រាជធានីភ្នំពេញ ៖ បន្ទាប់ពីកើតមានភាពមិនប្រកតីជុំវិញការប្រកួតរវាងកីឡាករ សេក គឹមរួន មកពីក្លិបមកុដរាជសីហ៍ និងកីឡាករថៃ រឹទ្ធអៃយ៉ារ៉ា ត.សិលាឆ័យ នៅសង្វៀនស្ថា នីយទូរទស្សន៍ស៊ីអិនស៊ី ក្នុងព្រឹត្តិការណ៍ប្រកួត កីឡាប្រដាល់វគ្គផ្ដាច់ព្រ័ត្រដណ្ដើមយកចំណាត់ ថ្នាក់លេខ១នៃកម្មវិធី «កម្ពុជាសង្វៀនគុនខ្មែរ» កាលពីពរសប្ដាហ៍មុននោះ នៅថ្ងៃសៅរ៍ទី១១ខែមករាខាងមុខនេះ គេទាំង២នាក់នឹងត្រូវប្រកួតតតាំងជម្រះបញ្ជីឱ្យដឹងសខ្មៅជាមួយគ្នាម្ដងទៀត។
គេនៅចាំបានថា កាលពីថ្ងៃសៅរ៍ទី២៨ ខែធ្នូឆ្នាំ២០១៩ គូនេះធ្លាប់បានប្រកួតគ្នាម្ដងរួចមកហើយ ដែលកាលណោះ សេក គឹមរួន ត្រូវបានកីឡាករថៃទាត់ថែមនៅចុងទឹកទី៥ឱ្យដួលសន្លប់ហើយត្រូវបានគណៈកម្មការរៀបចំការប្រកួតសម្រេចមិនប្រកាសលទ្ធផលនោះទេ មូលហេតុដោយសាតែការប្រកួតតាំងពីទឹកទី១រហូតមកនោះ សេក គឹមរួន ត្រូវបានគេមើលឃើញថាចាញ់ពិន្ទុកីឡាករថៃដាច់ទៅហើយ ។ ដូច្នេះហើយ ទើបគណៈកម្មការរៀបចំការប្រកួតលើកពេលឱ្យគេទាំងពីរប្រកួតគ្នាម្ដងទៀត ។
ប៉ុន្តែបើតាមការវាយតម្លៃពីមហាជនអ្នកតាមដានការប្រកួតមួយចំនួន សម្រាប់ការជួបប្រកួតគ្នាលើកនេះ គេក៏មិនរំពឹងថា សេក គឹមរួន អាចយកឈ្នះកីឡាករថៃម្នាក់នេះបានដែរ ព្រោះថាសេក គឹមរួន អត់មានក្បាច់អីពិសេសដើម្បីផ្ដួលកីឡាករថៃម្នាក់នេះបានទេ ។ ម្យ៉ាងវិញទៀតសូម្បីតែកម្លាំងក៏មិនអាចទៅរួចជាមួយគេបានដែរ ។
សម្រាប់អ្នកដែលឈ្នះលេខ១នៅក្នុងសប្ដាហ៍ នេះ នឹងទទួលបានរង្វាន់ម៉ូតូហ្សូ៊ម័រអ៊ិច១គ្រឿង
ប្រាក់រង្វាន់អមចំនួន៥០០ដុល្លារ ហើយបានឡើង ទៅប្រកួតនៅវគ្គផ្ដាច់ព្រ័ត្រជាមួយកីឡាករ ធន់ ចាន់តាក់ មកពីសមាគមកីឡាប្រដាល់ក្រសួង ការពារជាតិ ដែលកំពុងឈររង់ចាំដណ្ដើមប្រាក់រង្វាន់ធំចំនួន៦ពាន់ដុល្លារសហរដ្ឋអាមេរិក ។ រីឯអ្នកលេខ២ ទទួលបានប្រាក់រង្វាន់ចំនួយ២.០០០ដុល្លារ ។
ចំណែកគូប្រកួតអមនៅក្នុងសប្ដាហ៍នេះ កីឡាករ ធឿន ធារ៉ា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃ ណាំខៈបួន តូងប្រាសាទហ៊ីន ក្នុងប្រភេទទម្ងន់៦៩គីឡូក្រាម ។ កីឡាករ អេលីត ចំរើន មកពីក្លិបប៉ែនកាក់គុនខ្មែរ ប្រកួតជាមួយកីឡាករ ថៃ ភូតាក់វ៉ាន់ បេឡេបូរីរាំ ក្នុងប្រភេទទម្ងន់៥៧គីឡូក្រាម ។
ឯគូប្រកួតបើកឆាក កីឡាករ សោម ពិសិដ្ឋ មកពីក្លិបអេភូថងកីឡា ប្រកួតជាមួយកីឡាករ សឿន ឆ្នើម មកពីក្លិបកងពល តូចពិសេសឆត្រយោង៩១១ ៕ (កែសម្រួលដោយ ៖ បុប្ផា)
ចែករំលែកព័តមាននេះ