រាជធានីភ្នំពេញ ៖ អង្គភាពប្រឆាំងអំពើពុករលួយ ហៅកាត់ថា ACU នៅថ្ងៃទី២១ ខែមករា ឆ្នាំ២០១៩ បានប្រកាសពីលទ្ធផលនៃការទទួលឯកសារប្រកាសទ្រព្យសម្បត្តិ និងបំណុលតាមរបប២ឆ្នាំ…
រាជធានីភ្នំពេញ ៖ អង្គភាពប្រឆាំងអំពើពុករលួយ ហៅកាត់ថា ACU នៅថ្ងៃទី២១ ខែមករា ឆ្នាំ២០១៩ បានប្រកាសពីលទ្ធផលនៃការទទួលឯកសារប្រកាសទ្រព្យសម្បត្តិ និងបំណុលតាមរបប២ឆ្នាំ សម្រាប់ឆ្នាំ២០១៩នេះ មានឯកសារ១៥២៥៣ច្បាប់ត្រូវបានចូលមកអង្គភាព ACUត្រឹមតែរយៈពេល២១ថ្ងៃ (ពីថ្ងៃទី១ដល់២១ ខែមករា ២០១៩ ) ។ នេះបើតាមសេចក្តីជូនដំណឹងរបស់លោក ចេង ប៊ុនឃៀង ប្រធាននាយកដ្ឋានប្រកាសទ្រព្យសម្បត្តិ និងបំណុលចុះថ្ងៃទី២១ ខែមករា ឆ្នាំ២០១៩ ។
លោកប្រធាននាយកដ្ឋានបានលើកឡើងអង្គភាពប្រឆាំងអំពើពុករលួយសូមជម្រាបជូនសាធារណជនឲ្យបានជ្រាបថា នៅថ្ងៃទី២១ ខែមករា ឆ្នាំ២០១៩ នាយកដ្ឋានប្រកាសទ្រព្យសម្បត្តិ និងបំណុលបានទទួលឯកសារប្រកាសទ្រព្យសម្បត្តិ និងបំណុលចំនួន៦២៩ច្បាប់ ក្នុងរយៈពេល២១ថ្ងៃដោយគិតចាប់តាំងពីថ្ងៃទី១ ខែមករា ឆ្នាំ២០១៩ ដល់ថ្ងៃទី២១ ខែមករា ឆ្នាំ២០១៩ ។ នាយកដ្ឋានប្រកាសទ្រព្យសម្បត្តិ និងបំពុលបានទទួលឯកសារប្រកាសទ្រព្យសម្បត្តិ និងបំណុលសរុបមានចំនួន១៥,២៥៣ច្បាប់ ។
អង្គភាព ACU បានអះអាងថា ការទទួលឯកសារប្រកាសទ្រព្យសម្បត្តិ និងបំណុលតាមរបប២ឆ្នាំ ពីថ្ងៃទី១ ដល់៣១ ខែមករា ឆ្នាំ២០១៩ គឺអនុវត្តតាមសេចក្តីជូនដំណឹងស្តីពីកាលបរិច្ឆេទទទួលឯកសារប្រកាសទ្រព្យសម្បត្តិ និងបំណុលតាមរបប២ឆ្នាំ ឆ្នាំ២០១៩ ចុះថ្ងៃទី២២ ខែតុលា ឆ្នាំ២០១៨ ។ ក្រុមការងារនៃនាយកដ្ឋានប្រកាសទ្រព្យសម្បត្តិ និងបំណុលរង់ចាំទទួលឯកសារ៧ថ្ងៃក្នុងមួយសប្តាហ៍ ហើយមិនឈប់សម្រាប់ថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ ។
យោងតាម ACU បានអះអាងថា ចាប់ពីថ្ងៃទី១ ដល់១៧ ខែមករា ឆ្នាំ២០១៩ បានទទួលឯកសារចំនួន១៣១៥៧ច្បាប់ ដែលក្នុងនោះក៏មានឥស្សរជនជាន់ខ្ពស់នៃរាជរដ្ឋាភិបាល សម្តេច ហេង សំរិន ប្រធានរដ្ឋសភា, សម្តេចសាយ ឈុំ ប្រធានព្រឹទ្ធសភា, សម្តេចតេជោ ហ៊ុន សែន នាយករដ្ឋមន្ត្រី ព្រមទាំងឧបនាយករដ្ឋមន្ត្រី លោក គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ លោកជំទាវ មែន សំអន, លោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ, លោក ប៊ិន ឈិន ឧបនាយករដ្ឋមន្ត្រី រដ្ឋមន្ត្រីទទួលបន្ទុកគណៈរដ្ឋមន្ត្រី, លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់ បានប្រកាសទ្រព្យសម្បត្តិរួចហើយ ៕
ចែករំលែកព័តមាននេះ