រាជធានីភ្នំពេញ ៖ លោកឧកញ៉ារ័ត្ន សុខន អនុប្រធានសហព័ន្ធកីឡាវាយកូនឃ្លីលើតុអាស៊ី ប្រធានសហព័ន្ធកីឡាវាយកូនឃ្លីលើតុអាស៊ាន និងជាប្រធានសហព័ន្ធកីឡាវាយកូនឃ្លីលើតុកម្ពុជាបានសន្យាថា លោកនឹងបោសសម្អាតអំពើពុករលួយដែលកើតមាន ឡើងនៅក្នុងសហព័ន្ធនាពេលកន្លងមកឱ្យអស់នៅក្នុងឆ្នាំ២០១៨នេះ។ លោកឧកញ៉ាថា…
រាជធានីភ្នំពេញ ៖ លោកឧកញ៉ារ័ត្ន សុខន អនុប្រធានសហព័ន្ធកីឡាវាយកូនឃ្លីលើតុអាស៊ី ប្រធានសហព័ន្ធកីឡាវាយកូនឃ្លីលើតុអាស៊ាន និងជាប្រធានសហព័ន្ធកីឡាវាយកូនឃ្លីលើតុកម្ពុជាបានសន្យាថា លោកនឹងបោសសម្អាតអំពើពុករលួយដែលកើតមាន
ឡើងនៅក្នុងសហព័ន្ធនាពេលកន្លងមកឱ្យអស់នៅក្នុងឆ្នាំ២០១៨នេះ។
លោកឧកញ៉ាថា ការដែលលោកសម្រេច ចិត្តបែបនេះក្រោយពីទទួលបានពាក្យបណ្ដឹង
តវ៉ាជាច្រើនពីគ្រូបង្វឹក កីឡាករ កីឡាការិនី មកពីបណ្ដាក្លិបនិងសមាគមនានាទូទាំងប្រទេសដែលបានចោទប្រកាន់ទៅលើកញ្ញាតៃ លីដា អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា ថាបានជ្រៀតជ្រែកការងារផ្ទៃក្នុងរបស់សហព័ន្ធខុសពីតួនាទីរបស់ខ្លួន ។ មិនតែប៉ុណ្ណោះកញ្ញាថែមទាំងបានកឹបកេងថវិកាជាប្រាក់រង្វាន់លើកទឹកចិត្តបន្ថែមដែលប្រធានសហព័ន្ធផ្ដល់ឱ្យពីលើថវិការរបស់ក្រសួងអប់រំ យុវជន និងកីឡាទៀតផង។
លោកឧកញ៉ាបន្តថា លោកមានតួនាទីជាប្រធានសហព័ន្ធក៏ពិតមែន ប៉ុន្តែបើចង់ឱ្យសហព័ន្ធកីឡាជាតិនីមួយៗអាចរីកចម្រើនទៅបានគឺអាស្រ័យទៅលើសមាជិកគណៈកម្មការប្រតិបត្តិនៅក្នុងសហព័ន្ធទាំងអស់ចេះរួមគ្នាធ្វើការដោយការទទួលខុសត្រូវតាមតួនាទីរៀងៗខ្លួន ។ ចំណែកអគ្គលេខាធិការវិញគឺជាភ្នែកជាច្រមុះរបស់ប្រធានសហព័ន្ធដែលដើរតួនាទីសំខាន់ក្នុងការធ្វើការងាររដ្ឋបាល ប៉ុន្តែផ្ទុយទៅវិញអគ្គលេខាធិការស្រីរូបនេះ បែរជាមកធ្វើការជ្រៀតជ្រែកការងារបច្ចេកទេស និងការងារហិរញ្ញវត្ថុ ដើម្បីប្រយោជន៍ផ្ទាល់ខ្លួនទៅវិញ។
ជាក់ស្ដែង នៅក្នុងការប្រកួតជ្រើសរើសជើងឯកថ្នាក់ជាតិដែលបានធ្វើឡើងកាលពីថ្ងៃទី១៦ដល់១៨ វិច្ឆិកា កន្លងមកនេះ លោកបានសន្យាថា នឹងផ្ដល់ថវិកាលើកទឹកចិត្តបន្ថែមទៅដល់កីឡាករ-កីឡាការិនីទាំងនៅរាជធានីភ្នំពេញ និងមកពីតាមបណ្ដាខេត្តក្នុងម្នាក់២០០.០០០រៀលស្មើនឹង៥០ដុល្លារអាមេរិកចំណែកក្លិបនិងសមាគមនីមួយៗទទួលបាន៤០ម៉ឺនរៀលស្មើនឹង១០០ដុល្លារ តែទីបំផុតមកទល់នឹងពេលនេះពួកគាត់ទទួលបានត្រឹមតែ១០ម៉ឺនរៀលប៉ុណ្ណោះហើយមិនទាន់បានគ្រប់គ្នាទៀត មានតែក្លិបខេត្តសៀមរាបមួយគត់ដែលទទួលបាន១០០ដុល្លារ ។
លោកឧកញ៉ាសង្កត់ធ្ងន់ថា អគ្គលេខាធិការស្រីរូបនេះមិនត្រឹមតែមានចេតនាមិនល្អក្នុងការកិបកេងថវិកាដើម្បីប្រយោជន៍ផ្ទាល់ខ្លួនប៉ុណ្ណោះនោះទេ ថែមទាំងបានជ្រៀតជ្រែកការងារហិរញ្ញវត្ថុរបស់លោកស្រីប៊ូ កានិយ៉ា ដែលជាអគ្គហិរញ្ញឹករបស់សហព័ន្ធទៀតផង ដោយបានចេញលិខិតចំណូលចំណាយថវិកាពុំមានចុះថ្ងៃខែច្បាស់លាស់ និងពុំមានហត្ថលេខាឯកភាពពីអគ្គហិរញ្ញឹកទៀតផង ។
ម្យ៉ាងវិញទៀតចំពោះបញ្ហាបច្ចេកទេស អគ្គលេខាធិការស្រីរូបនេះបានគំរាមដកលោកគ្រូចាស់ៗដែលធ្លាប់ដឹកនាំកីឡាកររាប់សិបឆ្នាំចេញបើមិនស្ដាប់នាងនឹងដាក់អ្នកថ្មីចូល ។ ចំណែកកីឡាករដូចគ្នាទោះបីជាកីឡាករនោះមានបទពិសោធន៍ប្រកួតច្រើនឆ្នាំ និងមានស្នាដៃធ្លាប់ដណ្ដើមបានមេដាយក៏ដោយ បើគាត់មិនពេញចិត្តគឺព្រមានដកចេញភ្លាមដាក់អ្នកថ្មីចូល ។
លោកឧកញ៉ារ័ត្ន សុខន បានបញ្ជាក់ជាចុងក្រោយថា ព្រោះតែទង្វើមិនគប្បីបែបនេះហើយទើបក្នុងនាមលោកជាប្រធានសហព័ន្ធត្រូវតែរកដំណោះស្រាយជូនពួកគាត់
ជាបន្ទាន់ និងលុបបំបាត់ឱ្យអស់នូវភាពអសកម្ម និងអំពើពុករលួយទាំងឡាយដែលកើតមានឡើងនាពេលកន្លងមក ។ ជាក់ស្ដែងកាលពីថ្ងៃទី៣ មករា ឆ្នាំ២០១៨ កន្លងមកនេះ លោកបានបើកអង្គប្រជុំមួយដោយប្រកាសលែងទទួលស្គាល់កញ្ញា តៃ លីដា ជាអគ្គលេខាធិការរបស់សហព័ន្ធកីឡាវាយកូនឃ្លីលើតុកម្ពុជា ចាប់ពីពេលនេះទៅ ហើយប្រកាសឱ្យអគ្គលេខាធិការស្រីម្នាក់នេះចូលមកដោះស្រាយជាមួយសហព័ន្ធជាបន្ទាន់ផងដែរ ៕
ចែករំលែកព័តមាននេះ