ខេត្តស្វាយរៀង ៖ កាលពីវេលាម៉ោង១០យប់ ថ្ងៃទី៣០ ខែវិច្ឆិកា ឆ្នាំ២០១៨នេះ នៅទូទាំងខេត្តស្វាយរៀងមានវត្តចំនួន២៤៤វត្ត ស្នាក់ការថ្វាយបង្គំពាហិសាសនា (សាសនាដទៃ) ចំនួន៤៩កន្លែង…
ខេត្តស្វាយរៀង ៖ កាលពីវេលាម៉ោង១០យប់ ថ្ងៃទី៣០ ខែវិច្ឆិកា ឆ្នាំ២០១៨នេះ នៅទូទាំងខេត្តស្វាយរៀងមានវត្តចំនួន២៤៤វត្ត ស្នាក់ការថ្វាយបង្គំពាហិសាសនា (សាសនាដទៃ) ចំនួន៤៩កន្លែង បានទូងស្គរ ដើម្បីអបអរសាទរព្រឹត្តិការណ៍ជាប្រវត្តិសាស្ត្រនៃការដាក់បញ្ចូល «ល្ខោនខោល»ចូលក្នុងបញ្ជីបេតិកភណ្ឌអរូបីយនៃមនុស្សជាតិរបស់អង្គការយូណេស្កូក្នុងនោះអ្នកចូលរួមមានចំនួន៣៤៦៨អង្គ/នាក់ ។
បើតាមការឱ្យដឹងពីសំណាក់លោកទីវសុភាប្រធានមន្ទីរធម្មការ និងសាសនាខេត្តស្វាយរៀងនៅយប់ ថ្ងៃទី៣០ ខែវិច្ឆិកា ឆ្នាំ២០១៨នេះ ។ លោកប្រធានមន្ទីរបានឱ្យដឹងទៀតថា ដោយឡែកនៅក្រុងស្វាយរៀងវិញក៏មានរៀបចំពិធីទូងស្គរនេះផងដែរ ដោយមានការចូលរួមពីលោកណុប ចំរើន អភិបាលក្រុងស្វាយរៀងតំណាង លោក ម៉ែន វិបុល អភិបាលខេត្តស្វាយរៀងបានអញ្ជើញក្នុងពិធីវាយគងការទូងស្គរទះប៉ោតគោះត្រដោកនឹងបន្លឺឡើង ដើម្បីអបអរសាទរព្រឹត្តិការណ៍ជាប្រវត្តិសាស្ត្រនៃការដាក់បញ្ចូល «ល្ខោនខោល» ចូលក្នុងបញ្ជីបេតិកភណ្ឌអរូបីយនៃមនុស្សជាតិរបស់អង្គការយូណេស្កូ និងមានការចូលរួមពីសង្ឃ សិស្ស និស្សិត សរុប៧៣អង្គនាក់ ដែលបានប្រារព្ធធ្វើឡើងនៅវត្តព្រៃឆ្លាក់សង្កាត់ព្រៃឆ្លាក់ ក្រុងស្វាយរៀង ។
លោកទីវ សុភា បានឱ្យដឹងបន្ថែមទៀតថានេះ គឺជាមោទនភាពថ្មីមួយទៀតសម្រាប់ប្រជាពលរដ្ឋ និងប្រទេសកម្ពុជា ហើយសមិទ្ធផលនេះ គឺជាលទ្ធផលនៃកិច្ចប្រឹងប្រែងដ៏យូរអង្វែងនិងការពុះពារយ៉ាងសកម្មរបស់រាជរដ្ឋាភិបាលកម្ពុជា និងការគាំទ្រយ៉ាងផុលផុសពីសិល្បៈករអង្គការសមាគមសង្គមស៊ីវិលដែលធ្វើការក្នុងវិស័យសិល្បៈវប្បធម៌ និងការគាំទ្រលើកទឹកចិត្តពីមហាជនទូទៅ និងប្រជាជនកម្ពុជាទាំងមូល ។ ការដាក់បញ្ចូល «ល្ខោនខោល» ទៅក្នុងបញ្ជីអរូបីយ៍នៃមនុស្សជាតិនាពេលនេះ គឺជាការរួមចំណែកធ្វើឲ្យកេរ្តិ៍ឈ្មោះរបស់ព្រះរាជាណាចក្រកម្ពុជាកាន់តែល្បីសុះសាយទូទាំងពិភពលោក ហើយធ្វើឲ្យកម្ពុជាក្លាយជាតួអង្គកាន់តែលេចធ្លោរថែមទៀតនៅលើវេទិកាបេតិកភណ្ឌពិភពលោក ។
សូមបញ្ជាក់ថា «ល្ខោនខោល» ដែលជាស្នាដៃសិល្បៈ បុរាណដ៏វិសេសវិសាលអស្ចារ្យរបស់កម្ពុជាត្រូវបានអង្គការយូណេស្កូសម្រេចដាក់ចូលក្នុងបញ្ជីបេតិកភណ្ឌពិភពអរូបីយនៃមនុស្សជាតិ ក្នុងឱកាសកិច្ចប្រជុំលើកទី១៣ ក្នុងទីក្រុងព័រល្វីសនៃសាធារណរដ្ឋម៉ូរីស នៅថ្ងៃទី២៨ ខែវិច្ឆិកា ឆ្នាំ២០១៨ ។ នេះ គឺជាជោគជ័យសម្រាប់ប្រជាជាតិខ្មែរប្រកបដោយមោទនភាព ៕
ចែករំលែកព័តមាននេះ