ខេត្តក្រចេះ ៖ រថយន្តសាម៉ុយជាច្រើនគ្រឿងនៅតែបង្កើនសកម្មភាពដឹកជញ្ជូនអ្នកភូមិចេញពីភូមិស្រែនន ឃុំកន្ទួត ស្រុកចិត្របុរី នាំទៅសង្គ្រោះនៅមន្ទីរពេទ្យ ក៏ដូចជាដឹកសពពីមន្ទីរពេទ្យត្រឡប់មកភូមិវិញ ខណៈដែលការផ្ទុះបាតុភាពពុលទៅលើអ្នកភូមិនៅមិនត្រូវបានកំណត់ថា បណ្តាលមកពីពុលអ្វីឲ្យប្រាកដ ហើយនៅតែមិនទាន់ថមថយនៅឡើយនោះទេ។
បើគិតមកត្រឹមថ្ងៃទី៦ ឧសភានេះ ចំនួនអ្នករងគ្រោះដោយសារពុលអាជ្ញាធរសន្និដ្ឋានជំហានដំបូងថា ផ្តើមដោយសារពុលទឹកនោះ គឺមានការកើនឡើងរហូតដល់ទៅ១០នាក់ ក្នុងនោះស្រី៧នាក់មានម្នាក់មានផ្ទៃពោះ៤ខែ ចំណែកឯអ្នករងគ្រោះមានអការៈមិនស្រួលចំនួនរហូតដល់ជាង១០០នាក់ ហើយអ្នកភូមិទាំងនោះក៏កំពុងតែជួយសង្គ្រោះបន្ទាន់ពីក្រុមគ្រូពេទ្យ ។ ហើយការពុលនេះ គឺកើតឡើងតាំងពីថ្ងៃទី៣ ឧសភាមកម្ល៉េះ ហើយកើតកាន់តែធ្ងន់ធ្ងរខ្លាំងឡើងក្នុងអំឡុងរយៈពេល២ថ្ងៃជាប់ៗគ្នា នេះបើតាមការបញ្ជាក់ពីលោក ឈា្នង សុវត្ថា ប្រធានមន្ទីរសុខាភិបាលខេត្ត។
ស្ត្រីជាអ្នកភូមិរងការពុលម្នាក់ឈ្មោះ ភឿន រាំអី អាយុ៣៨ឆ្នាំ ដែលមានម្តាយអាយុជាង៧០ឆ្នាំបានស្លាប់ដោយការពុលនោះប្រាប់ថា អការៈរបស់អ្នកភូមិគឺស្រដៀងគ្នាដូចជា វិលមុខ ស្រវាំងភ្នែក ឈឺក្បាល តឹងណែនដើមទ្រូង។ ហើយមុននឹងកើតអការៈពុលនេះ អ្នកភូមិបានទៅដងទឹកពីព្រែកមកប្រើ និងឃើញមានត្រីពុលងាប់អណ្តែតហូរពេញក្នុងព្រែក តែអ្នកភូមិបានយកត្រីនោះមកហូប ក្រោយពីនាំគ្នាហូបទឹកនិងត្រីនោះក៏កើតអាការៈបែបនេះតែម្តង។
ស្នងការនគរបាលខេត្តក្រចេះប្រាប់ឲ្យដឹងថា បច្ចុប្បន្ននេះនគរបាលក្រោមការដឹកនាំបានចុះស្រាវជ្រាវនៅតំបន់ខាងលើព្រែក និងអូរទៅលើទីតាំងក្រុមហ៊ុនកៅស៊ូ និងថ្មម៉ាប់មួយចំនួន ដើម្បីរុករកក្រែងមានភាពមិនប្រក្រតីពាក់ព័ន្ធនឹងការពុលនេះ ចំណែកឯលទ្ធផលយ៉ាងណានោះនៅមិនទាន់កំណត់នៅឡើយទេ។
ព័ត៌មានលម្អិតនឹងមានផ្សាយជូនបន្តលើទំព័រកាសែតកោះសន្តិភាព
ចែករំលែកព័តមាននេះ