រាជធានីភ្នំពេញ ៖ សម្តេចតេជោ ហ៊ុន សែននាយករដ្ឋមន្ត្រីបានប្រកាសថា រដ្ឋនឹងយកក្រុមហ៊ុនស៊ិនទ្រី ដែលជាក្រុមហ៊ុនប្រមូលសំរាមមកវិញ តែការដកសិទ្ធិយកមកគ្រប់គ្រងនេះមិនឲ្យក្រុមហ៊ុនខាតនោះទេ ។ សម្តេចតេជោបានថ្លែងបែបនេះក្នុងពិធីប្រគល់សញ្ញាបត្រដល់និស្សិតសាកលវិទ្យាល័យបៀលប្រាយ នាព្រឹកថ្ងៃទី២២ ខែតុលា ថា «រឿងស៊ិនទ្រីនេះខ្ញុំចង់និយាយបន្តិច ។ សម្តេចបានបញ្ជាដល់លោកអភិបាលរាជធានីថា ពេលត្រឡប់ទៅវិញ ឃួង ស្រេង អភិបាលក្រុង ទៅពិភាក្សាជាមួយលោកប៉ា សុជាតិវង្ស ប្រធានក្រុមប្រឹក្សា ។ខ្ញុំឲ្យជាយោបល់រួចហើយខ្ញុំឲ្យការងារហ្នឹងដោយប្រជុំនៅគណៈរដ្ឋមន្ត្រី» ។
សម្តេចគូសបញ្ជាក់ថា «ក្រុមហ៊ុនស៊ិនទ្រីបានចុះហត្ថលេខាតាំងពីជំនាន់សំរាមមានក្នុងមួយថ្ងៃមានប្រហែលពី៣០០ទៅ៥០០តោន ហើយទំហំក្រុងភ្នំពេញនោះមានតែជាង៣០០គីឡូម៉ែត្រការ៉េទេ ! ឥលូវនេះសំរាមបានកើនឡើងជាង៣០០០តោនក្នុងមួយថ្ងៃ និងទំហំទីក្រុងកើនឡើងប្រមាណជាង៦០០គីឡូម៉ែត្រការ៉េ ។ អីញ្ចឹងបើទុកឲ្យក្រុមហ៊ុនស៊ិនទ្រីគ្រប់គ្រងតែឯង អត់ទៅរួចទេ ! ដាច់ទៅមិនរួច វៃងាប់ក៏ទៅមិនរួចដែរ»។
សម្តេចបានបន្តថាខ្ញុំបានចុះហត្ថលេខាឲ្យបង្កើតកន្លែងចាក់សំរាម៣ផ្សេងទៀត អត់ទាន់ចេញទេ សូម្បីបន្តិច ។ នៅកៀនស្វាយ នៅអង្គស្នួល និងមួយកន្លែងទៀតក៏មិនទាន់ឃើញដំណើរការដែរ បើមិនបែងចែកគឺមិនដំណើរការទេ ។
ប្រមុខរាជរដ្ឋាភិបាលក៏បានលើកឡើងថាបើទុកឲ្យក្រុមហ៊ុនស៊ិនទ្រីបន្តទៀត គឺមិនបានទេ ។ អីញ្ចឹងជម្រើសត្រូវបែងចែកជាតំបន់ ហើយឲ្យមានក្រុមហ៊ុនយ៉ាងតិច៣ តែត្រូវមានក្រុមហ៊ុន៤នៅប្រមូលសំរាមនៅក្នុងទីក្រុងភ្នំពេញ ។ កុំឲ្យមានតែក្រុមហ៊ុនស៊ិនទ្រីតែមួយ ។ បើក្រុមហ៊ុនមិនកំរើកដៃនោះសំរាមនៅក្នុងក្រុងគពេញ ។ សម្តេចតេជោថ្លែងថា «អីញ្ចឹងវិធីមួយដែលខ្ញុំនឹងដាក់ឲ្យនៅពេលខាងមុខ ដើម្បីកុំឱ្យក្រុមហ៊ុនស៊ិនទ្រីមានការខាតបង់ត្រូវយកក្រុមហ៊ុន នឹងមកវិញសិន ទាំងបុគ្គលិក និងអ្វីៗទាំងអស់ ដោយទូទាត់ឲ្យក្រុមហ៊ុនស៊ិនទ្រី ហើយរដ្ឋត្រូវកាន់កាប់ក្រុមហ៊ុននឹងសិន ។ ឥឡូវក្រុមហ៊ុនស៊ិនទ្រីមានឡានប៉ុន្មាន ?
បុគ្គលិកប៉ុន្មាន យើងយកមកគ្រប់គ្រងសិន បន្ទាប់មកយើងរៀបចំតំបន់ដាក់ឲ្យដេញថ្លៃ»។សម្តេចក៏បានលើកឡើងត្រូវរៀបចំជាតំបន់ៗដើម្បីដាក់ដេញថ្លៃ បើក្រុមហ៊ុនណាចង់បានត្រូវចូលរូួមដេញថ្លៃ រាប់ទាំងក្រុមហ៊ុនស៊ិនទ្រីក៏មានសិទ្ធិចូលរួមដេញថ្លៃដែរ ប៉ុន្តែមិនអាចឲ្យក្រុម ហ៊ិនស៊ិនទ្រីគ្រប់គ្រងពេញមួយក្រុងភ្នំពេញទេ ។ សម្តេចក៏បានលើកឡើងថា ក្រុមហ៊ុនមួយអនុញ្ញាតឲ្យតែមួយកន្លែងនោះទេ បើមិនដូច្នេះទេ នៅតែឮថ្នូរថាក្រុមហ៊ុនស៊ិនទ្រីៗ មិនប្រមូលសំរាម ។ យ៉ាងណាយើងមិនឲ្យក្រុមហ៊ុនស៊ិនទ្រីខាតទេ ។
ជាមួយគ្នានោះដែរសម្តេចក៏បានគូសបញ្ជាក់ថា «កន្លែងដែលរាជរដ្ឋាភិបាលអនុញ្ញាតឲ្យចាក់សំរាម៣កន្លែងមិនបានដំណើរការដោយសារកង្វះទុន និងពិបាកទ្រទ្រង់សភាពការណ៍មិនមានភាពងាយស្រួលទេ ។ អីញ្ចឹងខ្ញុំគិតថាចាំត្រូវមានអន្តរកាលមួយ ដោយយកក្រុមហ៊ុននឹងត្រឡប់មកចូលរដ្ឋ ដោយទិញយកទាំងសំភារៈ និងអ្វីៗទាំងអស់យកមកគ្រប់គ្រងសិន(រដ្ឋ) ឬសាលាក្រុងគ្រប់គ្រងសិន ។
បន្ទាប់ពីនឹងយើងដាក់ចែកជាខណ្ឌ មូយតំបន់» ។សម្តេចលើកឡើងទៀតថានៅក្នុងរាជធានីភ្នំពេញ ត្រូវចែកជា៤តំបន់សម្រាប់ក្រុមហ៊ុន ប្រមូលសំរាមដើម្បីឲ្យក្រុមហ៊ុនចូលដេញថ្លៃ ។ ក្រុមហ៊ុនមូួយអនុញ្ញាតឲ្យចេញថ្លៃតែមួយតំបន់ទេ មិនអាចទៅឃុបឃិតគ្នាទៅបង្កើតជាសម្ព័ន្ធក្រុមហ៊ុន រួចហើយយកវិញទាំងអស់នោះទេ គឺមិនអាចទេ ។
សូមបញ្ជាក់ថាក្រុមហ៊ុនស៊ីនទ្រី គឺជាក្រុមហ៊ុនប្រមូលសំរាមមួយ ដែលបានធ្វើប្រតិបត្តិការប្រមូលសំរាម និងសម្អាតទីក្រុងភ្នំពេញចាប់តាំងពីទសវត្សរ៍ឆ្នាំ៩០មកម្ល៉េះ ខណៈដែលក្រុមហ៊ុនប្រមូលសំរាមជាច្រើនបានបរាជ័យជាបន្តបន្ទាប់ ក្នុងការប្រមូលសំរាមនៅក្នុងទីក្រុង ដែលប្រជាពលរដ្ឋនៅមិនទាន់យល់ដឹងច្បាស់លាស់ពីបញ្ហាអនាម័យនិងបរិស្ថាន ។ ក្រុមហ៊ុនស៊ីនទ្រី តែងរងនូវការរិះគន់ មិនលស់ថ្ងៃពីការយឺតយ៉ាវនៃការប្រមូលសំរាមតាមលំនៅឋាន ជាពិសេសនៅពេលមានបុណ្យទានម្តងៗដោយបុគ្គលិកប្រមូលសម្រាមមួយចំនួនបានឈប់សម្រាកធ្វើឲ្យស្ទះនិរន្តរភាពការងារ ។
ក៏ប៉ុន្តែការសម្រេចរបស់ប្រមុខរដ្ឋាភិបាលនៅពេលនេះ ដែលតម្រូវឲ្យមានក្រុមហ៊ុនច្រើន ចូលរួមធ្វើការងារនេះ ត្រូវគេមើលឃើញថាជាដំណោះស្រាយថ្មីមួយដែលសង្ឃឹមថា នឹងអាចជួយដោះស្រាយបញ្ហាសំរាមនៅក្នុងទីក្រុងភ្នំពេញបានយ៉ាងមានប្រសិទ្ធភាព ពិសេសតាមដងផ្លូវនានាដែលមានសំរាមត្រូវបានគេបោះចោលយ៉ាងឥតសណ្តាប់ធ្នាប់ ។បញ្ហាសំរាមបច្ចុប្បន្នកំពុងធ្វើឱ្យបរិស្ថានក្នុងរាជធានីក្រៅតែពីតំបន់មានផ្លូវធំៗឆ្លងកាត់ គឺពោរពេញទៅដោយសំរាម ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ