រាជធានីភ្នំពេញ ៖ ក្រសួងការពារជាតិកាលពីថ្ងៃទី៤ មេសា បានប្រកាសថ្កោលទោសនិងចាត់វិធានការតាមច្បាប់ចំពោះក្រុមជនទុច្ចរិត ដែលបានប្រើប្រាស់រូបភាពរបស់នាយទាហានជាន់ខ្ពស់នៃក្រសួងការពារជាតិ បង្ហោះក្នុងបណ្តាញសង្គមក្នុងការវាយប្រហារមកលើរាជរដ្ឋាភិបាលស្របច្បាប់ និងបានអំពាវនាវដល់កង ទ័ពឱ្យមានការប្រុងប្រយ័ត្នខ្ពស់រាល់ការប្រើប្រាស់បណ្តាញសង្គមផ្ទាល់ ។…
រាជធានីភ្នំពេញ ៖ ក្រសួងការពារជាតិកាលពីថ្ងៃទី៤ មេសា បានប្រកាសថ្កោលទោសនិងចាត់វិធានការតាមច្បាប់ចំពោះក្រុមជនទុច្ចរិត ដែលបានប្រើប្រាស់រូបភាពរបស់នាយទាហានជាន់ខ្ពស់នៃក្រសួងការពារជាតិ បង្ហោះក្នុងបណ្តាញសង្គមក្នុងការវាយប្រហារមកលើរាជរដ្ឋាភិបាលស្របច្បាប់ និងបានអំពាវនាវដល់កង ទ័ពឱ្យមានការប្រុងប្រយ័ត្នខ្ពស់រាល់ការប្រើប្រាស់បណ្តាញសង្គមផ្ទាល់ ។
យោងតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិកាលពីថ្ងៃទី៤មេសា ឆ្នាំ២០១៩ បានបញ្ជាក់ថា នាពេលថ្មីៗនេះមានជនទុច្ចរិតមួយចំនួនបានបង្កើត Facebookបន្លំយករូបនាយទាហានមួយចំនួនទៅប្រើប្រាស់ដើម្បីបង្ហោះរូបភាព និងខ្លឹមសារញុះញង់វាយប្រហារលើរាជរដ្ឋាភិបាលកម្ពុជា ។
លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិបានបញ្ជាក់ថា៖ក្រសួងការពារជាតិបានចាត់ទុកថាសកម្មភាពទាំងនេះជាអំពើខុសច្បាប់ ដែលមិនអាចអត់ឱនឲ្យបានទេ ហើយសូមស្នើឱ្យស្ថាប័នមានសមត្ថកិច្ចចាត់វិធានតាមផ្លូវច្បាប់ឱ្យបានម៉ឺងមាត់បំផុត ។
អ្នកនាំពាក្យ ក្រសួងការពារជាតិក៏បានប្រកាសដល់កងយោធពលខេមរភូមិន្ទសូមរក្សាជំហរស្មោះត្រង់ការពាររាជរដ្ឋាភិបាលស្របច្បាប់និងសុខសន្តិភាពរបស់ប្រជាពលរដ្ឋ ។ កងយោធពលខេមរភូមិន្ទប្រឆាំងដាច់ខាតចំពោះការប៉ុនប៉ងបង្កភាពវឹកវរដល់សង្គម ក៏ដូចជាការបំផ្លិចបំផ្លាញដល់សន្តិភាពរបស់ប្រទេស ។
អ្នកនាំពាក្យក្រសួងការពារជាតិដដែលបានអំពាវនាវផងដែរ ដល់កងយោពលខេមរភូមិន្ទទាំងអស់មាន ការប្រុងប្រយ័ត្នក្នុងការប្រើប្រាស់បណ្តាញសង្គមនានា ដោយរក្សាការពារសន្តិសុខ ការងាររសម្ងាត់របស់អង្គភាព ។ សូមអំពាវនាវដល់ប្រជាពលរដ្ឋទាំងអស់ ត្រូវមានទំនុកចិត្តលើកងយោធពលខេមរភូមិន្ទ សូមកុំចាញ់ឧបាយកលក្រុមទុច្ចរិតទាំងនោះឲ្យសោះ ។
លោកនាយឧត្តមសេនីយ៍បន្តថា មានគណនីហ្វេសប៊ុកមួយចំនួនកាលពីថ្ងៃទី៤ មេសាបានយករូបភាពនាយទាហានថ្នាក់ឧត្តមសេនីយ៍ទៅបង្ហោះក្នុងហ្វេសប៊ុករបស់ពួកគេ ។ ដោយលោកសូមឲ្យកងទ័ពមានការប្រុងប្រយ័ត្នខ្ពស់ចំពោះការប្រើប្រាស់បណ្តាញសង្គមហ្វេសប៊ុករបស់ខ្លួននិងការពារប្រព័ន្ធសុវត្ថិភាពកុំឲ្យឧក្រិដ្ឋជនលួចយកទៅប្រើប្រាស់វាយប្រហារមកលើរាជរដ្ឋាភិបាល ។ លោកបញ្ជាក់ថា កងទ័ពនៅតែមានស្វាមីភ័ក្ត្រចំពោះថ្នាក់ដឹកនាំ ជាពិសេសសម្តេចតេជោ ហ៊ុន សែន នាយករដ្ឋមន្ត្រី ។
លោកថា ក្រសួងការ ពារជាតិប្រឆាំងដាច់ខាតចំពោះឧក្រិដ្ឋជននិងថ្កោលទោស ។ គ្មានកងទ័ពណាដែលមានហេតុផលទៅវាយប្រហាររាជរដ្ឋាភិបាលនោះទេ តែកងទ័ពត្រូវការពាររាជរដ្ឋាភិបាលស្របច្បាប់ និងសមិទ្ធផលនានារបស់ជាតិនិងប្រជាពលរដ្ឋ ។
ចែករំលែកព័តមាននេះ