ខេត្តកំពង់ឆ្នាំង ៖ ព្រះគ្រូចៅអធិការវត្តកំពង់ព្រះ ព្រះនាម អ៊ុំ សុគន្ឋ មានសង្ឃដីកាថា ព្រះអង្គមានសេចក្តីរីករាយត្រេកអរជាខ្លាំងរហូតស្រក់ទឹកភ្នែកនៅពេលបានឮលោកជំទាវជាសប្បុរសជនបានបរិច្ចាគធនធានរបស់លោកជំទាវផ្ទាល់សាងសង់ព្រះវិហារ១ខ្នងប្រគេនដល់វត្តកំពង់ព្រះ ដែលជាវត្តបុរាណមួយសង់លើទីទួលពិស្រីជ័យសុរវង្សកំពង់ព្រះ ស្ថិតក្នុងភូមិកំពង់ព្រះ ឃុំឆ្នុកទ្រូ ស្រុកបរិបូរណ៌ ខេត្តកំពង់ឆ្នាំង ។
ព្រះគ្រូចៅអធិការបានបន្តសង្ឃដីកាថា ដោយមើលឃើញពីសភាពព្រះវិហាចាស់មានអាយុកាលជាង១០០ឆ្នាំមានសភាពចាស់ទ្រុឌទ្រោមមិនអាចឱ្យពុទ្ឋបរិស័ទ្ទ និងព្រះសង្ឃក្នុងវត្តចូលគោរពបូជាបាន និងម្យ៉ាងវិញទៀតព្រះវិហារចាស់ដែលបានចុះបញ្ជីបេតិកភណ្ឌជាតិមិនអាចឱ្យធ្វើការជួសជុលកែលំអរបានទៀតនោះ ទើបលោកជំទាវ សៀង ចន្ទ័ហេង នាយិការក្រុមហ៊ុន ហេងអភិវឌ្ឍន៍ ដែលមាននិស្ស័យនឹងព្រះពុទ្ឋសាសនា មានសទ្ធាជ្រះថ្លាកសាងព្រះវិហារថ្មីមួយ ដែលមានទំហំ២៦ម៉ែត្រគុណនឹង២៦ម៉ែត្រ ជាព្រះវិហារមុខ៤ដោយសង់ឡើងផុតពីទឹកនៅចំពីមុខវត្តកំពង់ព្រះ ។
ក្រោយពីទទួលដំណឹងដ៏សែនរំភើបនេះព្រះគ្រូចៅអធិការបានសម្តែងទឹកចិត្តរីករាយរកអ្វីប្រៀបផ្ទឹមពុំបានក្នុងនាមព្រះអង្គជាចៅអធិការវត្ត និងព្រះសង្ឃទាំងអស់គង្គនៅវត្តកំពង់ព្រះក៏ដូចជាពុទ្ឋបរិស័ទ្ទ ចំណុះជើងវត្តកំពង់ព្រះទាំងមូល សូមថ្លែងអំណរគុណជាអនេកប្បការដល់លោកជំទាវ សៀង ចន្ទ័ហេង និងឯកឧត្តមលោកជំទាវទាំងអស់ សូមលោកជំទាវ និងឯកឧត្តម ជួបនូវពុទ្ឋពរ ទាំង៥ប្រការគឺ អាយុ វណ្ណៈសុខៈ ពល និងបដិភានៈ កុំបីឃ្លាងឃ្លាតឡើយ ៕
ចែករំលែកព័តមាននេះ