ព្រះខ័នរាជស្វាយរៀងគ្រងតំណែងជាម្ចាស់ជើងឯកពានរង្វាន់សម្ដេចតេជោ ហ៊ុន សែន
- ភ្នំពេញ
រាជធានីភ្នំពេញ ៖ ទីបំផុតក្រុមព្រះខ័នរាជស្វាយរៀងបានក្លាយជាម្ចាស់ជើងឯកពានរង្វាន់សម្តេចតេជោ ហ៊ុន សែន (Hun Sen Cup) លើកទី៤ ឆ្នាំ២០១៧…
រាជធានីភ្នំពេញ ៖ ទីបំផុតក្រុមព្រះខ័នរាជស្វាយរៀងបានក្លាយជាម្ចាស់ជើងឯកពានរង្វាន់សម្តេចតេជោ ហ៊ុន សែន (Hun Sen Cup) លើកទី៤ ឆ្នាំ២០១៧ ទាល់តែបាន បន្ទាប់ពីយកឈ្នះលើក្រុមណាហ្គាវើល ៣-០ ក្នុងជំនួបវគ្គផ្ដាច់ព្រ័ត្រនៅលើទីលានពហុកីឡដ្ឋានជាតិអូឡាំពិក កាលពីយប់ថ្ងៃទី២៧ ធ្នូ កន្លងមកនេះ ។
នៅក្នុងតង់ទី១ ក្រុមព្រះខ័នរាជស្វាយរៀងធ្វើបានយ៉ាងល្អតាមរយៈការស៊ុតបាល់បញ្ចូលទីក្រុមណាហ្គាវើលនាំមុខមុនចំនួន២គ្រាប់ដោយកីឡាករ សុខ សំណាង នៅនាទីទី២២ និងនាទីទី៣១ ។ ចំណែកក្រុមណាហ្គាវើលវិញបានព្យាយាមលេងវាយបកដើម្បីរកគ្រាប់បាល់សងវិញ តែគ្មានសំណាងទាល់តែសោះរហូតដល់ចប់តង់ទី១នៅតែមិនអាចបំប៉ោងសំណាញ់ទីគូប្រកួតបានដដែល ។
ចូលដល់តង់ទី២ ក្រុមព្រះខ័នរាជស្វាយរៀងនៅតែបន្តគ្រប់គ្រងបាល់បានយ៉ាងល្អបើទោះជាក្រុមណាហ្គាវើលព្យាយាមលេងវាយបកយ៉ាងណាក៏ដោយ និងមានឱកាសស៊ុតបាល់បញ្ចូលទីជាញឹកញាប់ទៀតផងគ្រាន់តែមិនបានសម្រេច ។ រហូតដល់នាទីទី៦៥ កីឡាករ ហ៊ួយ ផល្លីន រកបានគ្រាប់បាល់ទី៣ឱ្យក្រុមព្រះខ័នរាជស្វាយរៀងយកឈ្នះក្រុមណាហ្គាវើលដោយលទ្ធផល៣-០ ។
ក្នុងការប្រកួតពានរង្វាន់សម្ដេចតេជោ ហ៊ុន សែន ក្រុមព្រះខ័នរាជស្វាយរៀងបានយកឈ្នះក្រុមណាហ្គាវើល៣លើកជាប់គ្នានៅវគ្គផ្ដាច់ព្រ័ត្រដើម្បីគ្រងតំណែងជើងឯកមួយនេះ ។ លើកទី១នៅឆ្នាំ២០១២ យកឈ្នះណាហ្គាវើល ២-១ លើកទី២ឆ្នាំ២០១៥យកឈ្នះណាហ្គាវើល២-១និងលើកទី៣នេះយកឈ្នះណាហ្គាវើល៣-០ ដូច្នេះក្រុមណាហ្គាវើលបានត្រឹមតែទទួលចំណាត់ជាជើងឯករងប៉ុណ្ណោះ ។ រីឯចំណាត់ថ្នាក់លេខ៣បានទៅលើក្រុមអគ្គិសនីកម្ពុជា បន្ទាប់ពីបានយកឈ្នះលើក្រុមបឹងកេត៥-៤ដោយការទាត់បាល់ប៉េណាល់ទីកាត់សេចក្ដីក្រោយពីលេងស្មើ១-១នៅក្នុងម៉ោង៩០នាទីរួចមកនោះ ។
ចំពោះប្រាក់រង្វាន់ដែលត្រូវប្រគល់ជូនក្រុមជ័យលាភីវិញ លេខ១ទទួលបានពាន១ មេ
ដាយមាស និងប្រាក់រង្វាន់៨០លានរៀល លេខ២ទទួលបានមេដាយប្រាក់ និងប្រាក់រង្វាន់៤០លានរៀល និងលេខ៣ទទួលបានមេដាយសំរឹទ្ធ និងប្រាក់រង្វាន់២០លានរៀល៕
ចែករំលែកព័តមាននេះ