រាជធានីភ្នំពេញ ៖ ជំងឺគាំងបេះដូងបានឆក់យកជីវិតមនុស្សជាបន្តបន្ទាប់ ដោយក្នុងរយៈពេល៣ថ្ងៃជាប់ៗគ្នាមានអ្នកស្លាប់ដោយជំងឺនេះចំនួន៣នាក់ នៅក្នុងភូមិសាស្ត្រខណ្ឌពោធិ៍សែនជ័យ ។ ហើយជនរងគ្រោះទាំងនោះសុទ្ធតែអ្នកចំណាកស្រុកមកស្នាក់នៅធ្វើការនៅក្នុងខណ្ឌខាងលើនិងបានដេកស្លាប់ទាំងអស់ ។ តាមប្រភពពីនគរបាលខណ្ឌពោធិ៍សែនជ័យបានឲ្យដឹងថា ហេតុការណ៍នេះលើកទី១បានកើតឡើង…
រាជធានីភ្នំពេញ ៖ ជំងឺគាំងបេះដូងបានឆក់យកជីវិតមនុស្សជាបន្តបន្ទាប់ ដោយក្នុងរយៈពេល៣ថ្ងៃជាប់ៗគ្នាមានអ្នកស្លាប់ដោយជំងឺនេះចំនួន៣នាក់ នៅក្នុងភូមិសាស្ត្រខណ្ឌពោធិ៍សែនជ័យ ។
ហើយជនរងគ្រោះទាំងនោះសុទ្ធតែអ្នកចំណាកស្រុកមកស្នាក់នៅធ្វើការនៅក្នុងខណ្ឌខាងលើនិងបានដេកស្លាប់ទាំងអស់ ។ តាមប្រភពពីនគរបាលខណ្ឌពោធិ៍សែនជ័យបានឲ្យដឹងថា ហេតុការណ៍នេះលើកទី១បានកើតឡើង កាលពីវេលាម៉ោង៦និង១០នាទីល្ងាច ថ្ងៃទី៣១ ខែសីហា ឆ្នាំ២០១៨ នៅក្នុងបន្ទប់ផ្ទះជួល ស្ថិតនៅក្នុងភូមិត្រពាំងឈូក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។
បុរសដែលស្លាប់ឈ្មោះ ទួន ណារិន ហៅជូរ អាយុ៣១ឆ្នាំ មុខរបរកម្មកររោងចក្រធ្វើការវេនយប់ មានស្រុកកំណើតនៅក្នុងភូមិប្រមូល ឃុំដូង ស្រុកបាទី ខេត្តតាកែវ ។ មានប្រពន្ធ ឈ្មោះ លិក ណូ អាយុ២៥ឆ្នាំ មុខរបរកម្មការិនីរោងចក្រ ស្នាក់នៅភូមិកើតហេតុខាងលើ និង មានស្រុកកំណើតនៅភូមិសូរជ័យ ឃុំចម្ការអណ្តូង ស្រុកចម្ការលើ ខេត្តកំពង់ចាម ។
ស្ត្រីជាប្រពន្ធបាននិយាយថា ប្ដីរបស់នាងដែលស្លាប់នេះធ្វើការវេនយប់ ហើយនៅថ្ងៃកើតហេតុខណៈពេលចេញពីធ្វើការមកដល់បន្ទប់ជួលវិញ ប្ដីនាងបានចូលទៅដេកនៅក្នុងបន្ទប់ដូច រាល់ថ្ងៃដែរ ។ ចំណែកនាងមិនបាននៅជាមួយទេ ព្រោះបានចេញទៅធ្វើការវេនថ្ងៃដូចសព្វមួយដងដែរ ហើយនាងក៏មិននឹកស្មានថា មានរឿងដ៏សោកសៅបែបនេះកើតឡើងឡើយ ។ នាងធ្វើការរហូតដល់វេលាល្ងាចទើបចេញ ហើយពេលត្រឡប់ដល់ផ្ទះជួលវិញនាងបានគោះទ្វារហៅឲ្យប្ដីបើកទ្វារឲ្យ ប៉ុន្តែខណៈនោះទោះជាប្រឹងស្រែកហៅយ៉ាងណាក៏មិនបានឮឆ្លើយនិងមិនឃើញបើកទ្វារឲ្យឡើយ ។
ចំណែកទូរស័ព្ទក៏ខលមិនចូលទៀត ទើបនាងពឹងអ្នកជិតខាងឲ្យជួយគាស់ទ្វារចូលទៅមើលស្រាប់តែឃើញប្តីដេកស្លាប់ទៅហើយ ។ ប្រភពដដែលបានបន្តទៀតថា លើកទី២បានកើតឡើងកាលពីវេលាម៉ោង១១និង៤០នាទីយប់ ថ្ងៃទី១ ខែកញ្ញា ឆ្នាំ២០១៨ ស្ថិតនៅបន្ទប់ផ្ទះជួលលេខ១៦ចំណុចខាងក្រោយផ្សារកាណាសុធី ស្ថិតនៅក្នុងភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។ បុរសដែលស្លាប់ឈ្មោះ គង់ ប៊ុនហាក់ អាយុ២៤ឆ្នាំ មុខរបកម្មករសំណង់ ស្នាក់នៅបន្ទប់ជួលខាងលើ និងមានស្រុកកំណើតនៅក្នុងភូមិជ្រោយជ្រែ ឃុំសំបួរ ស្រុកល្វាឯម ខេត្តកណ្ដាល ។ មានប្រពន្ធឈ្មោះ វន ជាតា អាយុ២២ឆ្នាំ មុខរបកម្មការិនីរោងចក្រ មានស្រុកកំណើតជាមួយគ្នា ។
ស្ត្រីជាប្រពន្ធបានឲ្យដឹងថា កន្លងមកប្ដីរបស់នាងមានសុខភាពល្អប្រសើរខ្លាំងណាស់ពុំដែលមានជំងឺអ្វីដែលគួរឲ្យព្រួយបារម្ភនោះទេ ។ ដោយឡែកនៅមុនពេលកើតហេតុ ខណៈពេលត្រឡប់មកពីធ្វើការវិញ លោកប្ដីរបស់នាងមិនបាននៅទំនេរឡើយ ហើយបានជួយបោកគក់ខោអាវនាងថែមទៀតផង ។ លុះពេលបោកគក់រួចរាល់ទើបនាំគ្នាហូបបាយជុំគ្នា ពេលនោះប្ដីក៏តែមានសុខភាពធម្មតាដែរ បន្ទាប់មកទើបនាំគ្នាចូលដេក ហើយនាងមិនបានគិតដល់ថា ប្ដីស្លាប់ឡើយ ។ លុះដល់វេលាម៉ោង១១និង៤០នាទី ពាក់កណ្ដាលអាធ្រាត្រយប់ថ្ងៃដដែលខណៈដែលនាងភ្ញាក់ពីដេកស្រាប់តែឃើញប្ដីប្រកាច់ត្រដរខ្យល់គួរឲ្យសង្វេគ ។ ពេលនោះនាងបានស្រែកហៅអ្នកជិតខាងឲ្យជួយបង្កឲ្យមានការភ្ញាក់ផ្អើលទាំងយប់ រួចបាននាំគ្នាជួយសង្គ្រោះបឋម ដោយធ្វើការគក់ច្របាច់ និងធ្វើចលនាបេះដូង ប៉ុន្តែឥតប្រយោជន៍នោះឡើយ ព្រោះទីបំផុតប្ដីនាងនៅតែស្លាប់ដដែល ។
ប្រភពខាងលើបានប្រាប់ឲ្យដឹងបន្ថែមទៀតថា លើកទី៣បានកើតឡើង កាលពីវេលាម៉ោងប្រហែល៨ព្រឹកថ្ងៃទី២ ខែកញ្ញា ២០១៨ ចំណុចបន្ទប់ផ្ទះជួល លេខ១ ជាន់ទី១ ភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ ។ បុរសដែលស្លាប់ខាងលើនោះឈ្មោះ សាំង លឹមចេង អាយុ៣០ឆ្នាំ មុខរបរកម្មករដឹកឥវ៉ាន់ ស្នាក់នៅចំណុចកើតហេតុ និងមានស្រុកកំណើតនៅក្នុងភូមិ អង្គសង្កែ ឃុំពោធិ៍ចាក ស្រុកព្រៃកប្បាស ខេត្តតាកែវ ។ មានប្រពន្ធឈ្មោះ បេង រស្មី អាយុ២៨ឆ្នាំ មុខរបរកម្មការនីរោងចក្រ ស្នាក់នៅកន្លែងកើតហេតុ មានស្រុកកំណើតនៅក្នុងភូមិកូនជ្រៃ ឃុំព្រែកអំបិល ស្រុកស្អាង ខេត្តកណ្តាល ។ ស្ត្រីជាប្រពន្ធបាននិយាយថា ប្ដីរបស់នាងធ្វើការវេនថ្ងៃ ចំណែកនាងធ្វើការវេនយប់ ហើយនៅវេលាល្ងាចថ្ងៃទី០១ កញ្ញា ២០១៨ នាងបានចេញទៅធ្វើការចំណែកប្ដីនៅផ្ទះ និងបានផឹកស៊ីជាមួយអ្នកជិតខាងអស់ស្រាបៀរចំនួន២កំប៉ុងប៉ុណ្ណោះ ។ លុះដល់វេលាម៉ោងប្រហែល៨យប់បានសុំលាអ្នកផឹកជាមួយឡើងទៅបន្ទប់ដេកដោយប្រាប់ថា គាត់អត់ស្រួលខ្លួន គឺងងឹតមុខខ្លាំងណាស់ ។ ពេលនោះអត់មានអ្នកណាជួយកោសខ្យល់ឲ្យឡើយលុះព្រឹកឡើងម៉ោងប្រហែល៨ព្រឹក ខណៈដែលនាងចេញពីធ្វើការវេនយប់មកដល់ផ្ទះបានគោះទ្វារបន្ទប់ ហៅតែមិនបានឃើញប្ដីបើកទ្វារឲ្យឡើយ ។
ប្រភពដដែលបានបន្តថា ដោយមានការងឿងឆ្ងល់នាងបានបើកបង្អួចកញ្ចក់ មើលឃើញប្ដីដេកក៏យកសំបកកំប៉ុងស្រាបៀរគប់ទៅលើប្ដីលេងក្រែងប្តីដឹងខ្លួន ប៉ុន្តែប្តីនៅតែមិនភ្ញាក់ទៀត ។ ទើបហៅអ្នកជិតខាងឲ្យជួយគាស់ទ្វារ និងបង្អួចចេញ និងចូលទៅចាប់អង្រួនស្រាប់តែប្ដីស្លាប់សភាពរឹងបាត់ទៅហើយ ។
ក្រោយពេលកើតហេតុស្ត្រីជាប្រពន្ធទាំងបីនាក់នោះបានរាយការណ៍ជូននគរបាលឲ្យចុះទៅពិនិត្យ និងកោសល្យវិច្ច័យហើយ នគរបាលបានសន្និដ្ឋានថា បុរនេះពិតជាស្លាប់ដោយសារជំងឺគាំងបេះដូងពិតប្រាកដមែន រួចបានប្រគល់សពជូនប្រពន្ធនាំយកទៅធ្វើបុណ្យតាមប្រពៃណីរៀងៗខ្លួនតែម្ដង ៕
ចែករំលែកព័តមាននេះ