រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ ត្រូវបានប្រទះឃើញដេកផ្កាប់មុខសន្លប់ស្ដូកស្ដឹងនៅលើផ្លូវ ហើយមិនមាន សាក្សីណាមួយបានដឹងថា បណ្ដាលមកពីមូលហេតុអ្វីច្បាស់លាស់នោះឡើយ ដែលអ្នកខ្លះនិយាយថា មកពីបុរសនោះជិះម៉ូតូដួលដោយខ្លួនឯង ឯខ្លះទៀតនិយាយថា គាត់ត្រូវរថយន្តកៀរបណ្ដាលឱ្យដួល បន្ទាប់មក រថយន្តបង្កនោះបានបើករត់គេចទៅបាត់ស្រមោល ។
ហេតុការណ៍នេះបានកើតឡើង កាលពីវេលាម៉ោង៥ល្ងាចថ្ងៃទី០៨ មីនា ស្ថិតនៅលើកំណាត់ផ្លូវជាតិលេខ៣ ត្រង់ចំណុចភូមិព្រៃកំបុត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ បុរសរងគ្រោះខាងលើ មិនត្រូវបានស្គាល់អត្តសញ្ញាណនោះឡើយមានអាយុប្រហែលជាង២០ឆ្នាំ ជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ 11BK-2643 ធ្វើដំណើរ ក្នុងទិសដៅពីត្បូងទៅជើងតែម្នាក់ឯង ។
ទោះបីជាបែបណា នៅពេលមានគ្រោះថ្នាក់នេះ មិនមានរថយន្តធុនយក្សបើកឆ្លងកាត់ដូចសព្វដង ប្រសិនបើមានវិញ ជនរងគ្រោះនិងត្រូវរថយន្តទាំងនោះកិនខ្ទេចមិនខានឡើយ ។ ក្រោយពេលកើតហេតុ ជនរងគ្រោះត្រូវបាននគរបាល ហៅរថយន្តសាមុយដឹកទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាម ។
ចែករំលែកព័តមាននេះ