អច្ឆរិយៈធម្មជាតិនៃដើមព្រីងទឹកមួយគូ ត្រូវបានអ្នកភូមិចាត់ទុកថា គឺជាដើមព្រីងស្នេហា ខណៈបានដុះជាប់គ្នាប្រមាណជិត២០ឆ្នាំមកហើយ នៅនឹងមាត់អូរតាម៉ូនៃព្រំចម្ការកាកាវមួយកន្លែង ស្ថិតក្នុងភូមិបញុកក្នុង ឃុំសាមគ្គី ស្រុកអូរជុំ ខេត្តរតនគិរី ។
ដើមព្រីងស្នេហាមួយគូនេះ មានទំហំប្រហែលជា២០ស.ម កម្ពស់ប្រមាណ១២ម៉ែត្រ ហើយដៃទាំងពីររបស់វាមានប្រវែងជាង១ម៉ែត្រ បានតោងគ្នារលាយជាសាច់មួយនៅកម្ពស់ប្រមាណជា៤ម៉ែត្រ ពីគល់។ ចំណងស្នេហ៍ដើមព្រីងទឹកមួយគូនេះ ហាក់មាំជាងស្នេហានៃមនុស្សលោកផងក៏ថាបាន ។
អច្ឆរិយៈដើមព្រីងស្នេហ៍ បានធ្វើឱ្យដើមឆ្ពង់ទោលគ្មានគូដ៏ធំមួយ ប្រវែង១២ម៉ែត្រដុះក្បែរនោះ ហាក់ចុកឈាមក៏រលំដួលដោយគ្មានមូលហេតុជាង២ឆ្នាំមកហើយដែរ មកគ្របពីលើមាត់អូរតាម៉ូ ដើម្បីដេកចាំមើលដំណើរស្នេហ៍អមតៈនៃដើមព្រីងទឹកមួយគូនេះ ។
តែទោះជាយ៉ាងណា ដើមឆ្ពង់នោះក៏បានក្លាយជាស្ពានមួយ សម្រាប់ឆ្លងកាត់អូរ ដើម្បីឱ្យអ្នកភូមិជនជាតិនៅក្បែរនោះឆ្លងកាត់ ។ ហើយនេះ គឺជាការតភ្ជាប់រវាងការអភិវឌ្ឍន៍ពីត្រើមខាង ទៅនឹងចម្ការដំណាំតូចៗរបស់បងប្អូនជនជាតិភាគតិចផងដែរ ។
បើតាមការឱ្យដឹងពីអ្នកដែលរស់នៅតំបន់នោះថា ប្រសិនជាដើមណាមួយត្រូវបានកាប់បំផ្លាញនោះ ដើមទី២ក៏នឹងងាប់ទៅជាមួយគ្នាផងដែរ ។ បើដូច្នេះមែន នេះគឺជាភាពអច្ឆរិយៈធម្មជាតិដ៏អស្ចារ្យមួយដ៏កម្រនឹងបានជួបណាស់ក្នុងលោក ។
ចែករំលែកព័តមាននេះ