រាជធានីភ្នំពេញ ៖ សត្វស្វាញីដែលកាចមួយក្បាល ត្រូវបានកម្លាំងជំនាញរបស់ក្រសួងកសិកម្ម រុក្ខាប្រមាញ់ និងនេសាទ សហការជាមួយនឹងកម្លាំងមានសមត្ថកិច្ចខណ្ឌដូនពេញធ្វើការដេញចាប់ ដោយប្រើកាំភ្លើងបាញ់ថ្នាំសណ្តំឱ្យសន្លប់ និងចាប់បញ្ជូនទៅកាន់សួនសត្វភ្នំតាម៉ៅ ក្រោយពីវាបានខាំក្មេងៗសិស្សសាលា បណ្តាលអោយរងរបួសចំនួន២នាក់ជាបន្តបន្ទាប់នោះ។
ប្រតិបត្តិការនេះដែរបានធ្វើឡើងនៅព្រឹកថ្ងៃទី១៣ ខែកុម្ភៈ ឆ្នាំ២០១៩ នៅបរិវេណសាលាបឋមសិក្សាព្រះនរោត្តម ក្នុងសង្កាត់ជ័យជំនះ ខណ្ឌដូនពេញ។
ប្រភពពីមន្ត្រីសាលាខណ្ឌដូនពេញបានប្រាប់ឱ្យដឹងថា នៅព្រឹកថ្ងៃដដែលនេះដែរ កម្លាំងជំនាញរបស់ក្រសួងកសិកម្ម រុក្ខាប្រមាញ់ និងនេសាទ បានសហការជាមួយកម្លាំងអាជ្ញាធរខណ្ឌដូនពេញ បានធ្វើការឡោមព័ទ្ធដេញចាប់សត្វស្វាញីធំមួយក្បាល។ ការដេញចាប់សត្វស្វាញីនេះដែរ គឺធ្វើឡើងក្រោយពីវាបានខាំក្មេងៗសិស្សសាលាបឋមសិក្សាព្រះនរោត្តមចំនួន ២នាក់ បណ្តាលអោយរងរបួសជាបន្តបន្ទាប់ នាពេលកន្លងមកនេះ។
តាមប្រភពដដែលបានប្រាប់បន្តថា ដោយសារតែសត្វស្វាញីធំមួយក្បាលខាងលើនេះវាកាច និងពិបាកក្នុងការតាមចាប់នោះ ទើបកម្លាំងរបស់ក្រសួងកសិកម្ម រុក្ខាប្រមាញ់និង នេសាទ សម្រេចប្រើកាំភ្លើងបាញ់ថ្នាំសណ្តំធ្វើអោយវាសន្លប់ ទើបចាប់ស្វាមួយក្បាលនេះបាន។
ក្រោយពីចាប់ស្វាញីដែលកាចសាហាវមួយក្បាលខាងលើនេះបានហើយ ក៏ធ្វើការប្រគល់ទៅអោយមន្ត្រីអភិរក្សសត្វព្រៃយកទៅរក្សាទុកនៅសួនសត្វភ្នំតាម៉ៅផងដែរ។
គួរបញ្ជាក់ថា ក្មេងៗសិស្សសាលាដែលរងគ្រោះដោយសារតែសត្វស្វាញីខាងលើខាំនោះ ក៏កំពុងតែស្ថិតក្រោមការជួយឧបត្តម្ភព្យាបាលរបួសយ៉ាងយកចិត្តទុកដាក់ពីសំណាក់អាជ្ញាធរខណ្ឌដូនពេញផងដែរ។
ចែករំលែកព័តមាននេះ