ខេត្តកែប ៖ អ្នកភូមិនាំគ្នាសម្រុកវាយបំបែកបេតុងដើម្បីកាត់យកដែកលក់នៅកន្លែងអគាររលំបាក់ បន្ទាប់ពីអាជ្ញាធរបិទការរុករកជនរងគ្រោះក្នុងអគារកំពស់៧ជាន់ដែលបានរលំបាក់ បណ្តាលឱ្យបាត់បង់ជីវិតមនុស្សចំនួន៣៦នាក់ និងរបួសធ្ងន់ស្រាលចំនួន២៣នាក់ ដែលហេតុការណ៍នេះបានកើតនៅភូមិកែប សង្កាត់កែប ក្រុងកែប កាលពីរសៀលថ្ងៃទី៣ មករា ឆ្នាំ២០២០ រហូតមកដល់ថ្ងៃទី១៣ ខែមករា ឆ្នាំ២០២០ នេះ ត្រូវបានប្រជាពលរដ្ឋនិយាយថា នៅកន្លែងអគាររលំបាក់នៅតែមានក្លិនស្អុយពេលត្រូវភ្លៀងមួយមេកាលពីយប់ថ្ងៃទី១២ មករា ឆ្នាំ២០២០។
ស្ត្រីម្នាក់ជាអ្នកប្រមូលដែកនៅអគារបាក់រលំបាននិយាយថា គាត់មកប្រមូលដែកតាមគេទេ ហើយដំបូងឡើយគាត់អត់ទ្រាំស្ទើតែពុំបាន ដោយសាតែមានក្លិនស្អុយពេក តែក្រោយមកគាត់ដូចជាស៊ាំនឹងក្លិនស្អុយនេះ។
នៅថ្ងៃទី១៣ ខែមករា ឆ្នាំ២០២០នេះ អ្នកភូមិជាច្រើននៅតែបន្តសម្រុកដណ្ដើមគ្នាកាត់យកដែកពីបំណែកបេតុងអគារបាក់រលំ ហើយនៅតាមដងផ្លូវនានាជាប់នឹងអគារបាក់បែកសំបូរទៅដោយសំរាម ជាពិសេសគំនរថ្ម និងដុំឥដ្ឋ ព្រមទាំងសំលៀកបំពាក់របស់ជនរងគ្រោះនៅរាយប៉ាយលើគំនរអគារបាក់បែកមួយនេះ ។
គេមិនទាន់ឃើញមានការសំអាតនៅកន្លែងគំនរអគាររលំបាក់នេះនៅឡើយទេ ហើយពាក់ពន្ធ័នឹងគំនរអគារមិនទាន់ត្រូវបានគេសំអាតនេះ កោះសន្តិភាពបានទាក់ទងតាមទូរស័ព្ទទៅលោកអុឹម បញ្ញារិទ្ធ ប្រធានមន្ទីរបរិស្ថានខេត្តកែបដែរ តែគ្មានអ្នកលើកឡើយកាលពីរសៀលថ្ងៃទី១៣ ខែមករា នេះ។
ទោះបីជាបែបណា គេឃើញមានក្រុមគ្រួសារសាច់ញាតិរបស់ជនរងគ្រោះមកពីខេត្តឆ្ងាយៗតែងតែដាក់កម្រងផ្កា និងសែនព្រេន ដើម្បីអន្ទងហៅព្រលឹងអ្នកដែលបានបាត់បង់ជីវិតនៅក្រោមគំនរអគាររលំបាក់មួយនេះឱ្យត្រឡប់ទៅស្រុកកំណើតវិញ ៕ (កែសម្រួលដោយ ៖ ធីតា)
ចែករំលែកព័តមាននេះ