រាជធានីភ្នំពេញ ៖ រយៈពេលមិនក្រោម២ឆ្នាំទេ ដែលកីឡាករជើងខ្លាំងធ្លាប់គ្រងតំណែងជាម្ចាស់ខ្សែក្រវាត់ប៉ុស្តិ៍លេខ៥ គង់់ សំបូរ មិនសូវសកម្មជាមួយនឹងការប្រដាល់នៅលើសង្វៀនប៉ុន្មានទេ ពោលគឺចាប់តាំងពីលោកមានមុខឡើងប្រកួតនៅលើសង្វៀនអន្តរជាតិក្រៅប្រទេស។ យ៉ាងណាមិញ កីឡាកររូបនេះ…
រាជធានីភ្នំពេញ ៖ រយៈពេលមិនក្រោម២ឆ្នាំទេ ដែលកីឡាករជើងខ្លាំងធ្លាប់គ្រងតំណែងជាម្ចាស់ខ្សែក្រវាត់ប៉ុស្តិ៍លេខ៥ គង់់ សំបូរ មិនសូវសកម្មជាមួយនឹងការប្រដាល់នៅលើសង្វៀនប៉ុន្មានទេ ពោលគឺចាប់តាំងពីលោកមានមុខឡើងប្រកួតនៅលើសង្វៀនអន្តរជាតិក្រៅប្រទេស។ យ៉ាងណាមិញ កីឡាកររូបនេះ បានអះអាងថា ខ្លួននឹងដាក់ផែនការកសាងកេរ្តិ៍ឈ្មោះឡើងវិញ ដើម្បីឱ្យឆ្នាំ២០២០នេះ អាចក្លាយជាកីឡាករទទួលការចាប់អារម្មណ៍ជាថ្មី។
តាមរយៈការបង្ហាញខ្លួនលើសង្វៀនលំដាប់ អន្តជាតិនៅឆ្នាំ២០១៩ បន្ទាប់ពីផ្អាកការប្រកួតជិត២ឆ្នាំមុនផ្លាស់ទៅក្លិបគុហារព្រហ្មជ័យក្នុង ខេត្តសៀមរាប កីឡាករ គង់ សំបូរ ហាក់បាត់ទីផ្សារមួយសន្ធឹក ។ ប៉ុន្តែឱកាសបានបង្ហាញខ្លួនជាបន្តបន្ទាប់នៅសង្វៀនប្រទេសថៃ និងក្នុង ONE Championship ហាក់ធ្វើឱ្យកីឡាកររូបនេះ ដាក់ចិត្តឡើងវិញ ដើម្បីបន្តពង្រឹងស្មារតី និងដាក់ជំហរដណ្តើមខ្សែក្រវាត់ឱ្យបានមួយនៅ ឆ្នាំ២០២០ ។
គង់ សំបូរ ដែលជំនាញទាត់ឆ្វេង និយាយថា ពេញមួយឆ្នាំ២០២០នេះ លោកនឹងដាក់គោលដៅហ្វឹកហាត់ឲ្យបានខ្លាំងជាងមុន ស្របពេលដែលលោកក៏ចាប់ផ្ដើមទទួលកម្មវិធីប្រកួតធំៗ នៅឆ្នាំ២០២០នេះឡើងវិញ ។ លោកនិយាយថា លោកនឹងសុំគ្រូបង្វឹករបស់លោកឱ្យចាប់ផ្ដើមផ្គូផ្គងលោកប្រកួតឲ្យបានច្រើន ព្រោះការប្រកួតច្រើនធ្វើឲ្យរហ័សរហួន ដើម្បីកុំឱ្យសរសៃសសូងក្លាយជាស្ទក់ ។
លោកបន្ត ថា នៅដើមឆ្នាំ២០២០នេះ លោកក៏បានចូលប្រកួតដណ្ដើមជើងឯកនៅប៉ុស្តិ៍លេខ៥ផងដែរ ទើបលោកចាំបាច់ត្រូវតែខំហ្វឹកហាត់ឱ្យខ្លាំងសម្រាប់ឆ្នាំនេះ ។ លោកប្រកាសដាក់គោលដៅយកខ្សែក្រវាត់នៅក្នុងការប្រកួតជើងឯកនេះឱ្យខាងតែបាន រួមជាមួយផែនការទៅប្រកួតនៅលើសង្វៀន ONE Championship ដើម្បីឱ្យសង្វៀននេះ ចាប់អារម្មណ៍ផ្គូផ្គងលោកបានប្រកួតញឹកឡើងវិញ។
គួរបញ្ជាក់ថា កីឡាករវ័យ២៣ឆ្នាំរូបនេះ ធ្លាប់ប្រកួតចាញ់ពិន្ទុជើងខ្លាំងចិន Zhang Chenlong នៅសង្វៀន ONE កាលខែកុម្ភៈ ឆ្នាំ ២០១៩កន្លងទៅនៅប្រទេសសិង្ហបុរី ទើបជាហេតុផលធ្វើឱ្យលោកដកខ្លួនមួយរយៈ។ លោក ថា នៅឆ្នាំ២០២០នេះ អ្វីដែលលោកចង់បានបំផុតគឺត្រូវតែដណ្ដើមយកខ្សែក្រវាត់ក្នុងប្រភេទទម្ងន់៦៣,៥គីឡូក្រាមឱ្យខាងតែបាននៅប៉ុស្តិ៍លេខ៥ បើទោះជាមានការលើកឡើងថា ការតាំងចិត្តនេះ គឺមិនពិបាក ព្រោះលោកជាជើងខ្លាំង និងធ្លាប់ល្បីជាយូរមកហើយ ។ ប៉ុន្តែបើលោកបរាជ័យ ក៏មានន័យថានឹងបាក់មុខមិចតិចទេ ។ កូនសិស្សរបស់លោក ជា រិទ្ធ រូបនេះនៅបន្តថា ឆ្នាំ២០២០ហ្នឹង លោកចង់បានខ្សែក្រវាត់តាមតែអាចធ្វើទៅបាន តែបើមិនបាន ក៏អាចនឹងខកចិត្តដែរ។
លោក ជា រិ ទ្ធ គ្រូបង្វឹករបស់ គង់ សំបូរ បានថ្លែងប្រាប់បណ្ដាញសារព័ត៌មានក្នុងស្រុកថា ឆ្នាំថ្មីហ្នឹងលោកបានដាក់ឱ្យគង់ សំបូរ ទៅ ប្រកួតយកពាននៅប៉ុស្តិ៍លេខ៥ ។ ក្នុងនោះ ក៏មានការប្រកួតខ្សែក្រវាត់ផ្សេងទៀត ដែរ ហើយជាពិសេសលោកចង់ឲ្យសំបូរ ប្រកួត Kickboxing បើសិនជាអាចកើតឡើង ។
លោកថា បើប្រកួតនៅថៃ លោកចង់ឲ្យសំបូរ ប្រកួតតែ៥ដងអីទេនៅឆ្នាំខាងមុខ ព្រោះយើង ត្រូវសម្រិតសម្រាំងបន្តិច មិនមែនចេះតែទៅ ប្រកួតប៉ាតណាប៉ាតណីទេ ព្រោះសង្វៀនខ្លះក៏ អត់មានគុណភាពដែរ ។
ប្រធានផ្នែកទំនាក់ទំនងអន្តរជាតិនៃ សហព័ន្ធកីឡាប្រដាល់គុនខ្មែររូបនេះបន្តថា បើសិនជាសង្វៀនមើលទៅរាងយ៉ាប់ គឺលោក មិនឲ្យកូនសិស្សទៅប្រកួតនោះឡើយ ។ ប៉ុន្តែ បច្ចុប្បន្ន លោកមើលឃើញថា ទីផ្សារប្រកួត នៅម៉ាឡេស៊ី ក៏ខ្លាំងដែរសម្រាប់កីឡាករខ្មែរ ដូច្នេះ លោកទំនងចង់ឲ្យកូនសិស្ស ឬកីឡាករ ខ្មែរទៅប្រកួតនៅម៉ាឡេស៊ីច្រើនជាង ។ លោក ជា រិ ទ្ធ មិនត្រឹមតែបណ្ដុះបណ្ដាលផ្នែកក្បាច់គុន នោះទេ ប៉ុន្តែថែមទាំងបណ្ដុះបណ្ដាលផ្នែក ស្មារតីរឹងមាំដល់កូនសិស្សទៀតផង ពោល ឡើងប្រកួតបើចាញ់ គឺចាញ់ឲ្យល្អមើល ។
គួររំលឹកផងដែរថា មួយរយៈចុងក្រោយ នេះ គង់ សំបូរ បានចេញទៅប្រកួតនៅក្រៅ ប្រទេសជាច្រើនដូចជា សង្វៀន Super Champ ប្រទេសថៃ, សង្វៀន Thai Fight និងឡើង ប្រកួតនៅសង្វៀន ONE Championship ជាដើម ។ បន្ទាប់ពីចាញ់ពិន្ទុកីឡាករចិន Zhang Chenlong កាលខែកុម្ភៈនៅសង្វៀន ONE Championship សំបូរ បានព្យាយាម ហ្វឹកហាត់យ៉ាងល្អប្រសើរ និងបំពេញចន្លោះ ខ្វះខាតបានមួយផ្នែកធំ ហើយក៏បន្តអភិវឌ្ឍខ្លួន បន្ថែមទៀត ដើម្បីឈានទៅរកជោគជ័យក្នុងឆ្នាំ ២០២០ ៕ (កែសម្រួលដោយ ៖ បុប្ផា)
ចែករំលែកព័តមាននេះ