កូរ៉េខាងត្បូង ៖ តាមប្រភពព័ត៌មាន Reuters បានឱ្យដឹងថា ប្រទេសកូរ៉េខាងត្បូងបានជម្រុញឱ្យប្រជាពលរដ្ឋរបស់ខ្លួនចាក់វ៉ាក់សាំងគ្រុនផ្តាសាយតាមរដូវកាល ដើម្បីអាចសម្រាលបន្ទុកដល់ប្រព័ន្ធសុខាភិបាលដែលកំពុងតែក្រពុលមុខនឹងជំងឺកូវីដ។
ការព្រួយបារម្ភជាសាធារណៈចំពោះសុវត្ថិភាពនៃវ៉ាក់សាំងផ្តាសាយបានកើនឡើង បន្ទាប់ពីមនុស្សយ៉ាងតិច ៥៩នាក់បានបាត់បង់ជីវិតក្នុងខែនេះបន្ទាប់ពីការចាក់វ៉ាក់សាំង ខណៈដែលខែមុនប្រហែល ៥លានដូសត្រូវបានគេបោះបង់ចោល ដោយសារមិនបានរក្សាទុកនៅសីតុណ្ហភាពដែលបានណែនាំ។
អាជ្ញាធរបាននិយាយថា ពួកគេមិនបានរកឃើញទំនាក់ទំនងដោយផ្ទាល់រវាងការបាត់បង់ជីវិត និងវ៉ាក់សាំងប្រឆាំងនឹងជំងឺផ្តាសាយទេ។ លោកប្រធានាធិបតី Moon Jae-in បានមានប្រសាសន៍ថា៖ «ជឿទុកចិត្តលើការសន្និដ្ឋានរបស់អាជ្ញាធរសុខាភិបាល ដែលបានពិនិត្យឡើងវិញជាមួយអ្នកជំនាញ»។
លោកបានប្រាប់កិច្ចប្រជុំមួយថា៖ «មានតម្រូវការចាំបាច់ដើម្បីពង្រីកការចាក់វ៉ាក់សាំងផ្តាសាយធំនៅឆ្នាំនេះ មិនត្រឹមតែដើម្បីការពារជំងឺផ្តាសាយប៉ុណ្ណោះទេ ប៉ុន្តែថែមទាំងទប់ស្កាត់ការឆ្លងក្នុងពេលដំណាលគ្នា និងការរីករាលដាលនៃជំងឺផ្តាសាយ និងជំងឹកូវីដ»។
ក្រសួងសុខាភិបាលបាននិយាយថា អត្ថប្រយោជន៍នៃការចាក់វ៉ាក់សាំងមានច្រើនជាងផលប៉ះពាល់ផ្សេងៗ៕
ចែករំលែកព័តមាននេះ