ខេត្តមណ្ឌលគិរី ៖ ពេញមួយឆ្នាំ២០១៩ មន្ទីរបរិស្ថានខេត្តបានចងក្រងសំណុំរឿងបទល្មើសធនធានធម្មជាតិ ពីបណ្តាដែនជម្រកសត្វព្រៃនានាចំនួន២០៥ករណី ក្នុងនោះមានសំណុំរឿងពិន័យអន្តរការណ៍ចំនួន៧៥ករណី និងសំណុំរឿងបញ្ចូនទៅសាលាដំបូងខេត្តចំនួន១៣០ករណី ។
របាយការណ៍នេះ ត្រូវបានឲ្យដឹងនៅក្នុងកិច្ច ប្រជុំបូកសរុបលទ្ធផលការងារប្រចាំឆ្នាំ២០១៩ និង
លើកទិសដៅការងារឆ្នាំ២០២០ របស់មន្ទីរបរិស្ថានខេត្ត កាលពីថ្ងៃទី១៣ ខែមករាកន្លងមក ។
លោក កែវ សុភគ៌ ប្រធានមន្ទីរបរិស្ថានខេត្ត បានឲ្យដឹងថា ការបង្កើតសហគមន៍តំបន់ការពារ
ធម្មជាតិក្នុងភូមិសាស្ត្រខេត្តមានចំនួន២១សហគមន៍ ស្មើនឹងទំហំផ្ទៃដីសរុប៦៣.០៧៧ហិកតា
ក្នុងនោះប្រជាពលរដ្ឋសរុបចំនួន១៧.៩៥៦នាក់ ស្មើនឹង៣.៤១៤គ្រួសារ និងមានចំនួនភូមិសរុប៤០ភូមិ ។
ការចុះបញ្ជីសហគមន៍ជនជាតិដើមភាគ តិចមានចំនួន២១សហគមន៍ ក្នុងនោះដែនជម្រក សត្វព្រៃកែវសីមាចំនួន១៨សហគមន៍ ក្នុងដែន ជម្រកសត្វព្រៃភ្នំព្រេចចំនួន២សហគមន៍ និងនៅក្នុងដែនជម្រកសត្វព្រៃស្រែពក១សហគមន៍ ។
លោក រ័ត្ន វីរៈ អនុរដ្ឋលេខាធិការក្រសួងបរិស្ថាន បានថ្លែងនូវការកោតសរសើរថ្នាក់ដឹក នាំ ក៏ដូចជាមន្ត្រីនៃមន្ទីរបរិស្ថានខេត្ត ដែលបានខិតខំអនុវត្តការងាររបស់ខ្លួនប្រកបដោយការទទួលខុសត្រូវខ្ពស់ ជាពិសេសធានាបាននូវបរិស្ថានស្អាត សន្តិសុខ សុវត្ថិភាព និងការអភិរក្សធនធានធម្មជាតិ រួមទាំងការធ្វើឱ្យប្រសើរឡើង នូវកិច្ចគាំពារបរិស្ថាន ។
ជាមួយនេះ ផ្តល់នូវជំនឿទុកចិត្តដល់ប្រជាពលរដ្ឋក្នុងការរស់នៅ និងប្រកបមុខរបរចិញ្ចឹមជីវិតដោយភាពសុខសាន្ត ដើម្បីរួមចំណែកក្នុងសកម្មភាពអភិវឌ្ឍន៍សង្គម ដល់អ្នកវិនិយោគក្នុង និងក្រៅប្រទេស ក៏ដូចជាទាក់ទាញភ្ញៀវទេសចរជាតិ-អន្តរជាតិចូលមកទស្សនាក្នុងតំបន់ទេសចរណ៍ធម្មជាតិដ៏ស្រស់ស្អាតនៃខេត្តមួយនេះ ។
លោកអនុរដ្ឋលេខាធិការ បានស្នើដល់ថ្នាក់ដឹកនាំ មន្ត្រីរាជការ និងមន្ត្រីឧទ្យានុរក្សនៃមន្ទីរបរិស្ថាន ត្រូវរក្សាសាមគ្គីភាព និងបន្តខិតខំបំពេញតួនាទីភារកិច្ចស្នូលរបស់ខ្លួនឱ្យស័ក្តិសមជាមន្ត្រី
បម្រើរាស្ត្រ សំដៅធ្វើឱ្យប្រសើរឡើងនូវការរស់នៅប្រកបដោយសុខុមាលភាព និងអនាម័យបរិស្ថានស្អាត រួមចំណែកក្នុងការប្រើប្រាស់ធនធានធម្មជាតិប្រកបដោយនិរន្តរភាព និងរួមគ្នាការពារធនធានធម្មជាតិ ។
ពង្រឹងប្រសិទ្ធភាពការងារគ្រប់គ្រងធនធានធម្មជាតិ និងបរិស្ថាននៅកម្ពុជា សំដៅធានានូវប្រសិទ្ធភាពការងារ ដែលមានសសរស្តម្ភចំនួន៥គឺ ទី១-កិច្ចគាំពារបរិ ស្ថាន ទី២-កិច្ចការពារជីវចម្រុះ ទី៣-ការរស់នៅប្រកបដោយចីរភាព ទី៤-រដ្ឋបាលទំនើប និងទី៥-ការអភិរក្សធនធានធម្មជាតិ ៕ (កែសម្រួលដោយ ៖ បុប្ផា)
ចែករំលែកព័តមាននេះ