រាជធានីភ្នំពេញ ៖ ក្នុងពេលដែលរាជរដ្ឋាភិបាលកម្ពុជា បានជំរុញ និងឱ្យអនុវត្តនូវបច្ចេកវិទ្យាក្នុងសេដ្ឋកិច្ច ពោលគឺដើរឱ្យទាន់បដិវត្តន៍ឧស្សាហកម្មជំនាន់ទី ៤.០ នោះបណ្ដាសហគ្រាសតាមវិស័យនានាបានធ្វើ និងមួយចំនួនមិនទាន់ធ្វើ ។ ក្នុងនោះវិស័យឧស្សាហកម្មកាត់ដេរសម្លៀកបំពាក់ និងស្បែកជើងកម្ពុជា ដែលជាវិស័យស្នូលមួយក្នុងវិស័យសេដ្ឋកិច្ចកម្ពុជាផងដែរនោះ ក៏បានចាប់ផ្ដើមអនុវត្តន៍នូវសកម្មភាពនេះដែរ ។
លោក លី តេកហេង នាយកប្រតិបត្តិនៃសមាគមរោងចក្រកាត់ដេរសម្លៀកបំពាក់ និងស្បែកជើងកម្ពុជា បានមានប្រសាសន៍ថា ការអភិវឌ្ឍត្រូវដើរឱ្យទាន់នូវបច្ចេកវិទ្យា ក្នុងនោះវិស័យឧស្សាហកម្មក៏ដូច្នេះដែរ គឺត្រូវការធានានូវគុណភាព ជានិរន្តរ៍ ដោយក្នុងនោះវិស័យរោងចក្រងាកមកប្រើប្រព័ន្ធ ៤.០ ដែលមានក្រុមហ៊ុនបច្ចេកវិទ្យា Zilingo ជាអ្នកជួយ និងផ្ដល់ដំណោះស្រាយដល់រោងចក្រកម្ពុជា ។
លោកបន្តថា ៖ «ប្រព័ន្ធថ្មីនេះនឹងជួយដល់អ្នកប្រតិបត្តិក្នុងវិស័យផលិតសម្លៀកបំពាក់ទៅលើការគ្រប់គ្រង ការបញ្ជាទិញ ការផ្ដល់ទំនិញត្រលប់ទៅវិញ និងគ្រប់គ្រងប្រតិបត្តិការនៅក្នុងរោងចក្រផ្ទាល់តែម្ដង» ។
លោកបន្តឱ្យដឹងទៀតថា នៅពេលដែលបណ្ដារោងចក្រងាកមកប្រើនូវបច្ចេកវិទ្យាទំនើបវិញ នោះពួកគេនឹងលែងពិបាកក្នុងគ្រប់គ្រងតាំងពីវត្ថុធាតុចូលក្នុងឃ្លាំង និងផលិតជាទំនិញនាំចេញវិញដោយលែងខ្វល់ និងព្រួយបារម្ភទៀតឡើយ ព្រមទាំងអាចមើលរបាយការណ៍ចាស់ៗបានផងដែរ ពិសេសនោះអាចមើលរបាយការណ៍ក្នុងទូរស័ព្ទដៃ ឬកុំព្យូទ័រដោយមិនបាច់ព្រីនចេញជាក្រដាសនោះទៀតដែរ ។ លោកបន្តទៀតថា នៅពេលដែលសមាជិករបស់សមាគមប្រើប្រាស់នូវបច្ចេកវិទ្យាសម្រាប់ពិនិត្យខ្សែចង្វាក់ផលិតកម្ម នឹងធ្វើឱ្យមានការប្រកួតប្រជែងជាមួយប្រទេសផលិតដទៃទៀតកាន់តែខ្លាំង និងកាន់តែកៀកគ្នា ហើយអាចបង្កើនការផលិតរបស់កម្ពុជាកាន់តែខ្លាំង និងចំណេញកាន់តែច្រើន ។លោកបញ្ជាក់ថា ៖ «នៅបណ្ដាប្រទេសមួយចំនួន គេបានប្រើប្រព័ន្ធនេះរួចហើយ ដូចជានៅប្រទេសឥណ្ឌូនេស៊ី បង់ក្លាដេស ស្រីលង្ការ និងឥណ្ឌាជាដើម ហើយក៏ទទួលបានជោគជ័យខ្ពស់ផងដែរ» ។
លោក យិន សូសាកល អ្នកគ្រប់គ្រងផ្នែកអភិវឌ្ឍន៍អាជីវកម្មនៃក្រុមហ៊ុន Zilingo ដែលមានមូលដ្ឋាននៅប្រទេសសឹង្ហបុរី បានឱ្យដឹងថា ការប្រើប្រាស់នូវបច្ចេកវិទ្យាសម្រាប់វិស័យឧស្សាហកម្មកាត់ដេរ និងសម្លៀកបំពាក់ នឹងអាចផ្ដល់ប្រយោជន៍ និងបង្កើនប្រាក់ចំណូលដោយមានប្រសិទ្ធភាពប្រមាណពី ១០ ទៅ ១២ ភាគរយ ដូច្នេះក្នុងបរិមាណនេះ គឺអាចចំណេញបានច្រើនដល់សហគ្រាសរោងចក្រ ដែលកំពុងដំណើរការនៅកម្ពុជា ។ លោកបន្ថែមថា កន្លងមកនេះប្រធានរោងចក្រ ឬថៅកែរោងចក្រ ចង់ត្រួតពិនិត្យរបាយការណ៍ណាមួយពីប្រធានផ្នែកនីមួយៗត្រូវរង់ចាំ ការផ្ញើរបាយការណ៍ម្ដងមួយៗ តែនៅពេលដែលមានប្រព័ន្ធគ្រប់គ្រងទិន្នន័យច្បាស់លាស់ ពួកគាត់អាចយករបាយការណ៍បានលឿន និងបានគ្រប់ពេលវេលា ដោយមិនចាំបាច់តែថ្ងៃធ្វើការ ឬរបាយការណ៍ថ្មីៗនោះទេ ពោលគឺរបាយការណ៍ចាស់ៗក៏អាចយកមកធ្វើការប្រៀបធៀបបានដែរ ។
គួរបញ្ជាក់ថា វិស័យវាយនភណ្ឌនៅតែជាវិស័យដែលមានសក្ដានុពលក្នុងការជំរុញការនាំចេញរបស់កម្ពុជា ទៅកាន់ទីផ្សារអន្តរជាតិ ។ វិស័យនេះបានដើរតួនាទីសំខាន់ដដែលក្នុងកំណើនសេដ្ឋកិច្ចកម្ពុជា និងផ្ដល់ការងារដល់ប្រជាពលរដ្ឋកម្ពុជាប្រមាណជិត ១លាននាក់ ព្រមទាំងផ្ដល់ប្រាក់ចំណូលដល់ពលរដ្ឋសរុបជាង ២ពាន់លានដុល្លារអាមេរិកក្នុងមួយឆ្នាំ ។
យ៉ាងណាក៏ដោយក្នុងពេលសហភាពអឺរ៉ុបកំពុងធ្វើនីតិវិធីព្យួរបណ្ដោះអាសន្ននូវប្រព័ន្ធអនុគ្រោះពន្ធ EBA ពីកម្ពុជា មានមតិមួយចំនួនបង្ហាញការព្រួយបារម្ភ ដែលនាំឱ្យប៉ះពាល់ដល់វិស័យសេដ្ឋកិច្ច ជាពិសេសវិស័យកាត់ដេរ តែមានមតិមួយចំនួនទៀត បានលើកឡើងថាកម្ពុជា នឹងមានឱកាសក្នុងការពង្រឹងខ្លួនដោយលែងពឹងពាក់ការអនុគ្រោះពន្ធនេះ តែនឹងពង្រីកទីផ្សារសេរីឱ្យបានកាន់តែច្រើន ៕ កែសម្រួលដោយ ៖ សុឃាក់
ចែករំលែកព័តមាននេះ