ខេត្តសៀមរាប៖ បង្កាន់ដៃនាគលម្អដោយអសុរ និងទេវតានៅខ្លោងទ្វារដីឆ្នាំង បានដំណើរការបើកការដ្ឋានជួសជុលកាលពីព្រឹកថ្ងៃទី២៤ ខែមិថុនា ឆ្នាំ២០១៩ ក្រោយពីទទួលបានអនុសាសន៍សម្រេចពីកិច្ចប្រជុំអាយស៊ីស៊ី-អង្គរ ។
យោងតាមផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថាក្នុងពិធីក្រុងពលីបើកការដ្ឋានជួសជុល លោកគឹម សុធិន អគ្គនាយករងទទួលបន្ទុកនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ឱ្យដឹងថា កន្លែងសំខាន់ដែលត្រូវជួសជុលមានរូបទេវតា៥អង្គ និងរូបយក្សកាន់ក្បាលនាគនៅផ្នែកខាងមុខដែលផ្អៀងគ្រឹះស្រុតដោយសារទឹកភ្លៀងហូរច្រោះដី ទើបតម្រូវឱ្យមានការជួសជុលព្រោះមានហានិភ័យខ្ពស់ ។ ដើម្បីចៀសវាងការដួលរលំ អ្នកជំនាញត្រូវរើពង្រឹងគ្រឹះ និងរៀបរូបឱ្យរឹងមាំ មានជំហរត្រង់ឡើងវិញ ។ ម្យ៉ាងទៀតក្បាលនាគនេះធ្លាប់ដួលរួចម្តងហើយ ព្រោះវាខុសពីជំនាន់បារាំង ។
គម្រោងនេះនឹងបញ្ចប់ក្នុងរយៈពេល១ឆ្នាំ ចំណាយប្រាក់របស់មូលនិធិអភិរក្សអង្គរ ជួសជុលដោយនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ។
លោកឃាម មុនី ស្ថាបត្យករនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងជាប្រធានគម្រោងជួសជុលបានឱ្យដឹងថា បង្កាន់ដៃនាគលម្អដោយអសុរ និងទេវតានៅខ្លោងទ្វារដីឆ្នាំងមានប្រវែង១១២ម៉ែត្រ រងការខូចខាតដោយសារកត្តាមនុស្ស ភាពជាប់មាំរបស់សម្ភារហួសកាលកំណត់ អាយុកាលនៃថ្ម អាកាសធាតុ និងរុក្ខជាតិជាដើម ។ ម្យ៉ាងទៀត បើតាមរយៈរូបភាពថតមុនឆ្នាំ១៩៣៩ ចម្លាក់ទាំងនេះគឺដួលទាំងអស់ គ្មានរូបរាងជាជួរអ្វីឡើយ ហើយត្រូវបានបារាំងជួសជុលរួចរាល់នៅឆ្នាំ១៩៤៤ ។
បន្ថែមពីនោះលោកប្រធានគម្រោងរូបនេះ ក៏បានឱ្យដឹងពីមូលហេតុសំខាន់ដែលត្រូវជួសជុលអសុរ ព្រោះចម្លាក់នេះទ្រេត ហើយក្បាលនាគបានធ្លាក់អស់ ។ ចំណែកទេវតា៥អង្គ គឺប្រឈមខ្លាំងនឹងការរលំដួល រីឯស៊ីម៉ង់តិ៍ដែលជាបាយអរបេះចេញពីសំណង់ពុកផុយអស់សុពលភាព។ ដូច្នេះក្រុមការងារនឹងរៀបចំជួសជុលសាឡើងវិញ ព្រមទាំងរៀបប្រព័ន្ធបង្ហូរទឹក កុំឱ្យវាដក់ឬហូរច្រោះដី និងស្វែងរកថ្មចាស់មកបំពេញកន្លែងបាត់បង់ ឱ្យត្រឹមត្រូវតាមលំនាំដើម ដូចសម័យបារាំងបានជួសជុលរួចនាឆ្នាំ១៩៤៤ ៕ (កែសម្រួលដោយ ៖ បុប្ផា)
ចែករំលែកព័តមាននេះ