រាជធានីភ្នំពេញ ៖ ព្រឹត្តិការណ៍រត់ ប្រណាំងម៉ារ៉ាតុងចក្រភពខ្មែរលើកទី៦នៅមុខទីលានប្រាសាទអង្គរវត្តកាលពីព្រឹកថ្ងៃអាទិត្យទី៤ សីហា ឆ្នាំ២០១៩ មានអ្នកចូលរួមចំនួន៣.៥០០នាក់ ក្នុងនោះភ្ញៀវបរទេស១.៥៨៤នាក់មកពី៥០ប្រទេស ។ ចំនួននេះមានការកើនឡើង១៥%បើប្រៀបធៀបកាលពីឆ្នាំ២០១៨។…
រាជធានីភ្នំពេញ ៖ ព្រឹត្តិការណ៍រត់ ប្រណាំងម៉ារ៉ាតុងចក្រភពខ្មែរលើកទី៦នៅមុខទីលានប្រាសាទអង្គរវត្តកាលពីព្រឹកថ្ងៃអាទិត្យទី៤ សីហា ឆ្នាំ២០១៩ មានអ្នកចូលរួមចំនួន៣.៥០០នាក់ ក្នុងនោះភ្ញៀវបរទេស១.៥៨៤នាក់មកពី៥០ប្រទេស ។ ចំនួននេះមានការកើនឡើង១៥%បើប្រៀបធៀបកាលពីឆ្នាំ២០១៨។
លោកបណ្ឌិត ថោង ខុន រដ្ឋមន្ត្រីក្រសួង ទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាបានមានប្រសាសន៍ថា សម្រាប់ព្រឹត្តិការណ៍មួយនេះពីមួយឆ្នាំទៅមួយឆ្នាំទទួលបានការគាំទ្រយ៉ាងខ្លាំងពីសំណាក់ភ្ញៀវទេសចរ បរទេស ខណៈជនជាតិកម្ពុជាមានចំនួន១៩១៦នាក់កើនឡើងប្រមាណ១០ភាគរយបើធៀបទៅនឹងឆ្នាំ២០១៨ កន្លងមក ។ លោកសង្ឃឹមថា នៅក្នុងឆ្នាំ២០២០នឹងមានអ្នកមកចូលរួមកាន់តែច្រើនឡើង។
លោក សែម ផល្លា មន្ត្រីបច្ចេកទេសរៀបចំការប្រកួតបានមានប្រសាសន៍ថា សម្រាប់ទិវារត់ប្រណាំងម៉ារ៉ាតុងចក្រភពខ្មែរលើកទី៦នេះ លោកសប្បាយចិត្តយ៉ាងខ្លាំងនៅពេលបានឃើញប្រជាពលរដ្ឋខ្មែរចូលរួមរត់ចម្ងាយឆ្ងាយ ក្នុងនោះរត់ចម្ងាយ៤២គីឡូម៉ែត្រមានអត្តពលិកខ្មែរចូលរួមរត់៣៦នាក់ និង២១គីឡូម៉ែត្រមានជាង១០០នាក់។
សម្រាប់វិញ្ញាសាដែលបានដាក់ឱ្យប្រកួតរត់ចម្ងាយ៤២គីឡូម៉ែត្រ រត់ចម្ងាយ២១គីឡូម៉ែត្រ រត់ចម្ងាយ១០គីឡូម៉ែត្រ និងរត់កំសាន្តលក្ខណៈគ្រួសារចម្ងាយ៣គីឡូម៉ែត្រ ។ រីឯលទ្ធផលរត់ចម្ងាយ៤២គីឡូម៉ែត្រផ្នែកនារីលេខ១បានទៅលើកីឡាការិនីចិនឈ្មោះSHN Hong xia លេខ២បានទៅលើកីឡាការិនីជប៉ុនឈ្មោះ YamAMOTO Mari និងលេខ៣បានទៅលើកីឡាការិនីជប៉ុនYamamoto Eri ។
ផ្នែកបុរសលេខ១បានទៅលើកីឡាករជប៉ុន Takizaki Kuniaki លេខ២បានទៅលើកីឡាករជប៉ុន Yoneda michiyo និងលេខ៣បានទៅលើកីឡាករអាមេរិកGruber Tim។
លទ្ធផលរត់ចម្ងាយ២១គីឡូម៉ែត្រផ្នែកនារីបានទៅលើកីឡាការិនីជប៉ុនទាំងអស់ លេខ១កីឡាការិនីTanimara Yuko លេខ២កីឡាការិនីSASAKI Natsuke និងលេខ៣កីឡាការិនីMashita Mieko។ ផ្នែកបុរសលេខ១បានទៅលើកីឡាករជប៉ុនYamauchi Daisukeលេខ២បានទៅលើកីឡាករកម្ពុជា ម៉ា វីរ៉ូនិងលេខ៣កីឡាករអង់គ្លេសDavid George។
លទ្ធផលរត់ចម្ងាយ១០គីឡូម៉ែត្រផ្នែកនារីលេខ១ បានទៅលើកីឡាការនីអាមេរិក Gernin Michlle លេខ២បានទៅលើកីឡាការិនីជប៉ុន Konishi Mosako និងលេខ៣បានទៅលើកីឡាការិនីអង់គ្លេសVogel Sophie។ ផ្នែកបុរស លេខ១បានទៅលើកីឡាករកម្ពុជា ឡៃ តេរ៉ង់ លេខ២បានទៅលើកីឡាករកម្ពុជា វ៉ាន់ ភារ៉ា និងលេខ៣បានទៅលើកីឡាករអាមេរិកVishnevsky Mark៕ (កែសម្រួលដោយ ៖ បុប្ផា)
ចែករំលែកព័តមាននេះ