រាជធានីភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញក្លិបបាល់ទាត់ធំៗក្នុងលីគកំពូលកម្ពុជាប្រមាណ៦០ភាគរយបានចំណាយដើមទុនយ៉ាងច្រើនបង្កើតទីលានហ្វឹកហាត់ និងប្រកួតផ្ទាល់ខ្លួនទាំងទីលានក្រាលដោយស្មៅធម្មជាតិនិងស្មៅសិប្បនិម្មិតប្រកបដោយស្ដង់ដាថែមទៀតផង ។ ជាក់ស្ដែង មកដល់ពេលនេះ មានក្លិបបាល់ទាត់ចំនួន៨ក្នុងចំណោមក្លិបបាល់ទាត់ទាំង១២ដែលស្ថិតក្នុងលីគកំពូលកម្ពុជាដែលមានទីលានផ្ទាល់ខ្លួនបម្រើឱ្យសេចក្តីត្រូវការរបស់កីឡាករទាំងការហ្វឹកហាត់និងការប្រកួត។
លោក ឆាំង ពិសិដ្ឋ មន្ត្រីទំនាក់ទំនងសហព័ន្ធកីឡាបាល់ទាត់កម្ពុជាបានឱ្យដឹងថា សព្វថ្ងៃនេះក្រុមបាល់ទាត់ដែលអាចលេងនៅក្នុងក្របខ័ណ្ឌលីគកំពូលកម្ពុជាមានចំនួន១២ក្លិបឯណោះ កើនឡើងជាងបណ្ដាឆ្នាំមុនៗ ។
ក្លិបបាល់ទាត់ទាំង១២នោះមានដូចជា៖
១-ក្លិបអង្គរថៃហ្គ័រ, ២-ក្លិបអាស៊ីអឺរ៉ុប, ៣-ក្លិបបឹងកេតអែហ្វស៊ី, ៤-ក្លិបអគ្គិសនីកម្ពុជា, ៥-ក្លិបណាហ្គាវើល, ៦-ក្លិបក្រសួងការពារជាតិ, ៧-ក្លិបអគ្គស្នងការដ្ឋាននគរបាលជាតិ, ៨-ក្លិបភ្នំពេញក្រោន, ៩-ក្លិបព្រះខ័នរាជស្វាយរៀង, ១០-ក្លិបវេស្ទើន, ១១-ក្លិបសូទីឡូអង្គរ និង១២-ក្លិបវិសាខា។
លោក ឆាំង ពិសិដ្ឋ បញ្ជាក់ថា ក្នុងចំណោមក្លិបបាល់ទាត់ទាំង១២នេះមានក្លិប៨ហើយ
ដែលមានទីលានផ្ទាល់ខ្លួន ។ ក្លិបទាំង៨នោះមាន ៖
១-ក្លិបព្រះខ័នរាជស្វាយរៀង មានទីតាំងនៅខេត្តស្វាយរៀង ក្រោមការគ្រប់គ្រងរបស់លោកអោក សំណាង ជាប្រធានក្លិប និងជំនួយការ២រូបទៀតគឺលោកទេព ឆាយដែន និងលោកឡៃ សុធា ។
២-ក្លិបក្រសួងការពារជាតិ មានទីលានខ្លួនឯងនៅស្តាតចាស់ ជាទីលានស្មៅធម្មជាតិក្រោមការគ្រប់គ្រងរបស់លោកខូវ ឆាយ ជាប្រធានក្លិប និងជំនួយការ១រូបលោក ថោង ឧត្តម។
៣-ក្លិបភ្នំពេញក្រោន មានទីលានខ្លួនឯងនៅខណ្ឌសែនសុខ ក្រោមការគ្រប់គ្រងរបស់លោក លី ហៀង ជាប្រធានក្លិប និងជំនួយការ១រូបគឺលោក គឹម កាស៊ី។
៤-ក្លិបអាស៊ីអឺរ៉ុប មានទីលានខ្លួនឯងនៅឃុំស្វាយជ្រុំ ស្រុកខ្សាច់កណ្ដាល ខេត្តកណ្ដាល ក្រោមការគ្រប់គ្រងរបស់លោកម៉ែន ពិសិដ្ឋ ជាប្រធានក្លិប និងជំនួយការ១រូបលោក កែវ ភិរុណ។
៥-ក្លិបវេស្ទើន មានទីលានខ្លួនឯងស្ថិតនៅក្នុងខណ្ឌសែនសុខ ក្រោមការគ្រប់គ្រងរបស់លោកស៊ី វណ្ណា ជាប្រធានក្លិប និងជំនួយការ១រូបលោក ស៊ុត ស៊ីណាល់។
៦-ក្លិបអង្គរថៃហ្គ័រ មានទីលានផ្ទាល់ខ្លួនស្ថិតនៅខេត្តសៀមរាប ក្រោមការគ្រប់គ្រងរបស់លោក អា មួយ ជាប្រធានក្លិប និងជំនួយការ១រូបលោក លឹម ច័ន្ទមុន្នីឧត្តម។
៧-ក្លិបវិសាខា មានទីលានផ្ទាល់ខ្លួនស្ថិតនៅក្នុងហ្គ្រេនភ្នំពេញ ខណ្ឌសែនសុខ ក្រោម
ការគ្រប់គ្រងរបស់លោក ម៉ម មករា ជាប្រធានក្លិប និងជំនួយការ១រូបលោក រតនា និង
៨-ក្លិបសូទីឡូអង្គរ មានទីលានផ្ទាល់ខ្លួនស្ថិតនៅខេត្តសៀមរាបក្រោមការគ្រប់គ្រងរបស់លោក អៀង សាក់នីដា ជាប្រធានក្លិប និងជំនួយការ១រូបលោក ជា ម៉េងលី។
ចំណែកក្លិបបាល់ទាត់ចំនួន៤ទៀតដែលមិនទាន់មានទីលានផ្ទាល់ខ្លួននោះមានក្លិបបឹងកេតអែហ្វស៊ីក្រោមការគ្រប់គ្រងរបស់លោក បែ មករា ជាប្រធានក្លិប និងជំនួយការ១រូបលោកសុនវាសនា ។ ក្លិបអគ្គិសនីកម្ពុជា ក្រោមការគ្រប់គ្រងរបស់លោក បោង សារ៉ុន ជាប្រធានក្លិប និងជំនួយការ២រូបទៀតគឺលោក សោម សារ៉ន និងលោក វ៉ា ច័ន្ទពុទ្ធិស័ក ។
ក្លិបអគ្គស្នងការដ្ឋាននគរបាលជាតិ ក្រោមការគ្រប់គ្រងរបស់លោក សារ៉េត ស៊ីដន និងក្លិបណាហ្គាវើលក្រោមការគ្រប់គ្រងរបស់លោក មាស ចាន់ណានិងជំនួយការ១រូបលោក ចាយ សង្ហា។
លោក អោក សំណាង ប្រធានក្លិបព្រះខ័នរាជស្វាយរៀងឱ្យដឹងថា ទីលានបាល់ទាត់មួយដែលមានលក្ខណៈស្តង់ដារត្រឹមត្រូវ ដោយមានបំពាក់អំពូលភ្លើងសម្រាប់ប្រកួតពេល
យប់ទៀតផងនោះ បើទីលានក្រាលស្មៅសិប្បនិម្មិតត្រូវចំណាយអស់ជាង២០ម៉ឺនដុល្លារអាមេរិកឡើងទៅ តែបើក្រាលស្មៅធម្មតាត្រូវចំណាយប្រហែលជា៨ទៅ១០ម៉ឺនដុល្លារប៉ុណ្ណោះ ។ ទោះបីយ៉ាងណាលោកបញ្ជាក់ថា ទីលានស្មៅសិប្បនិមិ្មតប្រកួតបានតែពេល
យប់ប៉ុណ្ណោះ ព្រោះពេលថ្ងៃអាចជះចំហាយក្ដៅធ្វើឱ្យប៉ះពាល់ដល់សុខភាព ហើយកីឡាករប្រើប្រាស់កម្លាំងបានត្រឹម៧០ភាគរយប៉ុណ្ណោះ។
រីឯទីលានដែលក្រាលស្មៅធម្មជាតិល្អជាង ព្រោះលេងបានទាំងថ្ងៃទាំងយប់ហើយកីឡាករអាចប្រើប្រាស់កម្លាំងបាន១០០ភាគរយពេញគ្រាន់តែមានការហត់នឿយថែរក្សាប៉ុណ្ណោះ។
លោក មាស ចាន់ណា ប្រធានក្លិបណាហ្គាវើល ដែលធ្លាប់មានបទពិសោធន៍ធ្វើជាគ្រូជំនួយ និងគ្រូបង្គោលរយៈ១៧ឆ្នាំមកហើយនោះបានឱ្យដឹងថា ប្រហែលជាមិនយូរប៉ុន្មានទៀតទេក្លិបលោកនឹងមានទីលានផ្ទាល់ខ្លួនដូចគេដែរហើយ ព្រោះការមិនមានទីលានខ្លួនឯងនេះវាពិបាកខ្លាំងណាស់ក្នុងការហ្វឹកហាត់របស់កីឡាករ៕
ចែករំលែកព័តមាននេះ