សោម វិឆ័យ ឆ្ពោះទៅវគ្គ១៦នាក់ ក្នុងការប្រកួតជើងឯក
- ភ្នំពេញ
រាជធានីភ្នំពេញ ៖ ការប្រកួតជ្រើសរើសជើងឯក TV5 Knock out Series by K-Cement រដូវកាលទី៧…
រាជធានីភ្នំពេញ ៖ ការប្រកួតជ្រើសរើសជើងឯក TV5 Knock out Series by K-Cement រដូវកាលទី៧…
រាជធានីភ្នំពេញ ៖ ការប្រកួតជ្រើសរើសជើងឯក TV5 Knock out Series by K-Cement រដូវកាលទី៧ ក្នុងប្រភេទទម្ងន់៦៣,៥គីឡូក្រាម សប្ដាហ៍ទី៣ បានបញ្ចប់ហើយ កាលពីថ្ងៃទី១៨ មករា ។ កីឡាករបង្គោលខៀវ សោម វិឆ័យ ដែលបានបង្ហាញមុខគួរឱ្យភ្ញាក់ផ្អើលក្រោយបាត់មុខមួយរយៈបានឈ្នះគូប្រកួតដែលជាជើងខ្លាំងទើបឡើងកូដផាន រះ ឱ្យធ្លាក់ហើយទទួលបានឱកាសឡើងទៅវគ្គ១៦នាក់ ។ នេះជាការប្រកួតក្នុងវគ្គស្វែងរក២នាក់ទៅវគ្គ១៦នាក់ សម្រាប់រដូវកាលថ្មី ដែលជាការប្រកួតដ៏សំខាន់សម្រាប់សមាសភាព៣២នាក់ដែលត្រូវបានជម្រើស។
ការប្រកួតនៅក្នុងសង្វៀនប៉ុស្តិ៍លេខ៥ព្រែកកំពិសនេះ ទទួលបានការចាប់អារម្មណ៍យ៉ាងខ្លាំងពីសំណាក់អ្នកគាំទ្រ ជាពិសេសការប្រកួតរបស់មួយគូនេះ ដោយសារតែអ្នកទាំងពីរគឺជាគូប្រកួតស៊ីសាច់ហុតឈាម ។ មួយគូនេះប្រើរយៈពេលប្រកួត៣ទឹកពេញទម្រាំរកឃើញលទ្ធផលចាញ់ឈ្នះ។ គេកត់សម្គាល់ថា កីឡាករម្ខាងៗអត់មានសំចៃដៃ ឬទុកមុខឱ្យគ្នាតែម្ដង។
បង្គោលក្រហមបានបើកការវាយប្រហារខ្លាំងមិនធម្មតាទេប៉ុន្តែមកពីបង្គោលខៀវក៏ខ្លាំងមិន
ធម្មតា ហើយវាយត្រូវគោលដៅច្រើនជាង ទើបគេមានសំណាងដណ្ដើមបានកៅអី១៦នាក់ ដោយយកឈ្នះបង្គោលក្រហមដោយពិន្ទុ។
លោក សេង កដិកា អ្នករៀបចំការប្រកួត បានថ្លែងបញ្ជាក់ថា ការប្រកួតរដូវកាលនេះនឹងកាន់តែល្អមើលហើយ ដ្បិតជាវគ្គជម្រុះក្នុងជុំទី១។ លោកថា សមាសភាពនៅក្នុងរដូវកាលទី៧នេះ គឺស្ថិតក្នុងប្រភេទទម្ងន់៦៣,៥គីឡូក្រាមដែលជាប្រភេទមធ្យម ដូច្នេះសម្រាប់កីឡាករគឺមិនខុសពីបណ្ដុះកីឡាករក្មេងៗ ដើម្បីត្រៀមទុកទៅកាន់ព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នោះទេ ដោយលោកប្រកាសថា បើកីឡាករដែលមានមុខប្រកួតក្នុងរដូវកាលទី៧ទាំងអស់ប្រឹងប្រែង ហើយតស៊ូ ប្រកួតដោយកុំប្រហែសខ្លួន គឺរង្វង់២ទៅ៣ឆ្នាំទៀត ពួកគេនឹងក្លាយជាកីឡាករល្បីៗជំនួសអ្នកចាស់ ដែលល្បីនៅក្នុងពេលនេះមិនខាន។
លោកសម្រេចចិត្តជ្រើសរើសការប្រកួតក្នុងប្រភេទទម្ងន់៦៣,៥គីឡូក្រាម ដែលលោកយល់ថាគឺជាការបណ្ដុះធនធានកីឡាករក្មេងៗស្នងតំណែង ។ ការប្រកួតក្នុងវគ្គ៣២នាក់ជម្រុះយក១៦នាក់នេះ លោកអះអាងថា សម្រាប់គូប្រកួតក្នុងសប្ដាហ៍បន្ទាប់នឹងកាន់តែល្អមើល ដោយសារតែអ្នកប្រយុទ្ធទាំងនោះជម្រុះគ្នាយ៉ាងស្វិតស្វាញនៅលើសង្វៀន ៕ (កែសម្រួលដោយ ៖ បុប្ផា)
ចែករំលែកព័តមាននេះ