ខេត្តបាត់ដំបង ៖ សមត្ថកិច្ចបានឱ្យដឹងថា បុរសជាជាងរថយន្តម្នាក់ត្រូវកាប៊ីនរថយន្តធ្លាក់សង្កត់កៀបជាប់បណ្ដាលឱ្យស្លាប់យ៉ាងអាណោចអាធ័មបំផុត កើតឡើងនៅវេលាម៉ោង០២ និង៣០នាទីរសៀលថ្ងៃទី២២ឧសភា នៅត្រង់ចំណុចយាន្តដ្ឋានមួយកន្លែងយីហោ «ហុង ឆាយ» ស្ថិតក្នុងភូមិចម្ការប្ញស្សី សង្កាត់ព្រែកព្រះស្តេច ក្រុងបាត់ដំបង ខណ:ពេលកំពុងជួសជុលរថយន្តនោះ ។
បើតាមសមត្ថកិច្ចបានប្រាប់ថា ជនរងគ្រោះឈ្មោះពឿន មុន្នី អាយុ៣៩ឆ្នាំ ជាជាងជួសជុលរថយន្តក្នុងយានដ្ឋានខាងលើ និងមានទីលំនៅក្នុងភូមិជ្រៃកោង សង្កាត់ស្លាកែត ក្រុងបាត់ដំបង ។ ប្រភពដដែលបានបញ្ជាក់ថា ជាងរថយន្តរូបនេះ បានជួសជុលម៉ាស៊ីនរថយន្តធុនធំមួយគ្រឿង ហើយបានលើកកាប៊ីនឡើងលើ ដើម្បីចូលពិនិត្យម៉ាស៊ីន។ ប៉ុន្តែពេលកំពុងជួសជុល ទំនងខុសបច្ចេកទេស ស្រាប់តែកាប៊ីនរថយន្តបានធ្លាក់សង្កត់កៀបជាប់ដើមទ្រូង បណ្ដាលឲ្យដាច់ខ្យល់ស្លាប់ភ្លាមៗតែម្ដង។
សមត្ថកិច្ចបានចុះទៅដល់កន្លែងកើតហេតុ ដើម្បីពិនិត្យទីតាំងកើតហេតុ និងសពជនរងគ្រោះភ្លាមៗដែរ ក្រោយពីទទួលបានព័ត៌មាននេះ ។ មន្ត្រីជំនាញកំពុងសួរសាក្សីនានាដែលនៅទៅនោះ រីឯសពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណី ។
ចែករំលែកព័តមាននេះ