រាជធានីភ្នំពេញ ៖ មកទល់ពេលនេះ កីឡាការិនី ស៊ន សៀវម៉ី ដែលជាប់ឈ្មោះជាជើងខ្លាំងកម្ពុជាខាងបំបែកកំណត់ត្រាជាប្រវត្តិសាស្ត្រផ្នែកតេក្វាន់ដូ បន្ទាប់ពីដណ្ដើមបានសិទ្ធិចូលប្រកួតក្នុងព្រឹត្តិការណ៍អូឡាំពិកនាពេលកន្លងមក
រាជធានីភ្នំពេញ ៖ មកទល់ពេលនេះ កីឡាការិនី ស៊ន សៀវម៉ី ដែលជាប់ឈ្មោះជាជើងខ្លាំងកម្ពុជាខាងបំបែកកំណត់ត្រាជាប្រវត្តិសាស្ត្រផ្នែកតេក្វាន់ដូ បន្ទាប់ពីដណ្ដើមបានសិទ្ធិចូលប្រកួតក្នុងព្រឹត្តិការណ៍អូឡាំពិកនាពេលកន្លងមក បានអះអាងថា នាងមិនច្បាស់ពីជីវិតស្នេហានៅឡើយទេ បើទោះជាមុននេះបន្តិចនាងថាគ្រោងភ្ជាប់និស្ស័យជាមួយសង្សារក្រោយបញ្ចប់ការប្រកួតនៅប្រទេសប្រេស៊ីល ។ អ្វីដែលគេកត់សម្គាល់គឺនាងប្រកាសថាខ្លួនសកម្មតែក្នុងអាជីពកីឡា ដោយត្រៀមចេញប្រកួតជាអន្តរជាតិនៅក្នុងប្រទេសកូរ៉េនៅពាក់កណ្ដាលឆ្នាំនោះផង ។
ស៊ន សៀវម៉ី បញ្ជាក់ថា ទំនាក់ទំនងរវាងនាងនិងបុរសជាគូស្នេហ៍នៅតែល្អូកល្អិនបើទោះជានាងបន្តពន្យារពេលម្ដងហើយម្ដងទៀត ដោយមិនមានតម្រុយពិតប្រាកដពេលណាទើបចូលរោងការក្ដី ។ នាងថា មិនចង់ភ្ជាប់ពាក្យ ឬរៀបការសិននៅក្នុងអំឡុងដែលនាងជក់សូរនឹងការប្រកួតកីឡានោះទេ ដោយសារតែនាងនៅចង់ប្រឡូកអាជីពមួយនេះឱ្យអស់ចិត្តសិន ដែលតាមការបង្ហាញគឺមិនក្រោម៣ឆ្នាំទៀតឡើយ ។
នាងថា ខ្លួនចង់មានគ្រួសារប៉ុន្តែបើមានរួចហើយមិនអាចឱ្យនាងបន្តអាជីពប្រកួតបានគឺនាងសុខចិត្តពន្យារពេល ។ នាងនិយាយថា ខ្លួនមិនទាន់អស់ចិត្តនឹងតេក្វាន់ដូ ហើយទំនងជាអាចបន្តហ្វឹកហាត់ និងចេញប្រកួតចុះឡើងៗក្នុងរង្វង់់៣ឆ្នាំទៀតទើបឈប់ប្រកួតហើយជ្រើសយកជីវិតស្នេហា ។ នាងនៅតែគិតថាខ្លួននៅក្មេង និងថាមិនទាន់មានបទពិសោធន៍គ្រប់គ្រាន់សម្រាប់ការរៀបចំគ្រួសារទើបនាងប្រកាសមិនទាន់ខ្វាយខ្វល់ដោយបន្តសុំចិត្តសង្សារពន្យារពេលបន្ថែមទៀតសិនក៏មិនទាន់ហួសពេលដែរ ។ ចូលដល់ឆ្នាំ២០១៧នេះ នាងមានអាយុទើបតែ២២ឆ្នាំប៉ុណ្ណោះ ដោយនាងប្រកាសថានឹងអាចឈានដល់ក្បែរៗ៣០ឆ្នាំទើបសម្រេចចិត្តរៀបការ១០០ភាគរយ ។
នាងនិយាយថា៖«ខ្ញុំរាល់ថ្ងៃអត់ទាន់ចង់ការទេ គឺចាំដល់អាយុ៣០ឆ្នាំទើបគិតគូរពីរឿងប្ដីសី ព្រោះរាល់ថ្ងៃខ្ញុំដូចអត់សូវខ្វល់រឿងមានគ្រួសារហ្នឹងសោះ ដោយសារនៅស្រឡាញ់កីឡា!»។ នាងថាមិនខ្វល់រឿងសង្សារបែកចិត្តនោះទេបើទោះជាស្ថានភាពឱ្យចាំអាចនឹងធ្វើឱ្យទំនាក់ទំនងស្នេហារង្គោះរង្គើដោយសារពេលវេលាក្ដី ។ នាងថាមកទល់សព្វថ្ងៃ បុរសជាសង្សារក៏មិនទាន់តឿនខ្លាំងពីរឿងរៀបការនោះដែរ ដោយនាងប្រកាន់ជំហរថា បើការរង់ចាំអាចធ្វើឱ្យបុរសម្នាក់នោះបែកចិត្តក៏នាងមិនដឹងធ្វើយ៉ាងម៉េច ។ នាងថា នារីណាក៏ចង់មានប្ដីដែរ ប៉ុន្តែបើមានដោយក្ដីអាល័យការងារគឺមិនខុសពីដាក់សម្ពាធខ្លួនឯងដែលនៅស្រឡាញ់កីឡានោះឡើយ ។ នាងនិយាយថា៖«សម្រាប់ខ្ញុំគឺចង់ធ្វើដូចបងខ្ញុំអ៊ីចឹង (ស៊ន ដាលីន) គឺមានប្ដីហើយឈប់ហ្មង អត់ចង់ភ្ជាប់ពាក្យទុកឬរៀបការបណ្ដើរលេងកីឡាបណ្ដើរអីទេ អ៊ីចឹងបានអត់ខ្វល់!» ។
នាងថា បើបុរសដែលតាមស្រឡាញ់នាងពិតជាស្រឡាញ់នាងមែន នោះរយៈពេល៣ឆ្នាំ ឬ៥ឆ្នាំ គឺពិតជាអាចចាំនាងបានដោយមិនមានប្រែប្រួលនោះទេ ។ នាងថា បុរសជាសង្សារស្គាល់គ្នា៥ឆ្នាំហើយ តែបើនិយាយពីការស្រឡាញ់គ្នាគឺមានរយៈពេលមិនច្រើននោះទេ ទើបនាងក៏ចង់ទុកពេលស្វែងយល់ចិត្តគ្នាឱ្យបានកាន់តែច្រើន ដែលមានន័យថា រយៈពេលដែលនាងឱ្យចាំក៏មិនខុសពីការតាមដានផ្លូវចិត្តសង្សារដែរ ។ នាងថា បើត្រូវបែកគ្នាក្នុងនាមសង្សារគឺប្រសើរជាងបែកក្នុងនាមគូដណ្ដឹង ឬជាស្វាមី ទើបនាងប្រកាសថាមិនភ្ជាប់ពាក្យដាច់ខាត នៅក្នុងអំឡុងពេលដែលនាងនៅចង់បន្តអាជីពជាអ្នកកីឡា ។ នាងថាស្នេហាគ្រាន់តែជាជំហានទី២ប៉ុណ្ណោះ ប៉ុន្តែក៏មិនមានន័យបន្តថាមិនចង់គិតគូររឿងគូស្រករដូចគ្នានឹងនារីដទៃនោះឡើយ គឺគ្រាន់តែនាងចង់ធ្វើខ្លួនឱ្យស្រឡះសម្រាប់គម្រោងជីវិតជាមុនសិន ហើយចាំរៀបការដើម្បីឱ្យមានលំនឹងប៉ុណ្ណោះ ។
នាងនិយាយថា៖«រាល់ថ្ងៃ បើពួកខ្ញុំភ្ជាប់ពាក្យសិនក៏បានដែរ តែអត់ចង់អ៊ីចឹង ព្រោះបើគាត់ចាំខ្ញុំអត់បានហើយបែកគ្នាក្នុងនាមសង្សារគឺស្រួល តែបើបែកគ្នាក្រោយពេលភ្ជាប់ពាក្យ ឬការហើយគឺខ្ញុំអត់ចង់ អ៊ីចឹងហើយបានខ្ញុំអត់រវល់ហើយខ្ញុំមើលគាត់ក៏ដូចជាដឹងជំហររបស់ខ្ញុំដែរគឺអត់មានបង្ខំអីទេ!»។
ជាមួយនឹងការប្រកាសនេះគឺបង្ហាញយ៉ាងច្បាស់ថា កីឡាការិនី ស៊ន សៀវម៉ី នឹងមិនមានពន្លឺរៀបការឆាប់ៗដូចគ្នានឹងបងស្រីនោះទេ ដរាបណានាងមិនទាន់បញ្ចប់បេសកកម្មក្នុងវិស័យកីឡាយ៉ាងហោចរយៈពេល៥ឆ្នាំទៀតដែលនាងថាជាក្ដីស្រមៃ ។ នាងមានគម្រោងទៅហ្វឹកហាត់នៅប្រទេសកូរ៉េចុងខែឧសភា ឆ្នាំ២០១៧នេះ ដោយនាងបញ្ជាក់ថា នោះក៏ជាគម្រោងហ្វឹកហាត់ត្រៀមប្រកួតជាអន្តរជាតិនៅក្នុងព្រឹត្តិការណ៍កីឡាតេក្វាន់ដូ ដែលត្រូវបានប្រទេសកូរ៉េខាងត្បូងធ្វើជាម្ចាស់ផ្ទះផងដែរ ។
គួរបញ្ជាក់ផងដែរថា បន្ទាប់ពីបានបរាជ័យដណ្ដើមមេដាយពីប្រទេសប្រេស៊ីលក្នុងព្រឹត្តិការណ៍អូឡាំពិក កីឡាការិនីស៊ន សៀវម៉ី ហាក់មានអារម្មណ៍មិនសូវស្រស់ស្រាយនោះទេ ដោយនាងប្រកាសថា នឹងខំហ្វឹកហាត់ឱ្យកាន់តែខ្លាំងបន្ថែមមួយខ្យល់ទៀតទើបគិតគូរពីអនាគត ។
មុនចេញប្រកួតអូឡាំពិកនាងថា បើដណ្ដើមបានមេដាយពន្លឺភ្ជាប់ពាក្យឬរៀបការនឹងអាចកើតមាន អីុចឹងហើយការប្រកាសពន្យារពេលដោយមិនកំណត់ទៅវិញនៅក្នុងពេលនេះ បានរុញឱ្យអ្នកតាមដាននាងដែលចង់ឃើញមង្គលការរបស់នាងឆាប់ៗខកចិត្ត ។ នាងថា សភាពជាក់ស្ដែងគឺមង្គលការអាចនឹងកើតមានរង្វង់៥ឆ្នាំទៀតខណៈដែលនាងជឿថាសង្សាររបស់នាងក៏ពិតជាអាចចាំបានដោយសារតែលោកក៏យល់ពីស្ថានភាពរបស់នាង ហើយកន្លងមកលោកក៏ថានឹងចាំដែរ ៕
ចែករំលែកព័តមាននេះ