ លោកស្រីបានបន្តថា តម្រូវការខុនដូ ក្នុងប្រទេសកម្ពុជានៅតែមានកំណើនបើទោះបីជាការអភិវឌ្ឍកន្លងមកមានច្រើនក្ដីជាពិសេសខុនដូ លំដាប់មធ្យម និងកម្រិតកណ្ដាល ។
អ្នកជំនាញខាងអចលទ្រព្យបានបន្តថា « ពលរដ្ឋខ្មែរចាប់ផ្ដើមចាប់អារម្មណ៍លើការទិញខុនដូ ដើម្បីស្នាក់នៅ ជាពិសេសខុនដូដែលនៅក្បែរការិយាល័យធ្វើការ ដោយពួកគេមិនចង់ចំណាយពេលវេលា ដើម្បីធ្វើដំណើរមកការិយាល័យហើយ ត្រលប់ទៅសម្រាកនៅផ្ទះឯជាយក្រុងវិញ » ។ ព្រមជាមួយសន្ទុះនៃការគាំទ្រពីអតិថិជនក្នុងស្រុក គេក៏កត់សម្គាល់ឃើញថាគម្រោងខុនដូដែលពីមុនច្រើនសាងសង់នៅចំកណ្តាលរាជធានីភ្នំពេញ ដូចជាក្នុងប្លុកបឹងកេងកងនៃទឹកដីខណ្ឌចំការមន និងខណ្ឌដូនពេញ រីកដុះដាល់ខ្លាំងជាបណ្តាខណ្ឌផ្សេងទៀតនោះ តែរយៈពេលប៉ុន្មានខែចុងក្រោយនេះតំបន់ផ្លូវ៦០ម៉ែត្រដែលពីមុនជាតំបន់មួយហាក់នៅឆ្ងាយពីរាជធានីភ្នំពេញ និងជាតំបន់ដែលមិនទាន់មានការរីកចម្រើននោះទេ តែក្រោយពេលរាជរដ្ឋាភិបាលអភិវឌ្ឍន៍និងកសាងហេដ្ឋារចនាសម្ព័ន្ធផ្លូវនិងភ្លើងខ្វែងខ្វាត់ បានជំរុញអោយតំបន់នេះ ក្លាយជាចំណាប់អារម្មណ៍ពីសំណាក់វិនិយោគិនក្នុងនិងក្រៅប្រទេស និងបានអភិវឌ្ឍន៍នេះកាន់តែខ្លាំង ធ្វើអោយតំបន់ផ្លូវ៦០ម៉ែត្រក្លាយបណ្ដុំអគារខុនដូ និងអគារពាណិជ្ជកម្មស្កឹមស្កៃនៅភាគខាងត្បូងរាជធានី ។
រហូតមកដល់ពេលនេះ ធ្វើអោយអ្នកវិនិយោគបរទេសជាច្រើនបានសម្លឹងមើលការវិនិយោគ ខុនដូ នៅតំបន់នេះកាន់តែខ្លាំង ជាក់ស្ដែងនៅតំបន់ផ្លុវ៦០ម៉ែត្រ គេឃើញមានគម្រោងខុនដូធំៗមួយចំនួនកំពុងបង្ហាញខ្លួននិងកំពុងមានការអភិវឌ្ឍជាបន្តបន្ទាប់ផងដែរ ។
បើតាមលោក Ben Li ម្ចាស់គម្រោងអគារខុនដូ និងអគារពាណិជ្ជកម្ម Urban Village នៅតំបន់៦០ម៉ែត្រ បាននិយាយថា តម្រូវការខុនដូពីសំណាក់ប្រជាជនកម្ពុជា និងជនបរទេសនៅក្នុងប្រទេសកម្ពុជា ក្នុងរយៈពេលប៉ុន្មានឆ្នាំចុងក្រោយនេះមានកំណើនខ្ពស់ ដែលជំរុញអោយមានការផ្គត់ផ្គង់កាន់តែច្រើននៅក្នុងប្រទេសកម្ពុជា ។លោកបានបន្តថា «យោងតាមរបាយណ៍របស់ក្រុមហ៊ុនវាយតម្លៃ អចលនទ្រព្យអន្តរជាតិដែលមានសាខាក្នុងប្រទេសកម្ពុជាផងដែរនោះ បញ្ជាក់ថាតម្រូវការខុនដូនៅក្នុងប្រទេសកម្ពុជា មានកំណើនខ្ពស់ ដែលធ្វើអោយមានការផ្គត់ផ្គង់ កាន់តែច្រើនផងដែរ ដើម្បីបំពេញតម្រូវការនៅក្នុងប្រទេសកម្ពុជា » ។
លោកបន្តថា ទីតាំងល្អសម្រាប់ការបោះទីតាំងសាងសង់អគារខុនដូ ក្នុងរាជធានីភ្នំពេញ ក្រៅពីតំបន់កណ្ដាលក្រុងគេឃើញថានៅតាមបណ្ដោយផ្លូវ៦០ម៉ែត្រ គឺជាទីតាំងមួយដែលមានភាពទាក់ទាញនិងសក្ដានុពលក្នុងការសាងសង់គម្រោងអគារខុនដូ ដោយសារតែវាស្ថិតនៅមិនឆ្ងាយពីតំបន់កណ្ដាលក្រុង ដូចជានៅមិនឆ្ងាយ ក្រសួងស្ថាប័នធំៗរបស់រដ្ឋ ព្រមទាំងប្រជុំដោយផ្សារទំនើបៗនិងនៅក្បែរតំបន់ឧស្សាហកម្មនិងពាណិជ្ជកម្មដ៏មានសក្ដានុពលជាដើម ។
លោកបន្ថែមថា សម្រាប់ទីផ្សារខុនដូ នៅក្នុងប្រទេសកម្ពុជានាពេលបច្ចុប្បន្ននេះ ត្រូវបានមើលឃើញថា មានអតិថិជនជាជនជាតិខ្មែរភាគច្រើនបានវិនិយោគ និងទិញខុនដូជាក់ស្ដែង គម្រោងដែលលោកអភិវឌ្ឍន៍ អ្នកក្នុងស្រុក ទិញ រហូតដល់៧០ភាគរយ ហើយក្រៅពីនោះមានជនជាតិចិន ដែលមកពីហុងកុង ជប៉ុន អាស៊ីនិងអឺរ៉ុបផងដែរ ។
យោងតាមរបាយការណ៍របស់ក្រសួងរៀបចំដែនដីនគរូបនីយកម្មនិងសំណង់ បានអោយដឹងថាក្នុងឆ្នាំ ២០១៩កន្លងទៅនេះ ក្រសួងបានចេញលិខិតអនុញ្ញាតអោយសាងសង់អគារស្នាក់នៅរួម ក្នុងប្រទេសកម្ពុជា មានចំនួន ១៥២គម្រោង ស្មើនឹង១៧.៧០៧ចំណែកឯកជន ដែលមានផ្ទៃសំណង់២០៣.០០១ម៉ែត្រការ៉េ គិតជាទឹកប្រាក់វិនិយោគមានប្រមាណជិត២ពាន់លានដុល្លារអាមេរិក ៕ កែសម្រួលដោយ ៖ សុឃាក់
ចែករំលែកព័តមាននេះ