រាជធានីភ្នំពេញ ៖ ក្រោយដណ្ដើមបានមេដាយមាសពិភពលោក កីឡាករវ័យក្មេង ប៉ាល់ ជីវ័ន្ត កាន់តែទទួលបានការចាប់អារម្មណ៍ពីសំណាក់មហាជន ។ លោកត្រូវគេមើលឃើញថា នឹងក្លាយជាធនធានដ៏ខ្លាំងរបស់កម្ពុជាធ្វើឱ្យកីឡាតេក្វាន់ដូល្បីល្បាញលើឆាកអន្តរជាតិបន្ថែមពីលើស្នាដៃរបស់កីឡាការិនី…
រាជធានីភ្នំពេញ ៖ ក្រោយដណ្ដើមបានមេដាយមាសពិភពលោក កីឡាករវ័យក្មេង ប៉ាល់ ជីវ័ន្ត កាន់តែទទួលបានការចាប់អារម្មណ៍ពីសំណាក់មហាជន ។ លោកត្រូវគេមើលឃើញថា នឹងក្លាយជាធនធានដ៏ខ្លាំងរបស់កម្ពុជាធ្វើឱ្យកីឡាតេក្វាន់ដូល្បីល្បាញលើឆាកអន្តរជាតិបន្ថែមពីលើស្នាដៃរបស់កីឡាការិនី ស៊ន សៀវម៉ី ដែលធ្លាប់បានសាងរួចមកហើយនោះផង ។
ប៉ាល់ ជីវ័ន្ត បានចូលប្រឡូកកីឡាតេក្វាន់ដូ ក្នុងវ័យ១៤ឆ្នាំ ហើយក្រោយមកក៏ទទួលបានការងារធ្វើនៅក្នុងក្របខណ្ឌក្រសួងមហាផ្ទៃ ។ ស្ថិតក្នុងវ័យ៣៥ឆ្នាំ កីឡាកររូបនេះហាក់មានយីអ៊ុនខ្លាំងនៅក្នុងវិថីកីឡាតេក្វាន់ដូ ITF ។ មិនត្រឹមតែជាកីឡាករឆ្នើមប៉ុណ្ណោះទេ តែលោកក៏ជាគ្រូបង្វឹកដ៏មានប្រជាប្រិយភាពមួយរូបនៅកម្ពុជាខាងផ្នែកកីឡានេះផងដែរ ។
ប៉ាល់ ជីវ័ន្ត សម្រេចបានសមិទ្ធផលជូនជាតិគួរជាទីមោទនៈ កាលពីចុងខែសីហា ឆ្នាំ២០១៩ ដោយជួយឱ្យកម្ពុជាត្រូវគេលើកទង់ជាតិ និងបន្លឺភ្លេងជាតិលើឆាកអន្តរជាតិបន្ទាប់ពីលោកដណ្តើមបាន មេដាយមាសក្នុងការប្រកួតជើងឯកពិភពលោក នៅប្រទេសប៊ុលហ្គារី លើវិញ្ញាសាសម្តែងមេគុនខ្សែក្រវាត់ខ្មៅ៥ដាន់ ។
មេដាយមាសនេះជួយឲ្យលោកទទួលបានកិត្តិយសដ៏អស្ចារ្យ ដោយលោកត្រូវបានគេដង្ហែលើក្បួនរថយន្តអមដោយម៉ូតូសក្រោមការរៀបចំដោយរាជរដ្ឋាភិបាលកម្ពុជាយ៉ាងមានកិត្តិយស ពីអាកាសយានដ្ឋានអន្តរជាតិភ្នំពេញទៅកាន់ទីស្នាក់ការក្រសួងអប់រំ យុវជន និងកីឡា ។ ប៉ាល់ ជីវ័ន្ត បានក្លាយ ជាមន្ត្រីនគរបាលក្រសួងមហាផ្ទៃនៅឆ្នាំ២០១៩ ដោយបច្ចុប្បន្នលោកកំពុងពាក់ស័ក្តិពីរលើស្មា។ លោកជាកូនទី៥ក្នុងចំណោមបងប្អូន៦នាក់នៅក្នុងគ្រួសារដែលមានជីវភាពខ្វះមុខខ្វះក្រោយ ហើយមកដល់ពេលនេះលោកមានលទ្ធភាពទិញផ្ទះមួយល្វែងនៅក្នុងបុរីពិភព
ថ្មីដែលលោកបានប៉ងជាយូរមកហើយតាមរយៈ ប្រាក់រង្វាន់ដែលទទួលបាន ។
ប៉ាល់ ជីវ័ន្ត ជានិស្សិតបញ្ចប់ការសិក្សាថ្នាក់ បរិញ្ញាបត្រនៅសាកលវិទ្យាល័យធនធានមនុស្ស
លើមុខជំនាញគ្រប់គ្រងអាជីវកម្មបានរំលឹកថា ក្រោយហ្វឹកហាត់បានបីខែ លោកគ្រូបួន ហ៊ីង សុធីយ៉ា បានដាក់ឈ្មោះឲ្យប្រកួតជើងឯកថ្នាក់ជាតិជាលើកដំបូង ដោយទទួលបានចំណាត់ថ្នាក់លេខ៣ ឬមេដាយសំរឹទ្ធិ ។ ហ្វឹកហាត់បាន ប្រមាណ៥ឆ្នាំ លោកត្រូវបានសហព័ន្ធកីឡាតេក្វាន់ដូ ITF កម្ពុជាបញ្ចូនទៅប្រកួតជើងឯកពិភពលោកលើកដំបូងនៅប្រទេសក្រិក កាលពីឆ្នាំ២០០៣ដោយទទួលបានមេដាយសំរឹទ្ធលើវិញ្ញាសាប្រយុទ្ធទម្ងន់៦៣គីឡូក្រាមកម្រិត ខ្សែក្រវាត់ខ្មៅពីរដាន់ ។
ជោគជ័យលើឆាកអន្តរជាតិលើកដំបូងនេះធ្វើឱ្យលោកមានចិត្តស្រឡាញ់កីឡាតេក្វាន់ដូកាន់តែខ្លាំងជាមួយមហិច្ឆតាចង់ឈ្នះមេដាយប្រាក់និងមាសជូនជាតិមាតុភូមិបន្ថែមទៀត ។ ឆ្នាំ២០១៧ លោកត្រូវបានសហព័ន្ធបញ្ជូនឲ្យទៅចូលរួមប្រកួតជើងឯក ពិភពលោកនៅប្រទេសកូរ៉េខាងជើងដោយ ដណ្តើមបានមេដាយប្រាក់ ។ ប្រឡូកវិស័យនេះជាង២០ឆ្នាំ ទើបតែឆ្នាំ២០១៨ និង២០១៩ ប៉ុណ្ណោះដែលលោកទទួលបានផ្លែផ្កាខ្លាំង ៕ (កែសម្រួលដោយ ៖ បុប្ផា)
ចែករំលែកព័តមាននេះ