រាជធានីភ្នំពេញ ៖ កម្លាំងនគរបាលនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានធ្វើការបណ្តេញជនជាតិចិនទាំងប្រុសទាំងស្រីសរុបជាង១៥០នាក់ ចេញពីប្រទេសកម្ពុជាឲ្យវិលត្រឡប់ទៅប្រទេសកំណើតវិញ ។ ដែលជនជាតិចិនទាំងអស់នេះ បានចូលមកស្នាក់នៅ និងធ្វើការខុសច្បាប់ ជាពិសេសភាគច្រើនប្រព្រឹត្តបទល្មើសជំរិតទារប្រាក់តាមប្រព័ន្ធអ៊ីនធឺណេតតែម្ដង ។…
រាជធានីភ្នំពេញ ៖ កម្លាំងនគរបាលនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានធ្វើការបណ្តេញជនជាតិចិនទាំងប្រុសទាំងស្រីសរុបជាង១៥០នាក់ ចេញពីប្រទេសកម្ពុជាឲ្យវិលត្រឡប់ទៅប្រទេសកំណើតវិញ ។ ដែលជនជាតិចិនទាំងអស់នេះ បានចូលមកស្នាក់នៅ និងធ្វើការខុសច្បាប់ ជាពិសេសភាគច្រើនប្រព្រឹត្តបទល្មើសជំរិតទារប្រាក់តាមប្រព័ន្ធអ៊ីនធឺណេតតែម្ដង ។
ការបញ្ជូនជនជាតិចិនទាំងនោះធ្វើឡើង កាលពីវេលាម៉ោង៩ព្រឹក ថ្ងៃទី២៨ ខែសីហានេះ តាមច្រកទ្វារអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។ អគ្គនាយកដ្ឋានអន្តោប្រវេសន៍ខាងលើពុំបានផ្ដល់របាយការណ៍ជាក់លាក់ឲ្យដឹងនោះទេ ប៉ុន្តែបើតាមប្រភពព័ត៌មានបានឲ្យដឹងថា ជនជាតិចិនដែលត្រូវបណ្ដេញចេញពីប្រទេសកម្ពុជានាពេលនោះមានចំនួនជាង១៥០នាក់ ក្នុងនោះមានទាំងប្រុស និងស្រីដែលត្រូវបានបញ្ជូនតាមជើងយន្តហោះ ពិសេសរបស់ប្រទេសចិនចំនួន២គ្រឿង ។ ព្រមទាំងមានប៉ូលិសចិនច្រើននាក់មកទទួលយកផងដែរ ហើយក្នុងចំណោមជនអន្តោប្រវេសន៍ទាំងជាង១៥០នាក់នោះមានស្ត្រីចំនួន១២នាក់ ។
ប្រភពដដែលបានបន្តថា អ្នកទាំងនោះបានចូលមកស្នាក់នៅធ្វើការងារដោយខុសច្បាប់នៅក្នុងប្រទេសកម្ពុជាហើយភាគច្រើន គឺជាក្រុមប្រព្រឹត្តបទល្មើសជម្រិតទារប្រាក់តាមប្រព័ន្ធអ៊ីនធឺណេត ហើយត្រូវបានខាងកម្លាំងនគរបាលនាយកដ្ឋានស៊ើបអង្កេត និងអនុវត្តិន៍នីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ។ សហការជាមួយកម្លាំងនគរបាលសាធារណរដ្ឋប្រជាមានិតចិនស្រាវជ្រាវបង្ក្រាបចាប់ខ្លួនបានកន្លងមកនៅក្រុងបាវិត ខេត្តស្វាយរៀង និងនៅក្រុងព្រះសីហនុ កាលពីពេលកន្លងមកនេះ ។
ប្រភពខាងលើបានបញ្ជាក់ថា កងកម្លាំងបានដឹកជនអន្តោប្រវេសន៍ជនជាតិចិនទាំងនោះតាមរថយន្តក្រុងចំនួន៤គ្រឿង ចេញពីអគ្គនាយកដ្ឋានអន្តោប្រវេសន៍ចូលទៅកាន់អាកាសយានដ្ឋានអន្តរជាតិភ្នំពេញ ។ លុះក្រោយពេលធ្វើពិធីប្រគល់ទទួលរួចប៉ូលិសចិនបាននាំជនទាំងនេះឡើងយន្តហោះ ពិសេស២គ្រឿងដែលរង់ចាំជាស្រេច ហើយនេះ គឺជាចំណាត់ការរបស់សមត្ថកិច្ចនៃប្រទេសកម្ពុជាយើងដែលមិនអនុញ្ញាតឲ្យជនបរទេសណាមករស់នៅដោយខុសច្បាប់ទាំងការដឹងហើយមិនបង្ក្រាបនោះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ