រាជធានីភ្នំពេញ ៖ «នំបញ្ចុកខ្មែរ» ដែលប្រជាពលរដ្ឋទទួលទានរួមគ្នានៅទូទាំងប្រទេសនោះ ត្រូវបានជ្រើសរើសជាម្ហូបអត្តសញ្ញាណជាតិខ្មែរដ៏សំខាន់បំផុត ក្នុងព្រឹត្តិការណ៍ពិព័រណ៍ម្ហូបអាហារឬហៅថា Conference on Gastro nomy ដែលនឹងប្រារព្ធធ្វើនាអំឡុងខែកញ្ញា ឆ្នាំ២០១៩ខាងមុខ ។ នេះ
បើតាមការថ្លែងរបស់លោក ថោង ខុន រដ្ឋមន្ត្រីក្រសួងទេសចរណ៍ កាលពីពេលថ្មីៗនេះ ។
លោករដ្ឋមន្ត្រីបានថ្លែងយ៉ាងដូច្នេះថា ដោយឡែក នៅក្នុងព្រឹត្តិការណ៍ពិព័រណ៍ម្ហូបអាហារ(Conference on Gastronomy) នោះ យើងនឹងបង្ហាញមុខម្ហូបអាហារខ្មែរ ក្នុងនោះយើងកំណត់យកនំបញ្ចុកជាធំ ជាម្ហូបតំណាងឱ្យអត្ត សញ្ញាណជាតិខ្មែរ ។ ក្រៅពីនោះមានម្ហូបអាហារ ខ្មែរមួយចំនួនទៀតដូចជាសម្លម្ជូរគ្រឿង អាម៉ុក បង្អែមត្នោតជាដើម ។
លោករដ្ឋមន្ត្រីបានបញ្ជាក់ទៀតថា នៅខែសីហាខាងមុខនេះ ក្រសួងទេសចរណ៍នឹងរៀប ចំសិក្ខាសាលាមួយស្ដីពីពិព័រណ៍ម្ហូបអាហារនេះ។ ពិព័រណ៍ម្ហូបអាហារ( Conference on Gastrono my) នេះមិនមែនត្រឹមតែដាក់តាំងម្ហូបអាហារប៉ុណ្ណោះទេ ថែមទាំងមានការបង្ហាញពីរបៀបចម្អិនម្ហូបអាហារ បច្ចេកទេសនៃការធ្វើឱ្យរសជាតិឈ្ងុយឆ្ងាញ់ អនាម័យផលប្រយោជន៍ចំពោះសុខភាព ក៏ដូចជាសោ ភ័ណភាពនៅលើមុខម្ហូបនីមួយៗថែមទៀត ។
លោករដ្ឋមន្ត្រី ថោង ខុន បានឲ្យដឹងទៀតថា Conference on Gastronomy នេះក៏ជា ផលិតផលទេសចរណ៍ដ៏សំខាន់មួយស្ថិតនៅក្នុង ចង្កោម«ទេសចរណ៍វប្បធម៌» ផងដែរ ដែល ជាទិសដៅនយោបាយទេសចរណ៍មួយកំណត់ ដោយអង្គការទេសចរណ៍ពិភពលោក (UNWTO) ពីព្រោះម្ហូបអាហារក៏ជាវប្បធម៌របស់ប្រទេសនីមួយៗ ដែលភ្ញៀវទេសចរទូទាំងពិភព លោកតែងតែនិយមចូលចិត្ត និងចង់ដឹង ចង់
ស្គាល់ ចង់ភ្លក្សនូវរសជាតិម្ហូបអាហារទាំងនោះ។
លោករដ្ឋមន្ត្រីបានអះអាងថា នៅលើពិភពលោក ទេសចរណ៍និងម្ហូបអាហារនេះ គឺពិតជាមានសក្ដានុពលធំធេងណាស់ ហើយក៏ជានិន្នាការថ្មីដ៏សំខាន់របស់ភ្ញៀវទេសចរផងដែរ ។ ចំពោះការរៀបចំព្រឹត្តិការណ៍ពិព័រណ៍ម្ហូបអាហារនាអំឡុងខែកញ្ញា ឆ្នាំ២០១៩នេះ គឺធ្វើឡើងដើម្បីបង្ហាញពីមុខម្ហូបអត្តសញ្ញាណជាតិខ្មែរទៅដល់ភ្ញៀវទេសចរនានា ពិសេសគឺភ្ញៀវទេសចរអន្តរជាតិ និងដើម្បីផ្សព្វផ្សាយពីផលិតផលទេសចរណ៍
កម្ពុជាទៅកាន់ទីផ្សារទេសចរណ៍ពិភពលោក សំដៅរួមចំណែកទាក់ទាញកំណើនភ្ញៀវទេសចរអន្តរជាតិឱ្យមកទស្សនាកម្ពុជាបន្ថែមទៀត ៕ (សម្រួលដោយ៖ ស្រីណា)
ចែករំលែកព័តមាននេះ