ខេត្តកំពង់ឆ្នាំង ៖ ប្រជាជនវៀតណាមជាច្រើនពាន់នាក់ ដែលកំពុងស្នាក់នៅលើទឹកដីខេត្តកំពង់ឆ្នាំង កាលពីព្រឹកថ្ងៃទី៧ សីហា បាននាំគ្នាសម្រុកមកកាន់ស្នងការដ្ឋាននគរបាលខេត្ត ដើម្បីបង់អាករសុំប័ណ្ណស្នាក់នៅរយៈពេល២ឆ្នាំបន្តទៀត បន្ទាប់ពីប័ណ្ណអាករចាស់ផុតសុពលភាព ។…
ខេត្តកំពង់ឆ្នាំង ៖ ប្រជាជនវៀតណាមជាច្រើនពាន់នាក់ ដែលកំពុងស្នាក់នៅលើទឹកដីខេត្តកំពង់ឆ្នាំង កាលពីព្រឹកថ្ងៃទី៧ សីហា បាននាំគ្នាសម្រុកមកកាន់ស្នងការដ្ឋាននគរបាលខេត្ត ដើម្បីបង់អាករសុំប័ណ្ណស្នាក់នៅរយៈពេល២ឆ្នាំបន្តទៀត បន្ទាប់ពីប័ណ្ណអាករចាស់ផុតសុពលភាព ។
លោក ប៉ាន់ ឡៃឃាង នាយការិយាល័យគ្រប់គ្រងជនបរទេសនៃស្នងការដ្ឋាននគរបាលខេត្តបានឱ្យដឹងថា នាយកដ្ឋានគ្រប់គ្រងជនបរទេសរបស់ក្រសួងមហាផ្ទៃ បានចុះមកធ្វើពន្ធអាករសុំប័ណ្ណស្នាក់នៅរបស់ជនជាតិវៀតណាមដែលកំពុងរស់នៅលើទឹកដីខេត្តកំពង់ឆ្នាំង ។ ចំណែកការិយាល័យគ្រប់គ្រងជនបរទេសរបស់ស្នងការដ្ឋាននគរបាលខេត្ត គ្រាន់តែជាអ្នកសហការសម្រួលការងារឱ្យងាយស្រួលតែប៉ុណ្ណោះ ។
បើតាមតួលេខដូចរៀងរាល់២ឆ្នាំម្តង ការងារនេះមិនអាចធ្វើត្រឹមតែ១ឬ២ថ្ងៃចប់នោះទេគឺអាចច្រើនថ្ងៃជាងនេះ ។ លោកបញ្ជាក់ថា ជនជាតិវៀតណាមដែលមកកាន់ស្នងការដ្ឋាននគរបាលខេត្តថ្ងៃនេះ គឺដើម្បីបង់អាករសុំប័ណ្ណស្នាក់នៅរយៈពេល២ឆ្នាំបន្តទៀត ។ តម្លៃអាករប័ណ្ណស្នាក់នៅរយៈពេល២ឆ្នាំ ក្នុងម្នាក់ថ្លៃ២៥ម៉ឺនរៀល សម្រាប់អ្នកដែលមានអាយុចាប់ពី១៨ឆ្នាំឡើងទៅ ហើយបើតាមតួលេខធ្លាប់ធ្វើកាលពី២ឆ្នាំមុន ជនជាតិវៀតណាមមានអាយុចាប់ពី១៨ឆ្នាំឡើងក្នុងខេត្តកំពង់ឆ្នាំងមានចំនួន១០.០៨៧នាក់ ។
លោកនាយការិយាល័យគ្រប់គ្រងជនបរទេសនៃស្នងការដ្ឋាននគរបាលខេត្ត បញ្ជាក់ទៀតថា មិនមែនតែប្រទេសកម្ពុជាទេដែលមានជនអន្តោប្រវេសន៍ នៅជុំវិញសាកលលោកប្រទេសណាក៏មានជនអន្តោប្រវេសន៍ស្នាក់នៅដែរ ហើយអ្នកទាំងនោះត្រូវតែគោរពទៅតាមលក្ខខណ្ឌច្បាប់នៃប្រទេសដែលខ្លួនស្នាក់នៅ និងត្រូវបង់ការស្នាក់នៅដូចៗគ្នា ។ តួលេខរបស់ការិយាល័យគ្រប់គ្រងជនបរទេសនៃស្នងការដ្ឋាននគរបាលខេត្តកាលពីឆ្នាំ២០១៦ បានឱ្យដឹងថា មានជនជាតិវៀតណាមស្នាក់នៅលើទឹកដីខេត្តកំពង់ឆ្នាំង ចំនួន២.០៣៤
គ្រួសារ ក្នុងនោះរស់នៅក្នុងក្រុងកំពង់ឆ្នាំង មាន៧៥៥គ្រួសារ ស្រុកបរិបូណ៌៨០៦គ្រួសារ និងស្រុក
កំពង់ត្រឡាច២០២គ្រួសារ ៕
ចែករំលែកព័តមាននេះ