រាជធានីភ្នំពេញ ៖ មានការរិះគន់យ៉ាងពេញទំហឹងក្នុងពេលកីឡាករដែលត្រូវគេស្គាល់ថា ជាជើងខ្លាំងម្នាក់មកពីប្រទេសថៃ គឺកីឡាករជប៉ុន Takaya ទទួលការបរាជ័យក្នុងជំហានទី១ មកកាន់សង្វៀនកម្ពុជា ក្នុងពេលគេជាជើងខ្លាំងទទួលការបង្វឹកនៅក្នុង ប្រទេសថៃ…
រាជធានីភ្នំពេញ ៖ មានការរិះគន់យ៉ាងពេញទំហឹងក្នុងពេលកីឡាករដែលត្រូវគេស្គាល់ថា ជាជើងខ្លាំងម្នាក់មកពីប្រទេសថៃ គឺកីឡាករជប៉ុន Takaya ទទួលការបរាជ័យក្នុងជំហានទី១ មកកាន់សង្វៀនកម្ពុជា ក្នុងពេលគេជាជើងខ្លាំងទទួលការបង្វឹកនៅក្នុង
ប្រទេសថៃ និងឡើងប្រកួតស្ទើរគ្រប់សង្វៀនប្រទេសនានានាពេលកន្លងមក ។ ផ្ទុយពីការអះអាងដែលថា កីឡាករជប៉ុនរូបនេះមានថ្វីដៃខ្លាំងក្លា បែរជាទៅអត់រួចជាមួយ វ៉ែន សុវណ្ណ ដែលជាកីឡាករជើងចាស់ និងធា្លក់ដៃរួចទៅហើយ។
គ្មានអ្នកណាមិនដឹងនោះទេថា Takaya គឺជាកីឡាករជប៉ុនល្អម្នាក់ ដែលពិបាកនឹងដាក់ដៃគូឱ្យយកឈ្នះដោយស្រួលនៅលើសង្វៀន ចាប់តាំងពីកីឡាកររូបនេះត្រូវគេដឹងថាមានប្រវត្តិឡើងរេញរាប់មិនអស់នៅក្នុងប្រទេសថៃមុនមកដល់កម្ពុជា ។ ការប្រកួតកាលពីថ្ងៃអាទិត្យទី១០ មិថុនា នៅក្នុងព្រឹត្តិការណ៍ប្រដាល់ពេលព្រឹករបស់ទូរទស្សន៍អាស៊ីអាគ្នេយ៍ បានបង្ហាញលទ្ធផលធ្វើឱ្យគេមើលឃើញថា កីឡាករជប៉ុនរូបនេះ មិនមែនឡើងមកប្រកួតចេះតែឈ្នះ ដូចមុននោះទេ ប៉ុន្តែក៏ត្រូវកណ្ដាប់ដៃ និងការវាយបកពីកីឡាករកម្ពុជាឡើងទក់សាច់ផងដែរ ។
កីឡាករជប៉ុនដែលគេរំពឹងស៊ីកីឡាករកម្ពុជាផុយៗបែរជាត្រូវវ៉ែន សុវណ្ណ វាយបកវិញយ៉ាងចាស់ដៃធ្វើឱ្យអ្នកគាំទ្រដែលមុននេះបុកពោះខ្លាចវ៉ែន សុវណ្ណ បាក់មុខក្នុងនាមជាកីឡាករកម្ពុជារីករាយផ្ដល់សំឡេងអបអរយ៉ាងកងរំពង ។គណៈកម្មការប្រកួតទើបតែប្រកាសថាTakaya គឺជាកីឡាករជើងខ្លាំងជប៉ុនមិនទាន់ផុតពីមាត់ផង គេឃើញកីឡាករកម្ពុជា វ៉ែន សុវណ្ណ បើកការវាយលុកភ្លាមៗតែម្ដងធ្វើឱ្យគេមើលឃើញកីឡាករកម្ពុជាមានសន្ទុះល្អជាង ។ នៅក្នុងទឹកទី២គ្រាន់ឃើញកីឡាករជប៉ុនមានឱកាសទប់ជាប់កណ្ដាប់ដៃកីឡាករកម្ពុជាខ្លះ ប៉ុន្តែឈានដល់ទឹកទី៣កីឡាករកម្ពុជាបានវាយលុកទល់
ច្រាំងដោយអន្លើ ។ មានការលើកឡើងថាកីឡាករ Takaya មិនសូវរឹងប៉ឹងជំហរដូចមុននោះទេ ទើបការប៉ះគ្នាជាមួយកីឡាករកម្ពុជា ធ្វើមិនសូវបានល្អដែលគេមើលឃើញថាធ្លាក់ដៃ ។ ទោះជាកីឡាករជប៉ុនប្រឹងទាត់ផង ម៉ាត់ផង ប៉ុន្តែគេឃើញកីឡាករកម្ពុជា នៅតែរក្សាក្រេឌីតបានល្អក្នុងការវាយចូលដាច់ឆ្ងាយ ក្នុងពេលជើងខ្លាំងមកពីប្រទេសថៃរូបនេះ ហាក់ដូចជារកចំណុចខ្សោយគូប្រកួតមិនបាន ហើយបែរជាត្រូវកីឡាកកម្ពុជាវាយត្រូវខ្ចប់ៗ។ តាំងពីចាប់ផ្ដើមបើកឆាក កីឡាករកម្ពុជាស្ទុះទាត់ជើងក្រោម ធ្វើឱ្យកីឡាករជប៉ុនរកស្នៀតទប់ទល់មិនជាប់នោះទេ ដោយការប្រើស្នៀតវាយសម្រុកដោយម៉ាត់ និងកែង ក៏ចូលមិនចុះជាមួយ វ៉ែន សុវណ្ណ ។
ក្នុងទឹកទី៣ កាន់តែធ្វើឱ្យកីឡាករជប៉ុនដែលគេស្គាល់ល្អមិនសល់សូម្បីតែថ្វីដៃ កែង និងជង្គង់ ទទួលរងការចាញ់ប្រៀបបន្ទាប់ពីត្រូវវ៉ែន សុវណ្ណ វាយចូលច្រើនអន្លើ ។ ថ្វីដ្បិតតែទឹកទី៤ និងទី៥គេប្រឹងប្រែងវាយធ្វើឱ្យអ្នកគាំទ្រពេញចិត្តបន្តិចក្ដី ក៏លទ្ធផលដែលបានស្ដែងឡើងបង្ហាញថា កម្រិតវាយលុករបស់គេនៅមិនទាន់បានល្អ សម្រាប់ការប្រកួត ។ ទោះបីយ៉ាងណា កីឡាករជប៉ុនរូបនេះមិនបានទទួលស្គាល់ថាកម្រិតវាយចេញរបស់ខ្លួនមិនបានល្អនោះទេ តែបានបន្ទោសថា អាជ្ញាកណ្ដាលចាប់ក្រៀកមិនឱ្យគេមានឱកាសវាយវិញ ទើបធ្វើឱ្យ វ៉ែន សុវណ្ណ ក្ដាប់ភាពជោគជ័យច្រើនជាង។
តំណាងកីឡាករថៃ បានបញ្ជាក់ជំនួសកីឡាករជប៉ុន Takayo ជាភាសាខ្មែរថា តាំងពីទឹកទី៣ រូបគេវាយមិនចូលកីឡាករកម្ពុជាតែម្ដង ដោយសារតែពេលចូលកៀក ឬស្ទុះឱបគ្រោងឡើងជង្គង់ក៏ត្រូវអាជ្ញាកណ្ដាលបំបែក ហើយឱ្យស្ទុះសម្រុកអស់ពីសមត្ថភាពយ៉ាងម៉េចក៏មិនស្រួលដូចការចង់បាន ។ លោកថា បើកីឡាករកម្ពុជាវាយសម្រុកលើកីឡាករជប៉ុនមិនសូវមានការឃាត់ឃាំងនោះទេ ប៉ុន្តែបើកីឡាករជប៉ុនសម្រុកវាយបក គឺមានការខ្ទាស់ដោយស្នៀតរបស់លោកអាជ្ញាកណ្ដាលតែម្ដង ទើបធ្វើឱ្យលោកមិនចង់វាយ ។ ភាគីថៃដែលបាននាំកីឡាករជប៉ុនមកប្រកួតបានចាត់ទុកថា ការបរាជ័យដែលបានកើតឡើង គឺដោយសារតែកីឡាករកម្ពុជាមានប្រៀបល្អជាង និងដោយសារតែគេជាកីឡាករដែលទទួលបានឱកាសជ្រោមជ្រែងពីក្រុមអាជ្ញាកណ្ដាល ដោយលោកនិយាយយ៉ាងខ្លីថា បើការប្រកួតនោះធ្វើឡើងនៅក្នុងប្រទេសថៃ គឺមិនអាចទៅរួចជាមួយកីឡាករជប៉ុននោះទេ ។ តំណាងកីឡាករថៃនៅតែអះអាងថា Takayo អត់មានធ្លាក់ដៃទេ ប៉ុន្តែអាចបណ្ដាលមកពីគេធ្វើដំណើរផ្លូវឆ្ងាយមិនសូវស្រួលខ្លួនក្នុងពេលឡើងរេញ និងបណ្ដាលមកពីគេអន់ចិត្តរឿងចូលវ៉ៃលោកអាជ្ញាខ្ទាស់ៗផង ទើបលែងចង់វាយ។ យ៉ាងណាមិញ លោកថា កីឡាករ វ៉ែន សុវណ្ណ ប្រឹងប្រែងសម្បើមណាស់ គឺមិនមែនឈ្នះពិន្ទុដោយស្រួលទេ ទើបលោកថាបើទោះជាកីឡាករជប៉ុនបរាជ័យប៉ុន្តែក៏ចាញ់ដោយអស់ចិត្ត មិនមែនចាញ់ដោយធ្លាក់ដៃដូចការយល់ឃើញពីមនុស្សមួយចំនួនទេ។
ពាក់ព័ន្ធនឹងការចោទប្រកាន់នេះ លោកញាណ សុធី អ្នករៀបចំការប្រកួតបានអះអាងថា បើទោះជាការប្រកួតមួយនេះ គឺជាការប្រកួតអន្តរជាតិរវាងកីឡាករកម្ពុជា និងបរទេស
ក៏ដោយ ក៏សង្វៀនទូរទស្សន៍អាស៊ីអាគ្នេយ៍ មិនបានប្រកាន់ថា កីឡាករបរទេសត្រូវប្រើបច្ចេកទេសគាបដោយលោកអាជ្ញាកណ្ដាលនោះដែរ ដោយបញ្ហានេះប្រសិនមានមែន គឺអ្នកកាន់ជើងកីឡាករជប៉ុនពិតជាសម្ដែងប្រតិកម្ម។ លោកថា កីឡាករជប៉ុនទទួលបរាជ័យដោយមិនអស់ចិត្តរបស់ខ្លួន ឬមិនទទួលស្គាល់ចំពោះការធ្លាក់ដៃរបស់ខ្លួន ទើបធ្វើឱ្យមានការចោទប្រកាន់លើលោកអាជ្ញាកណ្ដាលនេះឡើង ។ លោកថា កីឡាករ Takayo ធ្លាប់តែប្រកួតស៊ីផុយលើកីឡាករកម្ពុជា ទើបចាញ់លើកនេះ គេមិនទទួលស្គាល់ចំពោះការបរាជ័យរបស់ខ្លួន៕
ចែករំលែកព័តមាននេះ