ប្រទេសអីុរ៉ង់ ៖ នាយករដ្ឋមន្ត្រីកាណាដា លោកJUSTIN TRUDEAU អះអាងនាថ្ងៃទី៩មករាថា ប្រភពសើុបការណ៍ជាច្រើន ក្នុងនោះមានប្រភពសើុបការណ៍កាណាដាដែរគូសបញ្ជាក់ថា យន្តហោះប៊ូអីុង737ដែលធ្លាក់កាលពីថ្ងៃទី៨មករា នៅជិតទីក្រុងតេហេរ៉ង់ត្រូវបាញ់ធ្លាក់ដោយមីសីុលដី-អាកាស១គ្រាប់ ។
ក្នុងសន្និសីទសារព័ត៌មានមួយលោកTRUDEAU ថ្លែងថា យើងមានព័ត៌មាននានាពីប្រភពជាច្រើនពិសេសប្រភពនៃបណ្ដាសម្ព័ន្ធមិត្តនិងប្រភពរបស់ភ្នាក់ងារយើងផ្ទាល់ដែលគូសបញ្ជាក់ថា យន្តហោះនោះរងការបាញ់មីសីុលដី-អាកាស១គ្រាប់របស់អីុរ៉ង់។ លោកយល់ថា បណ្ដាព័ត៌មានទាំងនេះពង្រឹងភាពចាំបាច់នៃការសើុបអង្កេតដោយសីុជម្រៅមូយលើរឿងនោះ។
គ្រោះមហន្តរាយនេះដែលបណ្ដាលឲ្យមនុស្សស្លាប់១៧៦នាក់ ក្នុងនោះមានជនជាតិកាណាដា៦៣នាក់ កើតមានក្រោយការបាញ់មីសីុលរបស់អីុរ៉ង់មកលើមូលដ្ឋានយោធាទាំងឡាយដែលប្រើប្រាស់ដោយកងទ័ពអាមេរិកនៅអីុរ៉ាក់។
ប្រធានាធិបតីអាមេរិកលោកដូណាល់ត្រាំ កាលពីថ្ងៃទី៩មករា ក៏សម្ដែងការសង្ស័យរបស់លោក លើប្រភពនៃការធ្លាក់យន្តហោះប៊ូអីុងនេះ ខណៈតាមសារព័ត៌មានជាច្រើនថា ផ្នែកសើុបការណ៍អាមេរិកកាន់តែមានការជឿជាក់ដែលយន្តហោះនោះត្រូវបាញ់ធ្លាក់ដោយច្រឡំ។
ចំណែកអ្នកទទួលខុសត្រូវអាកាសចរណ៍សីុវិលអីុរ៉ង់ កាលពីថ្ងៃទី៩មករាបានបដិសេធថា វាមិនអាចទៅរួចទេ ដែលមានការបាញ់មីសីុលច្រឡំត្រូវយន្តហោះនោះធ្លាក់។ លោកអាលីអាបេដហ្សាដេហ៍ថ្លែងថា តាមលក្ខណៈវិទ្យាសាស្ត្រ វាមិនអាចទៅរួចទេ ដែលមីសីុលមួយគ្រាប់ត្រូវយន្តហោះធ្លាក់។
លោកក៏លើកដែរពីពាក្យចចាមអារ៉ាមមិនសមហេតុផលនានា។ ប្រទេសកាណាដា អង់គ្លេស និងសហរដ្ឋអាមេរិកយល់ថា យន្តហោះអ៊ុយក្រែនពិតណាស់ត្រូវបាញ់ធ្លាក់ចៃដន្យដោយមីសីុលដី-អាកាស១គ្រាប់របស់អីុរ៉ង់ ។ គេថាមានដុំភ្លើងមួយ ហោះឡើងក្នុងល្បឿនដ៏លឿន។ រួចមានវីដេអូមួយថតដោយសកម្មជនអីុរ៉ង់ម្នាក់ ហាក់បង្ហាញពេលដែលយន្តហោះអ៊ុយក្រែនរងការវាយប្រហារ ដែលកាណាដានិងអង់គ្លេសថាមីសីុល១គ្រាប់របស់អីុរ៉ង់ ៕
ចែករំលែកព័តមាននេះ