រាជធានីភ្នំពេញ ៖ នាងក្រមុំម្នាក់បានបាត់ខ្លួនពីផ្ទះរយៈពេល៣ថ្ងៃ ហើយបន្ទាប់ពីបាត់ខ្លួន១ថ្ងៃ បុរសជាឪពុក ក៏បានទៅដាក់ពាក្យបណ្តឹងនៅប៉ុស្តិ៍នគរបាលសង្កាត់ព្រៃស ឱ្យជួយអន្តរាគមន៍ ។ បុរសជាឪពុកបានរៀបរាប់ប្រាប់នគរបាលថា កូនស្រីគាត់បានចាកចេញពីផ្ទះដោយយកម៉ូតូ កាបូបសៀវភៅ ព្រមទាំងខោ អាវទៅជាមួយផងដែរ ។
លុះ៣ថ្ងៃក្រោយមក ស្រាប់តែនាងទូរស័ព្ទឱ្យគាត់ជាឪពុកម្ដាយ ទៅយកនាងនៅភ្នំពេញ ដោយប្រាប់ថា នាងត្រូវជនមិនស្គាល់មុខចាប់រុញបញ្ចូលក្នុងរថយន្ត នាំយកទៅបង្ខាំងទុកនៅក្នុងផ្ទះមួយនៅឯខណ្ឌចំការមន ។ បន្ទាប់ពីទទួលបានដំណឹងនេះភ្លាម នគរបាលបានបើកការស្រាវជ្រាវភ្លាមៗដែរ ប៉ុន្តែរកទីតាំងដែលនាងអះអាងថា ត្រូវគេបង្ខាំងនោះ មិនទាន់ឃើញនៅឡើយ ហើយករណីនេះ នគរបាលក៏មិនទាន់មានការជឿជាក់ថា ពិតឬមិនពិតនៅឡើយដែរ ។
តាមពាក្យបណ្តឹងថា នាងក្រមុំបានបាត់ខ្លួន កាលពីវេលាម៉ោង៣រសៀលថ្ងៃទី៣ ខែសីហា ខណៈទៅរៀន
កួនៅវិទ្យាល័យទួលអំពិល ស្ថិតក្នុងភូមិតាឡី សង្កាត់ដង្កោ ខណ្ឌដង្កោ ។ បន្ទាប់មក បុរសជាឪពុកបានដាក់ពាក្យប្ដឹងនៅប៉ុស្តិ៍នគរបាលព្រៃសឱ្យជួយអន្តរាគមន៍តាមរក នាវេលាម៉ោង១១ព្រឹកថ្ងៃទី៤ ខែសីហា ។
បុរសជាឪពុកនិយាយថា កូនស្រីរបស់គាត់ ដែលបាត់នេះឈ្មោះ ស៊ុម ណាវិន អាយុ១៨ឆ្នាំ ជាសិស្សថ្នាក់ទី១២នៅវិទ្យាល័យទួលអំពិល សព្វថ្ងៃមានលំទីនៅក្នុងភូមិពាម សង្កាត់ព្រៃស ខណ្ឌដង្កោ ។ កាលពី៣ថ្ងៃមុន គឺនៅថ្ងៃទី៣ ខែសីហា នាងបានជិះម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៣ ពណ៌ខ្មៅ ពាក់ផ្លាកលេខ ភ្នំពេញ ១BO-៩៩២៧ ចាកចេញពីផ្ទះទៅរៀនកួ ហើយក៏ស្រាប់តែបាត់ខ្លួនរហូត ។
នៅព្រឹកថ្ងៃទី៤ ខែសីហា កូនស្រីគាត់បានទូរស័ព្ទមក ហើយគាត់បានស្តាប់ឮកូនស្រីស្រែកឱ្យជួយបានត្រឹមតែ២ ទៅ៣ម៉ាត់ប៉ុណ្ណោះ ក៏ស្រាប់តែដាច់ទៅវិញ ។ ខណៈនោះ គាត់បានទូរស័ព្ទទៅវិញដែរ ប៉ុន្តែហៅលែងចូលរហូត ទើបនៅវេលាម៉ោង១១ព្រឹកថ្ងៃដដែលនោះ គាត់ក៏ទៅដាក់ពាក្យបណ្ដឹងសុំឱ្យនគរបាលជួយអន្តរាគមន៍ ។ លុះមកដល់វេលាម៉ោង៦ល្ងាចថ្ងៃទី៥ ខែសីហា ទូរសព្ទ័របស់គាត់បានរោទ៍ ពេលលើកស្តាប់ស្រាប់តែឮសំឡេងកូនស្រី ហៅគាត់ឲ្យទៅទទួលនាងនៅប៉ុស្តិ៍នគរបាលបឹងកេងកងទី២ ខណ្ឌចំការមន ទើបរូបគាត់មានអារម្មណ៍ត្រេកអរយ៉ាងខ្លាំង ។
ភ្លាមៗនោះ គាត់បានទៅរកកូនស្រី លុះពេលបានជួបឃើញកូនមានអាការខ្សោយអស់កម្លាំងល្ហិតល្ហៃ និយាយលែងចង់រួចទៅហើយ ចំណែកម៉ូតូ និងសម្ភារទាំងអស់បាត់អស់គ្មានសល់ឡើយ ។ ប្រភពដដែលបន្តថា ខណៈនោះគាត់បានសួរកូនស្រីថា មានរឿងអ្វីកើតឡើង ហើយនាងប្រាប់ថា ពេលនាងចេញទៅរៀនកួត្រូវជនមិនស្គាល់មុខចាប់ញាត់ចូលរថយន្ត ហើយយកទៅបង្ខាំងទុកក្នុងភូមិគ្រឹះមួយក្នុងខណ្ឌចំការមន ប៉ុន្តែនាងមិនបានចាំទីតាំងនោះឡើយ ។
នាងប្រាប់ថា នៅក្នុងភូមិគ្រឹះនោះ មានក្មេងស្រី១០នាក់ទៀត ក៏ត្រូវគេបង្ខាំងទុកអត់បាយក្រហាយទឹកដូចនាងដែរ ប៉ុន្តែនាងមានសំណាងបានរត់ចេញរួច និងស្រែកឱ្យគេជួយ ហើយត្រូវគេនាំមកកាន់ប៉ុស្តិ៍នគរបាលបឹងកេងកងទី២ ។
ទាក់ទិនទៅនឹងហេតុការណ៍នេះ នគរបាលខណ្ឌដង្កោនិយាយថា មិនទាន់មានការជឿជាក់ទាំងស្រុងនៅឡើយទេ ព្រោះកាលពីថ្ងៃទី៤ ខែសីហា បុរសជាឪពុកបានទៅដាក់ពាក្យបណ្ដឹងសុំឱ្យនគរបាលប៉ុស្តិ៍ព្រៃសជួយអន្តរាគមន៍ ។ លុះ៣ថ្ងៃក្រោយមក គឺនៅព្រឹកថ្ងៃទី៦ ខែសីហា បែរជាថា កូនស្រីត្រូវជនមិនស្គាល់មុខចាប់ញាត់ចូលរថយន្តយកទៅបង្ខាំងទុកទៅវិញ ។
ប្រភពដដែលបន្តថា ដោយឡែក ចំណុចមួយទៀត នាងថាត្រូវគេបង្ខាំងទុកនៅក្នុងភូមិគ្រឹះ ហើយបានលួចរត់ចេញរួច និងស្រែកឱ្យគេជួយថែមទៀតផង ក៏គួរតែមានការភ្ញាក់ផ្អើលខ្លាំង ហើយនៅត្រង់ចំណុចដែលនាងស្រែកនោះ មិនមែនស្ងាត់ទេ ។ ម្យ៉ាងទៀត បើនាងស្រែក ទោះជានាងមិនបានចាំថា ភូមិគ្រឹះដែលបង្ខាំងរូបនាង និងក្មេងស្រី១០នាក់ទៀតនោះ ក៏គង់តែអ្នកដែលឃើញនាងរត់ចេញស្រែកឱ្យជួយនោះស្គាល់ដែរ ។
ទោះបីជាបែបណា ក្រោយពេលទទួលបានដំណឹងពីនាងបែបនេះ កម្លាំងនគរបាលខណ្ឌដង្កោ បានចុះទៅសហការជាមួយនគរបាលប៉ុស្តិ៍បឹងកេងកងទី២ រួមជាមួយកងរាជអាវុធហត្ថខណ្ឌចំការមន បើកការស្រាវជ្រាវភ្លាមៗ ក្នុងបំណងរំដោះក្មេងៗទាំង១០នាក់ដែលនាងក្រមុំបាននិយាយ ប៉ុន្តែរហូតមកដល់ល្ងាចថ្ងៃដដែល រកទីតាំងនោះមិនឃើញឡើយ ។
មន្ត្រីនគរបាលបញ្ជាក់ថា នៅល្ងាចថ្ងៃទី៦ ខែសីហា បុររសជាឪពុកត្រូវបានហៅឱ្យចូលទៅបំភ្លឺឡើងវិញ ហើយពេលនោះចម្លើយរបស់គាត់មិនបានប្រែប្រួលពីអ្វីដែលគាត់រៀបរាប់ពេលទៅដាក់ពាក្យបណ្ដឹងកាលពីថ្ងៃទី៤ ខែសីហានោះឡើយ ។ ប៉ុន្តែអ្វីដែលប្លែកនៅត្រង់ថា គាត់និយាយនៅកន្លែងនគរបាលអុីចឹងមែន តែពេលនិយាយជាមួយអ្នកកាសែតផ្សេងទៅវិញ ។ មិនតែប៉ុណ្ណោះ ពេលដែលនគរបាលសុំជួបបំភ្លឺផ្ទាល់ពីកូនស្រីគាត់ដែលជាតួអង្គសំខាន់ បែរជាគាត់មិនព្រមសហការឱ្យជួបទេ គឺបានទុកកូនស្រីនៅក្នុងផ្ទះមិនឱ្យចេញជួបនគរបាលឡើយ ។
ចែករំលែកព័តមាននេះ