រាជធានីភ្នំពេញ ៖ មន្ត្រីនៃមជ្ឈមណ្ឌលរក្សាសន្តិភាពកម្ពុជាបានថ្លែងថា កងកម្លាំងមួកខៀវកម្ពជាប្រមាណ ២១៦នាក់ ត្រូវបាន ហ្វឹកហ្វឺនក្នុងសកម្មភាពបាញ់គ្រាប់ពិត មុនចេញទៅបំពេញបេសកកម្មសន្តិភាពរបស់អង្គការសហប្រជាជាតិ នៅសាធារណរដ្ឋអាហ្វ្រិកកណ្តាល នៅដើមខែវិច្ឆិកាក្រោយនេះ។…
រាជធានីភ្នំពេញ ៖ មន្ត្រីនៃមជ្ឈមណ្ឌលរក្សាសន្តិភាពកម្ពុជាបានថ្លែងថា កងកម្លាំងមួកខៀវកម្ពជាប្រមាណ ២១៦នាក់ ត្រូវបាន ហ្វឹកហ្វឺនក្នុងសកម្មភាពបាញ់គ្រាប់ពិត មុនចេញទៅបំពេញបេសកកម្មសន្តិភាពរបស់អង្គការសហប្រជាជាតិ នៅសាធារណរដ្ឋអាហ្វ្រិកកណ្តាល នៅដើមខែវិច្ឆិកាក្រោយនេះ។ លោកឧត្តមសេនីយ៍ឯក ហ៊ួត គីមសាន្ត អគ្គនាយករង មជ្ឈមណ្ឌលជាតិរក្សាសន្តិភាព និងជានាយកសាលាហ្វឹកហ្វឺនកងកម្លាំងរក្សាសន្តិភាពពហុជាតិ ថ្លែងក្នុងពិធីបាញ់គ្រាប់ពិត នៅថ្ងៃទី១៩ ខែតុលានេះ ថា “កម្លាំងមួកខៀវកម្ពុជា ហ្វឹកហ្វឺនបាញ់គ្រាប់ពិតនេះ គឺមានចំនួន២១៦នាក់ ដែលកម្លាំងទាំងអស់នេះ ត្រៀមទៅបំពេញបេសកកម្មនៅសាធារណរដ្ធអាហ្វ្រិកកណ្តាល នៅដើមខែក្រោយនេះ ជាកងកម្លាំងប្តូរវេនកម្លាំងចាស់ដែលត្រូវបញ្ចប់បេសកកម្ម១ឆ្នាំ”។
លោកបន្តថា កងកម្លាំងមួកខៀវកម្ពុជា ហ្វឹកហ្វឺនបាញ់គ្រាប់ពិតនេះ ដោយសារនៅសាធារណរដ្ឋអាហ្វ្រិកកណ្តាល មានបញ្ហាប្រឈមខ្លាំងផ្នែកសន្តិសុខ ជាពិសេសក្រុមឧទ្ទាម តែងតែពួនស្ទាក់វាយប្រហារ មកលើកម្លាំងរក្សាសន្តិភាព របស់អង្គការសហប្រជាជាតិ។ លោកថា ការឈានដល់ការបាញ់គ្រាប់ពិត គឺកម្លាំងមួកខៀវទាំងអស់ បានធ្វើការបណ្តុះបណ្តាលនៅសាលារយៈពេល១ឆ្នាំ និងចាប់ផ្តើមបាញ់គ្រាប់ពិតថ្ងៃនេះ គឺសិក្ខាកាមទាំងអស់ទទួលបានជោគជ័យ និងបាញ់ចំគោលដៅបានល្អទាំងអស់គ្នា។ អាវុធដែលសិក្ខាកាមត្រូវបាញ់ គឺមានប្រភេទអាវុធ អាកា៤៧ អាវុធប្រភេទ PKM កាំភ្លើងយន្ត អាវុធប្រភេទកាំភ្លើង១២,៧ និងអាវុធប្រភេទកាំភ្លើង B40 ផងដែរ។
លោកបានបញ្ជាក់ប្រាប់អ្នកសារព័ត៌មានទៀតថា “កម្លាំងមួកខៀវ ក្រៅពីហ្វឹកហ្វឺនបាញ់គ្រាប់ពិត ក៏បានហ្វឹកហ្វឺនលើជំនាញជំនាញវិស្វកម្ម មានសំណង់ផ្តេក និងសំណង់បញ្ឈរ, ជំនាញបោសសម្អាតមីន, ជំនាញកម្ទេចយុទ្ធភណ្ឌមិនទាន់ផ្ទុះ និងគ្រាប់កែច្នៃ, ជំនាញសុខាភិបាល ជំនាញបច្ចេកទេសបើកបរ រថយន្ត គ្រឿងចក្រ និងជួសជុលកម្រិតស្រាល សព្វាវុធ ក្បួនយុទ្ធវិធី ឋានលេខា លំហាត់របៀបកងទ័ព កីឡារត់ឆ្លងឧបសគ្គ សិប្បនិម្មិត រត់ឆ្លងឧបសគ្គធម្មជាតិ រត់ចម្ងាយ រត់ពាក់កណ្តាលកម្មង់ដូ លំហាត់ប្រាណ ២៤ កាយវិកា ភ្លេងបុរាណ សិល្ប: សាសនាប្រពៃណីខ្មែរ សង្គ្រោះបឋម ការសិក្សាផ្នែកច្បាប់ជាតិ និងច្បាប់អន្តរជាតិ ច្បាប់សិទ្ធិមនុស្ស ច្បាប់ព្រហ្មទណ្ឌ ច្បាប់សង្គ្រាម អប់រំចិត្តសាស្ត្រ ជាដើម។
លោកជំទាវ ឧត្តមសេនីយ៍ត្រី កុសល ម៉ាលីនដា អ្នកនាំពាក្យមជ្ឈមណ្ឌលជាតិ រក្សាសន្តិភាព បានឲ្យដឹងថា “កងកម្លាំងមួកខៀវទាំង២១៦នាក់នោះ ចេញទៅបំពេញបេសកកម្មអង្គការសហប្រជាជាតិ នៅសាធារណៈរដ្ឋអាហ្វ្រិកកណ្តាល នៅដើមខែវិច្ឆិកា ឆ្នាំ២០១៨នេះ ដើម្បីប្តូវេនកម្លាំងចាស់ ត្រូវបានបញ្ចប់បេសកកម្ម រយៈពេល១ឆ្នាំ។ លោកជំទាវ មានប្រសាសន៍ថា កម្លាំងមួកខៀវដែលត្រៀមខ្លួន ចូលរួមបេសកកម្មអង្គការសហប្រជាជាតិនេះ ពួកគេគឺមានសមត្ថភាពគ្រប់គ្រាន់ និងមានជំនាញច្បាស់លាស់ ដោយសារកម្លាំង បានឆ្លងកាត់វគ្គហ្វឹកហ្វឺនត្រឹមត្រូវ ដែលមានយោធាចារ្យ ជាតិ និងអន្តរជាតិ ដែលមានមកពីសហរដ្ឋអាមេរិក ចិន ឥណ្ឌា បារាំង ជប៉ុន មន្ត្រីUNMASS របស់អង្គការសហប្រជាជាតិ និងបណ្តាប្រទេសជាមិត្ត ច្រើននាក់ទៀត។
សូមបញ្ជាក់ថា ចាប់តាំងពីឆ្នាំ២០០៦មក កម្ពុជាបានបញ្ជូនកម្លាំងក្នុងបេសកកម្ម មានចំនួនសរុបប្រមាណ ៥,៥៧៨នាក់ ក្នុងនោះមានស្ត្រីចំនួនប្រមាណជាង២៦៤នាក់ ទៅកាន់បប្រទេសចំនួន៨។ បច្ចុប្បន្នកម្ពុជាមានកម្លាំងចំនួន៨១០នាក់ ក្នុងនោះកម្លាំងនារីចំនួន៦៥នាក់ កំពុងបំពេញបេសកកម្មនៅប្រទេសចំនួន៥ រួមមាន ប្រទេសស៊ូដង់ ស៊ូដង់ខាងត្បូង អាហ្វ្រិកកណ្តាល លីបង់ និងម៉ាលី។ ក្នុងឆ្នាំ២០១៨នេះ ប្រទេសកម្ពុជា ត្រូវបានអង្គការសហប្រជាជាតិ ឱ្យចំណាត់ថ្នាក់លេខ២៩ ក្នុងចំណោម១២២ប្រទេស ចំពោះកម្លាំងនារីបានចំណាត់ថ្នាក់លេខ១៧ លើ១២២ប្រទេស ដែលបានបរិច្ចាគកងកម្លាំង ចូលរួមបេសកកម្មរក្សាសន្តិភាពរបស់អង្គការសហប្រជាជាតិ៕
ចែករំលែកព័តមាននេះ