ប្រទេសចិន ៖ ទីក្រុងចិន កាន់តែច្រើនកាលពីថ្ងៃទី២៤មករា បានរឹតត្បិតការធ្វើដំណើរចេញចូល ខណៈវីរុសកូរ៉ូណាថ្មីកាន់តែឆ្លងរាលដាលខ្លាំង ដោយតុល្យការថ្មីកាន់តែកើន ក្រោយពីអង្គការសុខភាពពិភពលោក WHO បដិសេធមិនទាន់ចេញការប្រកាសអាសន្នជាអន្តរជាតិ។
មនុស្ស២6នាក់ហើយបានបាត់បង់ជីវិត ក្នុងចំណោមមនុស្សសរុប៨៣០នាក់ដែលឆ្លងវីរុសនេះ។ ក្នុងចំណោមអ្នកបាត់បង់ជីវិត មានតែ២នាក់ជាអ្នកនៅក្រៅក្រុងវូហាន។ តុល្យការមុននេះប្រកាសនាថ្ងៃទី២៣ មករា ដោយគណៈកម្មាធិការជាតិខាងសុខភាព រៀបរាប់ពីមនុស្សបាត់បង់ជីវិត១៨នាក់ និងមនុស្សជាង៦០០នាក់បានឆ្លង ភាគច្រើនក្នុងខេត្តហ៊ូបី ដែលមានក្រុងវូហានជាទីប្រជុំជន។
យោងតាមគណៈកម្មាធិការនោះថា ក្នុងចំណោមមនុស្សទាំង៨៣០នាក់ដែលឆ្លង ៣៧៧នាក់កំពុងស្ថិតក្នុងសភាពធ្ងន់ធ្ងរ ចំណែកអ្នកជំងឺ៣៤នាក់បានជាសះស្បើយ និងអាចចាកចេញពីមន្ទីរពេទ្យ។ រីឯមនុស្សជាង១០០០នាក់ដែលសង្ស័យកំពុងធ្វើ្វការពិនិត្យ។
ប្រឈមមុខនឹងវិបត្តិនេះ ចិនកាលពីថ្ងៃទី២៣ ខែមករា បានសម្រេចហាមឃាត់រាល់រថភ្លើង និងយន្តហោះចាកចេញពីក្រុងវូហាន និងរាំងខ្ទប់ផ្លូវថ្នល់នានា។ ទោះបីបណ្ដារថយន្តបឹស និងនាវាដែលធ្វើដំណើរកាត់តាមទន្លេយ៉ង់សេជាទន្លេដ៏វែងកាត់ក្រុងវូហាន ក៏ទទួលបទបញ្ជាឲ្យឈប់ចេញចូលទីក្រុងនេះដែរ។ ២ថ្ងៃជាប់ៗគ្នាបណ្ដាវិថីក្នុងក្រុងវូហានក្លាយជាស្ងាត់ជ្រងំ បណ្ដាហាងទំនិញត្រូវបិទទ្វារ រួចចរាចរណ៍ចុះថយខ្លាំង។ សរុបមនុស្សប្រមាណជា២៦លាននាក់ ទាក់ទិននឹងវិធានការទាំងនេះនៅខេត្តហ៊ូបី ជាខេត្តមានប្រជាជនជិត៦០លាននាក់។
បន្ទាប់ពីក្រុងវូហានដែលបិទការចេញចូលក្រុងច្រើនទៀតរបស់ចិន ក៏ជួបវាសនាដូចគ្នានោះដែរ ក្នុងគោលបំណងរាំងខ្ទប់ការឆ្លង។ ក្រុងHUANGGANG មានប្រជាជន៧,៥លាននាក់ស្ថិតនៅចម្ងាយ៧០គីឡូម៉ែត្រខាងកើតក្រុងវូហានមានប្រជាជន១១លាននាក់បានបិទរហូតដល់មានបទបញ្ជាជាថ្មី។ រាល់ការធ្វើចរាចរណ៍នៃរថភ្លើង នាវាដឹកអ្នកដំណើរ រថយន្តបឺសនិងមេត្រួក៏ផ្អាក។
ទីក្រុងEZHOUមានប្រជាជន១លាននាក់ក៏រិតត្បិតលើការដឹកជញ្ជូនដូចគ្នាដែរ។ទីក្រុងZHIJIANG ក៏ផ្អាកចរាចរណ៍បណ្ដារថយន្តបឹស និងបិទសាលារៀន។ រាល់ការដឹកជញ្ជូនក៏ផ្អាកនៅទីក្រុងលីឈាងមានប្រជាជន១លាននាក់ ស្ថិតនៅចម្ងាយ៧០០គីឡូម៉ែត្រពីវូហាន។ និយាយរួមនៅចិនទាំងមូលត្រូវស្ថិតក្នុងការប្រកាសអាសន្ន ពីការឆ្លងរាលដាលគួរឲ្យព្រួយបារម្ភបំផុតនៃវីរុសនេះ។
បណ្ដាទីតាំងប្រមូលផ្ដុំមនុស្សច្រើនដូចជាបណ្ដាហាងកាហ្វេអ៊ីនធឺណេត និងបណ្ដារោងមហោស្រពត្រូវបិទ។ ប្រជាជនត្រូវបានស្នើឲ្យពាក់ម៉ាស់ ប្រសិនបើចាកចេញតាមដងវិថី។
ក្រោយកិច្ចប្រជុំបន្ទាន់រយៈពេល២ថ្ងៃនៅក្រុងហ្សឹណែវ WHOនាថ្ងៃទី២៣មករាបានទទួលស្គាល់ភាពអាសន្ននៅចិនតែយល់ថា វាជាការប្រញាប់ប្រញាល់ពេក ដើម្បីនិយាយពីការប្រកាសអាសន្នសុខភាពសាធារណៈកម្រិតអន្តរជាតិ។ WHO សង្ឃឹមថា បណ្ដាវិធានការរ៉ាឌីកាល់ទាំងឡាយដែលចិនប្រកាន់យក នឹងមានប្រសិទ្ធិភាពហើយនឹងមានរយៈពេលខ្លី។
ក្រៅពីប្រទេសចិនវីរុសថ្មីបានឆ្លងក្នុងប្រទេសច្រើនទៀត។ ថៃមានឆ្លង២នាក់ជាអ្នកមកពីវូហាន ជប៉ុនមានម្នាក់មកពីវូហានដែរ ក៏ដួចជានៅកូរ៉េខាងត្បូងដែលមានម្នាក់មកដល់ក្រុងសេអ៊ូលនាថ្ងៃទី១៩ មករា តាមយន្តហោះពីវូហាន។ អាមេរិកមានអ្នកឆ្លងម្នាក់ វៀតណាម២នាក់តៃវ៉ាន់ម្នាក់និងសិង្ហបុរីម្នាក់។ អារ៉ាប៊ីសាអូឌីតក៏មានម្នាក់ដែរ៕ ដកស្រង់ចេពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ