ខេត្តសៀមរាប៖ សមត្ថកិច្ចខេត្តបង្ក្រាបបានជនសង្ស័យបន្លំខ្លួនជាសង្ឃ និងបក្ខពួកចំនួន៦នាក់ ពាក់ព័ន្ធករណីគ្រឿងញៀន, ឆបោក និងស្លៀកស្បង់បែបព្រះពុទ្ធសានាដោយគ្មានច្បាប់អនុញ្ញាត ព្រមទាំងដកហូតបានវត្ថុតាងមួយចំនួន ។ ហេតុការណ៍នេះបានបង្កឱ្យមានការភ្ញាក់ផ្អើលពេញបរិវេណព្រះអង្គចេក ព្រះអង្គចម…
ខេត្តសៀមរាប៖ សមត្ថកិច្ចខេត្តបង្ក្រាបបានជនសង្ស័យបន្លំខ្លួនជាសង្ឃ និងបក្ខពួកចំនួន៦នាក់ ពាក់ព័ន្ធករណីគ្រឿងញៀន, ឆបោក និងស្លៀកស្បង់បែបព្រះពុទ្ធសានាដោយគ្មានច្បាប់អនុញ្ញាត ព្រមទាំងដកហូតបានវត្ថុតាងមួយចំនួន ។ ហេតុការណ៍នេះបានបង្កឱ្យមានការភ្ញាក់ផ្អើលពេញបរិវេណព្រះអង្គចេក ព្រះអង្គចម កាលពីវេលាម៉ោង៨និង៣០នាទីយប់ថ្ងៃទី៩ ឧសភា ឆ្នាំ២០១៨ ស្ថិតក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប ។
បើតាមកងរាជអាវុធហត្ថខេត្តបានឱ្យដឹងថា បន្ទាប់ពីទទួលបានព័ត៌មានពីប្រជាពលរដ្ឋដែលសង្ស័យថា មានជនសង្ស័យបន្លំខ្លួនជាសង្ឃដើរបិណ្ឌបាត្រនៅបរិវេនព្រះអង្គចេក ព្រះអង្គចម ខុសប្រក្រតី ហើយមានរថយន្ត១គ្រឿងសម្រាប់ចាំដឹកផងនោះ ទើបកម្លាំងជំនាញសុំយោលបល់ពីលោកឧត្តមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត ពេលនោះលោកក៏បានឱ្យកម្លាំងផ្នែកព្រហ្មទណ្ឌចុះទៅនាំខ្លួនជនសង្ស័យយកមកទីបញ្ជាការដ្ឋានកងរាជអាវុធហត្ថខេត្ត ដើម្បីសួរនាំ។ ជនសង្ស័យទាំង៦នាក់រួមមាន ១-ឈ្មោះ ផន ផាន់ណា អាយុ៣០ឆ្នាំ (បន្លំខ្លួនជាសង្ឃ) ជាអ្នកផ្តើមគំនិត រស់នៅភូមិជ្រៃអូរភ្នៅ ឃុំវាល ស្រុកគងពិសី ខេត្តកំពង់ស្ពឺ ទី២-ឈ្មោះ យួន យឿន អាយុ២៤ឆ្នាំ (បន្លំខ្លួនជាសង្ឃ) រស់នៅភូមិព្រៃក្មេង ឃុំខ្នាត ស្រុកពួក ខេត្តសៀមរាប ទី៣-ឈ្មោះ ឯម វិចិត្រ អាយុ១៩ឆ្នាំ (បន្លំខ្លួនជាសង្ឃ) រស់នៅភូមិអូរក្រសារ ឃុំអូរក្រសារ ស្រុកអូរក្រសារ ខេត្តកែប ទី៤-ឈ្មោះ ខាត់ សុខា អាយុ២២ឆ្នាំ រស់នៅភូមិព្រៃក្មេង ឃុំខ្នាត ស្រុកពួក ខេត្តសៀមរាប ទី៥-ឈ្មោះ រឹម អាយុ១៧ឆ្នាំ រស់នៅភូមិត្រពាំងជ្រៅ ឃុំត្រពាំងជ្រៅ ស្រុកបរសេដ្ឋ ខេត្តកំពង់ស្ពឺ និងទី៦-ឈ្មោះ ជា ស៊ុន ហៅ ម៉ាប់ អាយុ២១ឆ្នាំ ជាអ្នកបើកបររថយន្ត រស់នៅភូមិដីថ្មី ឃុំអូរជ្រៅ ស្រុកអូរជ្រៅ ខេត្តបន្ទាយមានជ័យ។
ក្រោយពេលឃាត់យកមកសួរនាំ ឈ្មោះ ផន ផាន់ណា បានឆ្លើយសារភាពថា ខ្លួនមានបក្ខពួក៣ទៅ៤នាក់ បានក្លែងធ្វើជាសង្ឃដើរបិណ្ឌបាត្រសុំប្រាក់គេនៅតាមទីកន្លែងមួយចំនួនដូចជា រាជធានីភ្នំពេញ ខេត្តបាត់ដំបង ខេត្តបន្ទាយមានជ័យ និងខេត្តសៀមរាប ហើយធ្វើសកម្មភាពបែបនេះរយៈពេល៦ឆ្នាំមកហើយ ដោយក្នុងម្នាក់រកបានប្រាក់ពី១០ម៉ឺនទៅ១៥ម៉ឺនរៀលក្នុង១ថ្ងៃ ក្រោយបានប្រាក់ ខ្លួនជាអ្នកប្រមូលមកទុក ហើយខ្លួនបានគិតជាប្រាក់ខែឱ្យវិញ ដោយអ្នកបើកបររថយន្តឱ្យ២៥០ដុល្លារក្នុង១ខែ ចំណែកបក្ខពួកផ្សេងៗទៀតម្នាក់ៗទទួលបានពី២០០ដុល្លារទៅ៣០០ដុល្លារក្នុង១ខែ។
តាមចម្លើយសារភាពរបស់ឈ្មោះ ជា ស៊ុន បាននិយាយថា ខ្លួនជាអ្នកបើកបររថយន្តឱ្យឈ្មោះ ផន ផាន់ណា (បន្លំខ្លួនជាសង្ឃ) ក្នុង១ខែបានប្រាក់ឈ្នួល២៥០ដុល្លារ ដោយដឹកជនទាំងនោះ ដើរអង្គាសប្រាក់ តាមបណ្តាខេត្តផ្សេងៗ ក្រៅពីនោះរូបខ្លួនបានទិញថ្នាំញៀនប្រភេទម៉ាទឹកកកពីអ្នករត់ម៉ូតូឌុបនៅប៉ោយប៉ែត មកលក់បន្តឱ្យក្រុមជនដែលបន្លំធ្វើជាសង្ឃប្រើប្រាស់ផងដែរ ។
ចំពោះមធ្យោបាយដែលជនសង្ស័យដឹកបក្ខពួកធ្វើសកម្មភាពមានរថយន្ត១គ្រឿងម៉ាក Camary ស៊េរី១៩៩៥ ពណ៌ទឹកប្រាក់ ពាក់ស្លាកលេខ បជ ២A-៥១៤១ (របស់ឈ្មោះ ផន ផាន់ណា) ក្រោយពីបានដើររៃអង្គាសបានប្រាក់ហើយ បានដូរស្បង់ចីវររួចស្លៀកពាក់ស៊ីវិលនៅក្នុងរថយន្តនោះ ហើយនាំគ្នាដេកនៅតាមផ្ទះសំណាក់ ។
បន្ទាប់ពីសមត្ថកិច្ចឃាត់ខ្លួនជនសង្ស័យដែលបន្លំខ្លួនជាសង្ឃទាំង៦នាក់ ក្នុងនោះដកហូតបានវត្ថុតាងរួមមាន៖ ម្សៅគ្រើមម៉ាទឹកកកចំនួន១៩កញ្ចប់ ស្មើ នឹងទម្ងន់៣,៤៦ក្រាម រថយន្តមួយគ្រឿងម៉ាក Camry ពណ៌ទឹកប្រាក់ ស៊េរី១៩៩៥ ផ្លាកលេខបន្ទាយមានជ័យ ២A-៥១៤១ ទូរស័ព្ទដៃចំនួន១២គ្រឿង ស្បង់ចីវរមួយចំនួន ព្រះឆាយាលក្ខ័ចំនួន២ច្បាប់ ស្រោមសំបុត្រសំរាប់ដាក់បច្ច័យមួយចំនួន ប្រាក់រៀលចំនួន ២០ម៉ឺនរៀល។
បច្ចុប្បន្ន ជនសង្ស័យដែលបន្លំជាសង្ឃ និងបក្ខពួកទាំង៦នាក់ ព្រមទាំងវត្ថុតាង ត្រូវបានកម្លាំងការិយាល័យជំនាញកងរាជអាវុធហត្ថខេត្តសៀមរាប រៀបចំកសាងសំណុំរឿងបញ្ជូន ទៅសាលាដំបូងខេត្ត ដើម្បីចាត់ការតាមនិតិវិធី ៕
ចែករំលែកព័តមាននេះ