ខេត្តកំពត ៖ រដ្ឋបាលខេត្តកំពតបានរៀបចំពិធីសំណេះសំណាល ដើម្បីអបអរសាទរខួបអនុស្សាវរីយ៍លើកទី១០៨ ទិវាអន្តរជាតិនារី ៨មីនា ឆ្នាំ២០១៩ ក្រោមប្រធានបទ«លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស»…
ខេត្តកំពត ៖ រដ្ឋបាលខេត្តកំពតបានរៀបចំពិធីសំណេះសំណាល ដើម្បីអបអរសាទរខួបអនុស្សាវរីយ៍លើកទី១០៨ ទិវាអន្តរជាតិនារី ៨មីនា ឆ្នាំ២០១៩ ក្រោមប្រធានបទ«លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស» ក្រោមអធិបតីភាពឯកឧត្តមជាវ តាយ អភិបាលនៃគណៈអភិបាលខេត្ត និងលោកជំទាវ និងឯកឧត្តម អ៊ឹង មេងហួរ ប្រធានក្រុមប្រឹក្សាខេត្ត និងលោកជំទាវ និងមានការអញ្ជើញចូលរួមពីសំណាក់លោក លោកស្រី អភិបាលរងខេត្ត សមាជិកក្រុមប្រឹក្សាខេត្ត ប្រធានសាលាដំបូងខេត្ត នាយករងរដ្ឋបាល លោក លោកស្រី ជាថ្នាក់ដឹកនាំមន្ទីរ អង្គភាពជុំវិញខេត្ត ព្រមទាំងភរិយាថ្នាក់ដឹកនាំ បងប្អូននារីជាស្ត្រី សរុបចំនួន១៤០០នាក់ផងដែរ ។
ឯឧត្តមជាវ តាយ អភិបាលខេត្តក៏បានគូសបញ្ជាក់ថា បងប្អូនស្ត្រីគ្រប់រូបមានតួនាទីយ៉ាងសំខាន់ក្នុងការអភិវឌ្ឍន៍នៅក្នុងក្រុមគ្រួសារ និងសង្គមជាតិដែលជាឆ្អឹងខ្នងសេដ្ឋកិច្ចក្នុងគ្រួសារផងដែរ ។ ដោយកត្តាទាំងនេះហើយដែលធ្វើឲ្យបងប្អូនស្ត្រីយើងគ្រប់រូបត្រូវមានស្មារតីចូលរួមក្នុងការថែរក្សាការពារសន្តិភាពព្រមទាំងធ្វើការប្រឆាំងដាច់ខាតនូវរាល់ឧបាយកល ល្បិចកលបោកបញ្ឆោតរបស់ក្រុមជនអគតិមួយចំនួនដែលមានមហិច្ឆិតា ក្នុងការប៉ុនប៉ងបំផ្លាញនូវសន្តិភាពនៅកម្ពុជាដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានខិតខំប្រឹងប្រែងស្វែងរកទាំងលំបាកអស់រយៈពេលជាច្រើនឆ្នាំមកនោះ ។
ឯកឧត្តមអភិបាលខេត្តបានបន្តទៀតថា សម្ដេចតេជោបានសម្រេចអនុញ្ញាតឲ្យបង្កើតក្រុមមេធាវីស្ម័គ្រចិត្តសម្តេចតេជោសែន ដោយប្រើប្រាស់ថវិកាផ្ទាល់ខ្លួនរបស់សម្តេចសម្រាប់កិច្ចការពារតាមផ្លូវច្បាប់ជូនដល់ស្ត្រីក្រីក្រនៅកម្ពុជាពិតជាបានបង្ហាញឲ្យឃើញយ៉ាងច្បាស់នូវ គុណធម៌ និងព្រហ្មវិហារធម៌ដ៏ខ្ពង់ខ្ពស់មិនអាចកាត់ថ្លៃបានរបស់សម្តេចនាយករដ្ឋមន្ត្រីនៃព្រះរាជាណាចក្រកម្ពុជា ។
ឯកឧត្តមក៏បានលើកឡើងយ៉ាងច្បាស់ថាប្រធានបទ «លើកកម្ពស់សមភាពយេនឌ័រ និងគាំពារសង្គម ដើម្បីអភិវឌ្ឍធនធានមនុស្ស» ក្នុងគោលបំណងបន្តរំលេចពីតម្លៃនៃសន្តិភាព និងការលើកកម្ពស់វប្បធម៌អហិង្សាដែលរាជរដ្ឋាភិបាលបាន និងកំពុងគាំទ្រជម្រុញឲ្យមានការចូលរួមពីគ្រប់ស្ថាប័ន រួមទាំងបុរសទាំងស្ត្រី ដើម្បីវឌ្ឍនភាពសង្គមឆ្ពោះទៅលើកកម្ពស់សិទ្ធិស្ថានភាព ជីវភាព ឋានៈ តួនាទីរបស់ស្ត្រីក៏ដូចជា សុខមាលភាពសង្គម ដោយធ្វើការទប់ស្កាត់ និងកាត់បន្ថយអំពើហិង្សាព្រមទាំងដោះស្រាយជម្លោះនានាដោយសន្តិវិធី ។
ក្នុងឱកាសនោះដែរក៏មានការចូលរួមថវិកាពីរដ្ឋបាលខេត្តរដ្ឋបាលក្រុងស្រុកមន្ទីរអង្គភាពជុំវិញខេត្តកម្លាំងគ្រប់ប្រភេទឯកឧត្តមជាវ តាយ អភិបាល និងលោកជំទាវបានឧបត្ថមដល់សមាជិក សមាជិកាជាស្ត្រីចំនួន១២៥៧នាក់ ក្នុងម្នាក់ៗទទួលបាន៥ម៉ឺនរៀលដោយចំណាយទឹកប្រាក់អស់សរុបចំនួន៦២៨៥០០០០រៀល ៕
ចែករំលែកព័តមាននេះ