ខេត្តរតនគិរី ៖ ២នាក់ឪពុក និងកូនប្រុសដើរដាក់អន្ទាក់ក្នុងព្រៃ ស្រាប់តែត្រូវសត្វខ្លាឃ្មុំយ៉ាងធំមួយក្បាលហក់មកខាំកូនរងរបួសធ្ងន់ ហេតុការណ៍នេះបានកើតឡើងម៉ោង២និង៣០នាទីរសៀល នៅថ្ងៃទី៦ ខែវិច្ឆិកា ឆ្នាំ២០១៨ នៅចំណុចតំបន់ព្រៃជ្រៅ ស្ថិតក្នុងភូមិទំពួនរឺងតូច ឃុំតាវែងក្រោម ស្រុកតាវែង។
ទាក់ទិនរឿងខាងលើនេះ ត្រូវសមត្ថកិច្ចស្រុកតាវែងបានឱ្យដឹងថា ជនរងគ្រោះឈ្មោះ ណយ សឺអ៊ី ភេទប្រុស អាយុ១៦ ឆ្នាំ ជនជាតិដើមភាគតិចព្រៅ រស់នៅភូមិ-ឃុំកើតហេតុ ។ ហើយនៅពេលកើតហេតុនោះ សមត្ថកិច្ចអត់បានដឹងទេ ទើបនឹងដឹងរឿងនេះពេលឪពុកដឹកកូនរងគ្រោះមកដល់មណ្ឌលសុខភាពស្រុកតាវែង ។
បើតាមការបំភ្លឺពីឪពុកនិងកូនបានឱ្យដឹងថា នៅថ្ងៃកើតហេតុនោះ ម៉ោង៨ព្រឹកគាត់២នាក់ជិះម៉ូតូចេញពីផ្ទះទៅព្រៃមានចម្ងាយជាង១០គីឡូម៉ែត ដើម្បីដាក់អន្ទាក់សត្វព្រៃ ពេលទៅដល់ព្រៃឪពុកបានដើររាយអន្ទាក់ ចំណែកកូនប្រុសដើរតាមពីក្រោយ ។ ហើយនៅម៉ោងកើតហេតុនោះស្រាប់តែមានសត្វខ្លាឃ្មុំមេមួយក្បាលយ៉ាងធំពណ៌ខ្មៅ រត់ចេញពីក្នុងព្រៃហក់មកខាំកូនប្រុសចំជើងខាងឆ្វេងដាច់សាច់អស់២ដុំ ។
បុរសជាឪពុកបានបន្តថា ពេលនោះឪពុកបានឃើញដូច្នេះយកដំបងឈើប៉ុនក.ដៃវាយសត្វខ្លាឃ្មុំ ដើម្បីជួយរំដោះកូនប្រុស ពេលឪពុកធ្វើសង្គ្រាមជាមួយសត្វខ្លាឃ្មុំនោះ សត្វខ្លាឃ្មុំបានបកមកខាំគាត់ឪពុកវិញម្ដង ហើយកូនប្រុសឃើញសត្វខ្លាឃ្មុំបកមកខាំឪពុកបែបនេះ ក៏យកដំបងជួយវាយសត្វខ្លាឃ្មុំរំដោះឪពុកវិញ ទើបសត្វខ្លាឃ្មុំព្រមចុះចាញ់ រត់ចូលព្រៃបាត់ទៅ ។
បើតាមការសន្និដ្ឋានពីជនរងគ្រោះថា សត្វខ្លាឃ្មុំមេមួយក្បាលនោះ ទំនងវាមានកូនទើបវាកាចបែបនេះ ក្រោយពីកើតហេតុហើយឪពុកបានដឹកកូនប្រុសរងគ្រោះតាមម៉ូតូត្រឡប់មកផ្ទះវិញ ដើម្បីយកកូនប្រុសទៅព្យាបាលនៅមណ្ឌលសុខភាពស្រុកតាវែង។ បច្ចុប្បន្នជនរងគ្រោះកំពុងសំរាកព្យាបាល ហើយជនរងគ្រោះបានរួចផុតពីសេចក្ដីស្លាប់ហើយ។
ចែករំលែកព័តមាននេះ