ខេត្តកណ្តាល ៖ សេចក្តីរាយការណ៍ឱ្យដឹងថា រថយន្តកាមរីបាឡែន១គ្រឿង សង្ស័យឆ្លងចរន្តអគ្គិសនី ខណៈម្ចាស់កំពុងបើកៗ ស្រាប់តែចេញអណ្តាតភ្លើងពីម៉ាសុីនខាងមុខឆាបឆេះយ៉ាងសន្ធោសន្ធៅ ។ ហើយសំណាងល្អណាស់ ដែលមិនបង្កឱ្យមានគ្រោះថ្នាក់ដល់មនុស្ស ។
ហេតុការណ៍ដ៏រន្ធត់នេះ កើតឡើងកាលពីវេលាម៉ោង០៤ និង៥០នាទីរសៀលថ្ងៃទី២៦ កក្កដា ស្ថិតនៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រ54-55 ស្ថិតក្នុងភូមិក្បាលជ្រោយ ឃំុកំពង់ភ្នំ ស្រុកលើកដែក ខេត្តកណ្តាល ។
សមត្ថកិច្ចក៏បានឱ្យដឹងដែរថា នៅមុនពេលកើតហេតុ គេឃើញរថយន្តមួយគ្រឿង ប្រភេទកាមរីបាឡែន
ពណ៌ទឹកប្រាក់ ពាក់ស្លាកលេខស្វាយរៀង2A-2382 បើកបរដោយបុរសម្នាក់ ដែលគេស្គាល់ឈ្មោះងិនសុបិន ភេទប្រុស អាយុ២៩ឆ្នាំ ជាជាងជាងសំណង់ មានទីលំនៅភូមិត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង ។
ប្រភពបន្តថា អ្នកបើកបរបានធ្វើដំណើរក្នុងទិសដៅពីភ្នំពេញ ទៅអ្នកលឿង ។ លុះបើកមកដល់ចំណុចខាងលើ ក៏ស្រាប់តែមានផ្សែងនិងអណ្តាតភ្លើងឆេះចេញពីម៉ាសុីខាងមុខយ៉ាងសន្ធោសន្ធៅតែម្តង ។ ភ្លាមនោះ ម្ចាស់រថយន្តបានបើកទ្វាររត់ចេញក្រៅទាន់ ។ លុះពេលឃើញដូច្នេះ ប្រជាពលរដ្ធនិងកម្លាំងសមត្ថកិច្ចក៏នាំគ្នាជួយអន្តរាគមន៍ យកបំពង់បាញ់ពន្លត់ដែរ តែដោយសារអណ្តាតភ្លើងឆាបឆេះខ្លាំងពេក ទើបមិនអាចគ្រប់គ្រងស្ថានការណ៍បាន បណ្តាលឱ្យអស់នៅសល់តែគ្រោងឆ្អឹងរថយន្តតែប៉ុណ្ណោះ ។
ចែករំលែកព័តមាននេះ