ខេត្តមណ្ឌលគិរី ៖ ថវិកាចំនួន១២៩០០០០០០រៀល ត្រូវបានរដ្ឋបាលខេត្តមណ្ឌលគិរីផ្តល់ជាអំណោយសប្បុរសធម៌ដល់ខេត្តចំនួនពីរ ដែលរងគ្រោះពីជំនន់ទឹកទន្លេមេគង្គ កាលពីពេលថ្មីៗនេះ ខណៈនៅមណ្ឌលគិរី គឺជាខេត្តមួយមានសំណាងល្អ ព្រោះជាតំបន់ភ្នំមិនមានការគំរាមកំហែងពីគ្រោះធម្មជាតិនេះឡើយ។ យោងតាមរបាយការណ៍របស់រដ្ឋបាលខេត្តមណ្ឌលគិរីបានឲ្យដឹងថា…
ខេត្តមណ្ឌលគិរី ៖ ថវិកាចំនួន១២៩០០០០០០រៀល ត្រូវបានរដ្ឋបាលខេត្តមណ្ឌលគិរីផ្តល់ជាអំណោយសប្បុរសធម៌ដល់ខេត្តចំនួនពីរ ដែលរងគ្រោះពីជំនន់ទឹកទន្លេមេគង្គ កាលពីពេលថ្មីៗនេះ ខណៈនៅមណ្ឌលគិរី គឺជាខេត្តមួយមានសំណាងល្អ ព្រោះជាតំបន់ភ្នំមិនមានការគំរាមកំហែងពីគ្រោះធម្មជាតិនេះឡើយ។
យោងតាមរបាយការណ៍របស់រដ្ឋបាលខេត្តមណ្ឌលគិរីបានឲ្យដឹងថា កាលពីថ្ងៃទី៤ សីហា ២០១៨ លោក ស្វាយ សំអ៊ាង អភិបាលខេត្តបាននាំយកថវិការចំនួន៦៨២០០០០០រៀល ជូនដល់រដ្ឋបាលខេត្តស្ទឹងត្រែងដើម្បីទិញអង្ករចែកជូនប្រជាពលរដ្ឋ ដែលកំពុងរងគ្រោះដោយសារការជន់លិចផ្ទះសម្បែងក្នុងខេត្តស្ទឹងត្រែង។
របាយការណ៍ដដែលបន្តថា នៅថ្ងៃទី៧ សីហា ២០១៨ ថវិកាចំនួន៦០៨០០០០០រៀលបន្ថែមទៀតត្រូវបានលោក ស្វាយ សំអ៊ាង នាំយកទៅជូនរដ្ឋបាលខេត្តក្រចេះ ដើម្បីបន្តទិញស្បៀងអាហារទុកចែនជូនប្រជាពលរដ្ឋក្នុងតំបន់រងគ្រោះដែលលិចលង់ដោយទឹកទន្លេមេគង្គ។
លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរីឲ្យកោះសន្តិភាពដឹងថា «ដោយសាររដូវនេះជារដូវភ្លៀងធ្លាក់ជាប្រចាំ ធ្វើឲ្យមានខ្យល់កន្ត្រាក់ប៉ើងដំបូលផ្ទះប្រជាពលរដ្ឋចំនួន៧ខ្នង ប្រក់សង្ក័សី និងផ្ទះ២ខ្នងបានធ្លាក់ពីលើជើងតាង និងរប៉ើងដំបូលនៅស្រុកកែវសីមា និងស្រុកកោះញែក តែមិនមានមនុស្សណាម្នាក់រងរបួសឡើយ»។
លោកឧត្តមសេនីយ៍ស្នងការបន្តថា «ក្នុងនាមថ្នាក់ដឹកនាំខេត្តយើងបានធ្វើការផ្សព្វផ្សាយដល់ប្រជាពលរដ្ឋអោយមានការប្រុងប្រយត្ន័ខ្ពស់ចំពោះគ្រោះថ្នាក់ធម្មជាតិ ដែលអាចកើតឡើងជាយថាហេតុ ពិសេសប្រជាពលរដ្ឋដែលនៅជាប់ដងទន្លេស្រែពកឲ្យមានការប្រុងប្រយត្ន័ចំពោះទឹកជំនន់ និងបានឲ្យអាជ្ញាធរមូលដ្ឋានត្រៀមរកទីទួលសុវត្ថិភាពដើម្បីសង្គ្រោះពេលមានគ្រោះមហន្តរាយកើតឡើង ។ចំពោះតំបន់ខ្ពង់រាប និងទីប្រជុំជនផ្សេងៗស្នើរឲ្យប្រុងប្រយត្ន័ចំពោះខ្យល់កន្ត្រាក់ និងផ្គររន្ទះ»។
លោកស្នងការបញ្ជាក់ថា«ដើម្បីត្រៀមសង្គ្រោះប្រជាពលរដ្ឋពេលមានគ្រោះមហន្តរាយកើតឡើង ស្នងការនៃស្នងការដ្ឋាននគរបាលខេត្តបានត្រៀមកំលាំងនគរបាលចំនួន២០០នាក់ រថយន្តពេទ្យសង្គ្រោះ១គ្រឿង រថយន្តនគរបាលចំនួន៦គ្រឿងត្រៀមជន្លៀសប្រជាពលរដ្ឋពេលមានគ្រោះមហន្តរាយកើតឡើង»។
ទោះជាយ៉ាងណា គិតត្រឹមម៉ោង២នឹង៣០នាទីរសៀលថ្ងៃទី២០ សីហា ២០១៨ កោះសន្តិភាពមិនអាចសុំការបញ្ជាក់បន្ថែមពីលោក ស្វាយ សំអ៊ាង អភិបាលខេត្តមណ្ឌលគិរីបានទេ ជុំវិញវិធានការបម្រុងទុករបស់រដ្ឋបាលខេត្តលើការជួយសង្គ្រោះជនរងគ្រោះដែលជួបគ្រោះមហន្តរាយដោយសារធម្មជាតិដែលអាចកើតមានជាយថាហេតុ៕
ចែករំលែកព័តមាននេះ