ខេត្តប៉ៃលិន ៖ រហូតមកដល់ព្រឹកថ្ងៃទី១៣ ខែធ្នូ ឆ្នាំ២០១៨នេះ ខណៈរដូវរងាកំពុងតែឈានចូ លមកដល់ ហើយស្របពេលធ្លាក់ខ្យល់មកទិសខាងជើងធ្វើឱ្យប្រជាពលរដ្ឋជាច្រើននាក់ទាំងអ្នករស់នៅតាមស្រែចម្ការ និងអ្នករស់នៅក្នុងទីក្រុងបាននាំគ្នាធ្វើដំណើរចូលទៅក្នុងផ្សារ ដើម្បីទិញខោអាវជជុះ និងអាវរងាសម្រាប់ពាក់ការពារខ្លួន និងទប់ទល់អាកាសធាតុផងដែរ ។
ប្រភពព័ត៌មានពីស្ត្រីម្នាក់ឈ្មោះ សំណាង អាយុ៤០ឆ្នាំ ជាអាជីវករលក់អាវជជុះនៅក្នុងផ្សារត្រី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា គាត់បានលើកខោអាវជជុះ និងខោអាវរងាមកពីខេត្តបាត់ដំបង និងរាជធានីភ្នំពេញដោយដឹកតាមរថយន្តឈ្នួលយកមកលក់ដូរនៅក្នុងខេត្តប៉ៃលិនព្រោះជារៀងរាល់រដូវរងាមានប្រជាពលរដ្ឋជាច្រើននាំគ្នាសម្រុកទិញ ដោយអ្នកខ្លះទិញ៥ទៅ១០កំប្លេ ហើយអ្នកខ្លះទៀតទិញអាវរងាយកទៅពាក់ ដើម្បីទប់ទល់អាកាសធាតុដែលចាប់ផ្តើមត្រជាក់នាពេលយប់ ។
គាត់បន្តទៀតថា នៅឆ្នាំ២០១៨នេះខ្យល់ទើបតែចាប់ផ្តើមរងាខ្លាំង ហើយការលក់ដូររបស់គាត់ក៏ដាច់ផងដែរដោយក្នុង១ថ្ងៃៗអាចរកបានប្រាក់ចំណូលច្រើនជាងរដូវផ្សេងៗព្រោះអត់សូវមានអ្នកចូលទិញច្រើនដូចរដូវនេះទេ ។
ចំណែកប្រជាពលរដ្ឋម្នាក់ឈ្មោះ សាន សុខលី អាយុ៣៤ឆ្នាំ រស់នៅក្នុងក្រុងប៉ៃលិនបានឱ្យដឹង ថា គាត់ចូលចិត្តទិញអាវជជុះយកទៅបោកអ៊ុតពាក់ដេកយប់ ដើម្បីការពារកុំឱ្យរងារខ្លាំង ។ ជាពិសេសនៅរដូវនេះសម្លៀកបំពាក់ធូរថ្លៃដោយ១កំប្លេត្រឹមតែ៤ទៅ៥ពាន់រៀលក៏អាចទិញបានដែរ ។ ចំណែកអាវរងាក៏មានច្រើនហើយតម្លៃថោកសមរម្យដូច្នេះពួកគាត់ម្នាក់ៗទិញយកទៅផ្ញើប្តី និងកូននៅឯផ្ទះ ព្រោះរដូវរងារឈានចូលមកដល់ជាបណ្តើរៗហើយ ៕
ចែករំលែកព័តមាននេះ