រាជធានីភ្នំពេញ ៖ ការប្រកួតប្រដាល់លក្ខណៈមិត្តភាពអន្តរជាតិ រវាងកីឡាករកម្ពុជា-ថៃ នៅលើសង្វៀនទូរទស្សន៍ស៊ីធីអិន និងស៊ីអិនស៊ីថ្ងៃសៅរ៍ទី៧ និងថ្ងៃអាទិត្យទី៨ ខែមករា ចុងសប្តាហ៍នេះ ប្រជុំដោយកីឡាករ
រាជធានីភ្នំពេញ ៖ ការប្រកួតប្រដាល់លក្ខណៈមិត្តភាពអន្តរជាតិ រវាងកីឡាករកម្ពុជា-ថៃ នៅលើសង្វៀនទូរទស្សន៍ស៊ីធីអិន និងស៊ីអិនស៊ីថ្ងៃសៅរ៍ទី៧ និងថ្ងៃអាទិត្យទី៨ ខែមករា ចុងសប្តាហ៍នេះ ប្រជុំដោយកីឡាករដែលសុទ្ធតែជាជើងខ្លាំងលំដាប់ជួរមុខនៅក្នុងប្រទេសទាំងពីរ ធ្វើឱ្យព្រឹត្តិការណ៍ប្រដាល់ទាំង២ថ្ងៃនេះរំពឹងថានឹងមានអ្នកទស្សនាកកកុញដោយសារស្ថិតក្នុងថ្ងៃបុណ្យ និងថ្ងៃសម្រាកចុងសប្ដាហ៍ ។
សម្រាប់គូអន្ដរជាតិនៅលើសង្វៀនទូរទស្សន៍ស៊ីធីអិនថ្ងៃសៅរ៍ទី៧ មករា កីឡាករ ផុន ផាន់ណា មកពីក្លិបអប្សរាគុនខ្មែរ នឹងជួបប្រកួតជាមួយកីឡាករថៃឈ្មោះឆ្លាមដាំ ពៀកសុរិន្ទ ក្នុងប្រភេទទម្ងន់៧២គីឡូក្រាម និងកីឡាករហ៊ឹម សេរី មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះគែង ឌែងភ្នំឌុងរ៉ាក់ ក្នុងប្រភេទទម្ងន់៥៤គីឡូក្រាម ។
ផុន ផាន់ណា ធ្លាប់ប្រកួត៧២ដង ឈ្នះ៦០ដង ចាញ់១០ដង ស្មើ២ដង និងធ្លាប់ផ្ដួលគូប្រកួតឱ្យសន្លប់១៧ដង ក្នុងពេលកីឡាករថៃធ្លាប់ប្រកួត៦៥ដង ឈ្នះ៥៥ដង ចាញ់១០ដង ។ គូនេះពិបាកសន្និដ្ឋានថា អ្នកណាខ្លាំងជាងអ្នកណាណាស់ដោយសារពួកគេទាំង២មិនទាន់ស្គាល់ពីល្បិចប្រយុទ្ធគ្នាបានច្បាស់ ដូច្នេះបើចង់ដឹងថាអ្នកណាខ្លាំងជាងអ្នកណាមានតែរង់ចាំមើលការប្រកួតជាក់ស្ដែងទាំងអស់គ្នាប៉ុណ្ណោះ ។
ចំណែកហ៊ឹម សេរី ធ្លាប់ប្រកួត៥៦ដង ឈ្នះ៤០ដង ចាញ់១៣ដង ស្មើ៣ដង ក្នុងពេលកីឡាករថៃធ្លាប់ប្រកួត៧៥ដង ឈ្នះ៦៥ដង ចាញ់១០ដង ។ ហ៊ឹម សេរី មួយរយៈនេះថ្វីដៃប្រកួតរបស់គេហាក់មានការស្រុតចុះជាងមុនបន្តិច ទើបអ្នកនិយមទស្សនាកីឡាប្រដាល់រង់ចាំមើលថាតើកីឡាករកម្ពុជារូបនេះអាចតស៊ូប្រកួតជាមួយកីឡាករថៃដល់ទឹកទី៥បានដែរឬអត់ ។
នៅលើសង្វៀនដដែលសម្រាប់គូប្រកួតមិត្តភាពធម្មតាវិញមាន កីឡាករ ពុយ វណ្ណៈ មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករ សំខាន់ ប៉ាវចិន មកពីក្លិបរ៉ាហាប់ស្វាយប៉ាក ។ កីឡាករ ឆៃ សារ៉ា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ទេស ជីវ៉ា មកពីក្លិបកងពលតូចលេខ៧០ និងគូចុងក្រោយកីឡាករ សុខ វាសនា មកពីក្លិបឃ្លាំងមឿងកីឡាខេត្ដពោធិ៍សាត់ ប្រកួតជាមួយកីឡាករ ភារម្យ ភក្ដី មកពីក្លិបភារម្យគុនខ្មែរ ។
ចំណែកសមាសភាពគូប្រកួតប្រដាល់នៅលើសង្វៀនទូរទស្សន៍ស៊ីអិនស៊ីថ្ងៃអាទិត្យទី៨ មករា វិញ មានកីឡាករ ទីន ណាថៃ មកពីក្លិបទីបញ្ជាការកងទ័ពជើងទឹក ប្រកួតជាមួយកីឡាករខ្នើយ ស៊ីនឿត មកពីក្លិបតាព្រហ្មមានជ័យ ។ កីឡាករ ឡុង ចំរើន មកពីក្លិបខ្លារខិនមានរិទ្ធ ប្រកួតជាមួយកីឡាករ ចាន់ ស៊ីណាត មកពីក្លិបសាមគ្គីកូនខ្មែរ ។ កីឡាករ មាឃ សុវណ្ណារ៉ា មកពីក្លិបរាជសីហ៍ខេត្តរតនគិរី ប្រកួតជាមួយកីឡាករ ខេម ចាន់ មកពីក្លិបកងទ័ពពិសេសឆត្រយោង៩១១ ។ កីឡាករ ភិន សុទី មកពីក្លិបខ្លារខិនមានរិទ្ធ ប្រកួតជាមួយកីឡាករសេក គឹមហៀង មកពីក្លិបអង្គរមានជ័យខេត្តសៀមរាប ។ កីឡាករ ចាត សីហា មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ កឿប
សុវណ្ណនឿត មកពីក្លិបឃ្លាំងមឿងកីឡា និងគូចុងក្រោយកីឡាករ អេ ភារុណ មកពីក្លិបពន្លឺវិបុល ប្រកួតជាមួយកីឡាករ សំអាត ចាន់ មកពីក្លិបកុលបុត្រគុនខ្មែរ ៕
ចែករំលែកព័តមាននេះ