រាជធានីភ្នំពេញ ៖ បុរសជាជាងភ្លើងម្នាក់ត្រូវបានចរន្តអគ្គិសនីឆក់ស្លាប់យ៉ាងអាណោចអាធ័ម ពេលដែលដាក់ជណ្ដើរឡើងទៅស្វានដាប់ជញ្ជាំងថ្មនៅជាន់ទី១ ក្នុងការដ្ឋានជួសជុលផ្ទះវីឡាមួយកន្លែង បង្កការភ្ញាក់ដល់សមត្ថកិច្ចចុះមកត្រួតពិនិត្យកាលពីវេលាម៉ោង៥និង១០នាទីល្ងាចថ្ងៃទី១៣ ខែវិច្ឆិកា ឆ្នាំ២០១៨ ត្រង់ចំណុចផ្ទះលេខ៧៨ ផ្លូវ៥៩២ ក្បែរនិងវិទ្យាល័យឥន្ទ្រទេវី ស្ថិតក្នុងសង្កាត់បឹងកក់ទី២ ខណ្ឌទួលគោក។
ជនរងគ្រោះដែលស្លាប់ឈ្មោះ អុីង វាសនា ភេទប្រុស អាយុ២៦ឆ្នាំ ជាជាងភ្លើង ស្នាក់នៅភូមិស្លែងរលើង សង្កាត់អូបែកក្អម ខណ្ឌសែនសុខ។
បើតាមប្រភពព័ត៌មានពីបុរសម្នាក់ដែលជាអ្នកធ្វើការជាមួយគ្នាបានរៀបរាប់ប្រាប់អោយដឹងថា កាលពីវេលាម៉ោង៤ល្ងាចមុនពេលកើតហេតុ ជនរងគ្រោះបានយកម៉ូទ័រសម្រាប់ដាប់បេតុងមួយគ្រឿង និងជណ្ដើរដេកមួយ ទៅដាប់ជញ្ជាំងថ្មដើម្បីសម្រាប់តបង្កប់ខ្សែភ្លើង នៅឯជាន់ទី១តែម្នាក់ឯង។
លុះមកដល់វេលាកើតហេតុ ដោយបាត់បុរសរងគ្រោះខាងលើយូរពេក និងស្ងាត់មិនឮសម្លេងអ្វីសោះ គាត់ក៏បានឡើងទៅមើល ស្រាប់តែប្រទះឃើញបុរសរងគ្រោះដេកដួលទៅនឹងដីជាប់ជាមួយនឹងជណ្តើរដេក រួមទាំងម៉ូទ័រដាប់បេតុងជាប់នឹងខ្លួនផងដែរ។
ភ្លាមនោះគាត់ក៏បានរត់ទៅបិទប្រព័ន្ធភ្លើង ហើយបានស្រែកឆោឡោបង្កឲ្យមានការណ៍ភ្ញាក់ផ្អើលដល់កម្មករដែលធ្វើការនៅការដ្ឋាននោះនាំគ្នាមកជួយលើកបុរសរងគ្រោះចេញពីកន្លែងកើតហេតុ និងដឹកយកជនរងគ្រោះទៅសង្គ្រោះនៅឯមន្ទីរពេទ្យដែរ ប៉ុន្តែជាអកុសលបុរសរងគ្រោះបានស្លាប់បាត់ទៅហើយ។ បន្ទាប់មកគាត់ក៏ទាក់ទងទៅប្រាប់ក្រុមគ្រួសារជនរងគ្រោះនិងសមត្ថកិច្ចមូលដ្ឋានអោយចុះមកជួយធ្វើការអន្តរាគមន៍ត្រួតពិនិត្យ។
ក្រោយមកសមត្ថកិច្ចមូលដ្ឋាន និងសមត្ថកិច្ចជំនាញកោសល្យវិច័យក្រុងក៏បានចុះមកធ្វើការត្រួតពិនិត្យ និងធ្វើកោសល្យវិច័យទៅលើសពជនងគ្រោះ រកឃើញថា បុរសរងគ្រោះពិតជាស្លាប់ដោយសារតែឆក់ចរន្តអគ្គិសនីពិតប្រាកដមែន។
ជំហានដំបូងសមត្ថកិច្ចសន្និដ្ឋានថាគឺបណ្តាលមកពីខ្សែម៉ូទ័រដាប់បេតុងមានតំណ និងដាច់រលាត់ទើបបណ្តាលឲ្យឆ្លងចរន្តឆក់ជនរងគ្រោះស្លាប់ភ្លាមៗតែម្តង។
ក្រោយពេលកើតហេតុ សពបុរសរងគ្រោះក៏ត្រូវបានសមត្ថកិច្ចប្រគល់ទៅអោយសាច់ញាតិក្រុមគ្រួសារដឹកយកទៅទៅធ្វើបុណ្យទៅតាមប្រពៃណីនៅឯលំនៅឋាន៕
ចែករំលែកព័តមាននេះ