រាជធានីភ្នំពេញ ៖ កងរាជអាវុធហត្ថលើផ្ទៃប្រទេសបានប្រកាសថា ការបង្ហោះព័ត៌មានតាមបណ្តាញសង្គមហ្វេសបុ៊ករបស់គណនីឈ្មោះ «យមរាជ លោកីយ៍» និងការផ្សព្វផ្សាយតាមប្រព័ន្ធព័ត៌មានមួយចំនួន ដែលជាព័ត៌មានមិនពិត បានធ្វើឱ្យប៉ះពាល់ដល់កិត្តិយសរបស់កងរាជអាវុធហត្ថ ។…
រាជធានីភ្នំពេញ ៖ កងរាជអាវុធហត្ថលើផ្ទៃប្រទេសបានប្រកាសថា ការបង្ហោះព័ត៌មានតាមបណ្តាញសង្គមហ្វេសបុ៊ករបស់គណនីឈ្មោះ «យមរាជ លោកីយ៍» និងការផ្សព្វផ្សាយតាមប្រព័ន្ធព័ត៌មានមួយចំនួន ដែលជាព័ត៌មានមិនពិត បានធ្វើឱ្យប៉ះពាល់ដល់កិត្តិយសរបស់កងរាជអាវុធហត្ថ ។ សេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេស ត្រូវបានផ្សព្វផ្សាយនៅរសៀលថ្ងៃទី១៥ ខែកក្កដា ។
ការចេញសេចក្តីប្រកាសព័ត៌មានរបស់កងរាជអាវុធលើផ្ទៃប្រទេសនេះ ដោយសារប៉ុន្មានថ្ងៃនេះ គណនី
ហ្វេសបុ៊ក «យមរាជ លោកីយ៍» ដែលមានឈ្មោះ សន សំនៀង អតីតជានាយកងរាជអាវុធហត្ថខេត្តកំពង់ធំ ដែលត្រូវបានលុបឈ្មោះចេញពីក្របខណ្ឌកងរាជអាវុធហត្ថ ដោយក្រុមប្រឹក្សាវិន័យកងរាជអាវុធហត្ថលើផ្ទៃប្រទេស តាំងពីឆ្នាំ២០១៧ បាននិយាយព័ត៌មានមិនពិត ។
តាមសេចក្តីប្រកាសព័ត៌មានរបស់អ្នកនាំពាក្យកងរាជអាវុធហត្ថថា ការលុបឈ្មោះនេះ ដោយសារបុគ្គលឈ្មោះ សន សំនៀង ប្រព្រឹត្តខុសឆ្គងជាបន្តបន្ទាប់ម្តងហើយម្តងទៀត ដូចជាបង្កគ្រោះថ្នាក់ចរាចរណ៍បណ្តាលឱ្យមនុស្សស្លាប់នៅនឹងកន្លែង បាញ់បោះសេរី និងបានប្រើហិង្សាលើបងថ្លៃស្រីម្នាក់ បណ្តាលឱ្យសន្លប់ ។
បើតាមសេចក្តីប្រកាសព័ត៌មានដដែលបញ្ជាក់ថា កងរាជអាវុធហត្ថលើផ្ទៃប្រទេស ទុកឱកាសឱ្យបុគ្គលឈ្មោះ សន សំនៀង ដើម្បីបញ្ឈប់ការផ្សព្វផ្សាយព័ត៌មានមិនពិតនេះ ហើយបើសិនបើបុគ្គលនេះ នៅតែបន្តផ្សាយព័ត៌មានមិនពិត ដែលធ្វើឱ្យប៉ះពាល់ដល់កិត្តិយសរបស់កងរាជអាវុធហត្ថទៀត បុគ្គលនេះនឹងត្រូវបានចាត់ការតាមផ្លូវច្បាប់ ។
ឈ្មោះ សន សំនៀង គឺជាអតីតមេបញ្ជាការរងកងអាវុធហត្ថស្រុកបារាយណ៍ មានឋានន្តរស័ក្តិជាអនុសេនីយ៍ឯក ។ ការ Live តាមបណ្តាញសង្គមនោះ ត្រូវបានលោក សន សំនៀង ដែលមានគណនីឈ្មោះ
«យមរាជ លោកីយ៍» លាតត្រដាងរឿងរ៉ាវជាច្រើន ដែលលោកចាត់ទុកថា ជារឿងអយុត្តិធម៌ តែងតែកើតឡើងចំពោះមន្ត្រីស្លូតត្រង់ និងក៏បានអំពាវនាវដល់ប្រមុខរាជរដ្ឋាភិបាលឲ្យជួយផងដែរ ។
ការទម្លាយធ្វើឱ្យមានការភ្ញាក់ផ្អើល និងបានញ័រកក្រើកពេញបណ្តាញសង្គមហ្វេសប៊ុកនោះ គឺការនិយាយទាក់ទិនទៅនឹងការចាប់គ្រឿងញៀនទម្ងន់១៧២គីឡូក្រាម ដែលជាចំនួនមួយដ៏ច្រើនបំផុតដែលជាទូទៅគេមិនបានដឹងនោះទេ ពីការចាប់គ្រឿងញៀននោះកាលពីឆ្នាំ២០១៣ ។
តាមម្ចាស់គណនី «យមរាជ លោកីយ៍»ឈ្មោះ សន សំនៀង ថា ដោយសារតែការចាប់គ្រឿងញៀននោះហើយ ទើបលោកត្រូវរលាយទាំងគ្រួសាររហូតក្លាយទៅជាមនុស្សសំរាម ។ ពេលនេះការShareតៗគ្នាហាក់កំពុងកក្រើកញាប់ញ័រ ស្របពេលដែលឈ្មោះ សន សំនៀង អង្គុយLiveក្នុងរថយន្តរហូតកម្លាំងកងរាជអាវុធហត្ថព័ទ្ធចាប់ខ្លួនកាលពីថ្ងៃទី១៥ ខែកក្កដា ។
ជុំវិញការចាប់ខ្លួននេះ សមត្ថកិច្ចកងរាជអាវុធហត្ថខេត្តកំពង់ធំមិនបានផ្តល់ព័ត៌មានណាមួយដល់ក្រុមអ្នករាយការណ៍ព័ត៌មាននោះឡើយ ។អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី នៅព្រឹកថ្ងៃទី១៧ ខែកក្កដា បានបញ្ជាក់ប្រាប់អង្គភាពព័ត៌មានក្នុងស្រុកមួយថា ម្ចាស់គណនីហ្វេសបុ៊កឈ្មោះ «យមរាជ លោកីយ៍» មានឈ្មោះពិត សន សំនៀង ត្រូវបានកម្លាំងអាវុធហត្ថខេត្តកំពង់ធំបញ្ជូនទៅសាលាដំបូងខេត្តហើយ ដើម្បីចាត់ការតាមនីតិវិធី ។
លោកឧត្តមសេនីយ៍ត្រី អេង ហ៊ី បានបញ្ជាក់ថា នៅថ្ងៃទី១៨ ខែកក្កដា អាវុធហត្ថនឹងធ្វើសន្និសីទសារព័ត៌មានជុំវិញការចាប់ខ្លួន និងការប្រព្រឹត្តបទល្មើសរបស់ជនខាងលើនេះ ។ ឯចំពោះពេលវេលានិងទីកន្លែង ដែលនឹងធ្វើរៀបចំសន្និសីទសារព័ត៌មានត្រូវបានគ្រោងធ្វើនៅបញ្ជាការដ្ឋានលើផ្ទៃប្រទេស ។
ជាការកត់សម្គាល់ ម្ចាស់គណនីហ្វេសប៊ុកល្បីឈ្មោះជាច្រើននាក់ដែលកំពុងតាមដានពីបញ្ហានេះបាននិយាយថា តាមរយៈការLiveដែលទទួលបាននូវការចូលមើលច្រើនបំផុតនោះ គឺឈ្មោះ សន សំនៀង បាននិយាយពីរឿងរ៉ាវជាច្រើនដែលបង្ហាញថា ជាការផ្តល់ភាពអយុត្តិធម៌សម្រាប់រូបគាត់ ពិសេសបង្ហាញទាក់ទិននឹងការចាប់បានគ្រឿងញៀន ដែលបុគ្គលរូបនេះថា មានចំនួនរហូតដល់១៧២គីឡូក្រាម និងបានបង្ហាញឯកសារដែលខ្លួនមានជាតឹកតាងផង ។
តាមមើលទៅ បញ្ហាកក្រើកក្នុងបណ្តាញសង្គមហ្វេសប៊ុកនេះ ប្រសិនបើគ្មានការបកស្រាយឱ្យមានតម្លាភាពទេនោះ ការមន្ទិលសង្ស័យប្រហែលជាមិនអាចបញ្ចប់បាននៅក្រោយពេលធ្វើសន្និសីទសារព័ត៌មានថ្ងៃនេះ៕
ចែករំលែកព័តមាននេះ