រាជធានីភ្នំពេញ ៖ រាជរដ្ឋាភិបាលកម្ពុជាសហការជាមួយមជ្ឈមណ្ឌលប្រចាំតំបន់របស់អង្គការសហប្រជាជាតិទទួលបន្ទុកកិច្ចការសន្តិភាព និងការកាត់បន្ថយសព្វាវុធក្នុងតំបន់អាស៊ី និងប៉ាស៊ីហ្វិក បានរៀបចំបើកសិក្ខាសាលាស្តីពីការកសាងសមត្ថភាពដើម្បីគ្រប់គ្រងអាវុធធុនតូច និងសព្វាវុធធុនស្រាលរយៈពេលពីរថ្ងៃ នៅសណ្ឋាគារសុខាភ្នំពេញ កាលពីព្រឹកថ្ងៃទី០៧ ខែធ្នូ ឆ្នាំ២០១៦នេះ ។ លោក សៀង ឡាប្រេស ទីប្រឹក្សារាជរដ្ឋាភិបាលកម្ពុជាបានមានប្រសាសន៍ថា ថ្ងៃនេះយើងបានរៀបចំបើកសិក្ខាសាលាស្តីពីការកសាងសមត្ថភាព ដើម្បីគ្រប់គ្រងអាវុធធុនតូច និងសព្វាវុធធុនស្រាលទាក់ទងទៅនឹងសន្ធិសញ្ញាដែលចុះថ្ងៃទី២៤ ខែធ្នូ ឆ្នាំ២០១៤ សន្ធិសញ្ញានេះធ្វើការដោះស្រាយជាមួយការជួញដូរសព្វាវុធអន្តរជាតិ។
ទោះបីជាច្បាប់ស្តីពីការត្រួតពិនិត្យអាវុធបានកត់សម្គាល់ពីការរក្សាទុកនូវអាវុធនៅក្នុងដៃមនុស្សខិលខូចហាមឃាត់មិនឲ្យមនុស្សមួយចំនួនរក្សាទុកនូវអាវុធ និងការលក់អាវុធ ព្រមទាំងការធ្វើពាណិជ្ជកម្មអាវុធខុសច្បាប់ដែលនឹងប៉ះពាល់ទៅលើសន្តិភាព សន្តិសុខ និងការអភិវឌ្ឍរបស់ប្រទេស។ សិក្ខាសាលានៅក្នុងថ្ងៃនេះក៏ជាការបង្កើនសមត្ថភាពក្នុងការគ្រប់គ្រងអាវុធធុនតូច និងសព្វាវុធធុនស្រាល សិក្ខាសាលានេះគឺមានគោលបំណងដើម្បីឲ្យអ្នកជំនាញមកពីកម្មវិធីរបស់សហប្រជាជាតិណែនាំទៅដល់អ្នកអនុវត្តនៅកម្ពុជា ក្នុងការកំណត់មួយជាអន្តរជាតិសម្រាប់ជួយទៅដល់ផ្នែកបច្ចេកទេសទៅលើការគ្រប់គ្រងអាវុធធុនតូច និងសព្វាវុធធុនស្រាលដូចជា ការស្វែងរក និងការរក្សាទុក កត់ត្រាទុកអាវុធធុនតូច និងសព្វាវុធធុនស្រាលដែលមាននៅកម្ពុជា។
កិច្ចខិតខំប្រឹងប្រែងរបស់កម្ពុជាដើម្បីប្រឆាំងការជួញដូរអាវុធធុនតូច និងសព្វាវុធធុនស្រាលខុសច្បាប់ក្នុងអាស៊ាន ហើយការកន្លងមកបញ្ហាប្រឈមនឹងតម្រូវការក្នុងការជួយជ្រោមជ្រែង។ នៅក្នុងសិក្ខាសាលានេះដែរលោក Aleksander Micic អនុប្រធាន UNRCPD បានមានប្រសាសន៍ថា គោលបំណងសំខាន់ក្នុងសិក្ខាសាលាថ្ងៃនេះគឺដើម្បីពង្រឹងសមត្ថភាពទាក់ទងទៅក្នុងការគ្រប់គ្រងអាវុធធុនតូច និងសព្វាវុធធុនស្រាលហើយក្នុងរយៈពេលពីរថ្ងៃនេះយើងនឹងពិនិត្យទៅលើស្ថានភាពនៃការគ្រប់គ្រងអាវុធធុនតូច និងសព្វាវុធធុនស្រាលក្នុងប្រទេសកម្ពុជា និងប្រទេសដទៃផ្សេងៗទៀត យើងនឹងពិនិត្យទៅលើផ្នែកច្បាប់ហើយនឹង ឆ្លុះបញ្ចាំងពិភាក្សាគ្នាទៅលើច្បាប់ទាក់ទងជាតិ និងអន្តរជាតិ ជាពិសេសពិនិត្យមើលទៅលើបញ្ហាផ្នែកបច្ចេកទេសការគ្រប់គ្រងអាវុធធុនតូច និងសព្វាវុធធុនស្រាលការទុកដាក់គ្រប់គ្រង។
យើងមានបំណងពន្លឿនការសម្របសម្រួលលើការគ្រប់គ្រងអាវុធធុនតូច និងសព្វាវុធធុនស្រាល និងបង្កើតនូវផែនការសកម្មភាពសម្រាប់គ្រប់គ្រងអាវុធធុនតូច និងសព្វាវុធធុនស្រាលផងដែរ។ ទន្ទឹមនោះយើងក៏និងពិនិត្យមើលលើATT នៅខែតុលា ឆ្នាំ២០១៣ ប្រទេសកម្ពុជាបានចុះហត្ថលេខាទៅលើសន្ធិសញ្ញាដ៏មានសារៈសំខាន់ដែលគាំទ្រដោយសហប្រជាជាតិដែលមានរដ្ឋចំនួន១៣០ប្រទេសបានចុះហត្ថលេខា។ សិក្ខាសាលានេះនឹងមានបទបង្ហាញការពិភាក្សាទៅលើATTលក្ខខណ្ឌ ហើយដើម្បីពង្រឹងនូវសមត្ថភាពរបស់មន្ត្រីរាជរដ្ឋាភិបាលក្នុងការផ្តល់សត្យាប័នអនុវត្តនូវសន្ធិសញ្ញានេះ។
ហើយចុងយើងពិនិត្យមើលតើមជ្ឈមណ្ឌតំបន់សហប្រជាជាតិប្រចាំអាស៊ីប៉ាស៊ីហ្វិកនោះ អាចជួយជ្រោមជ្រែងយ៉ាងដូម្តេចទៀត ទៅលើរដ្ឋសមាជិករបស់UN។ យើងនឹងបង្ហាញអំពីការត្រៀមខ្លួនរបស់សហប្រជាជាតិក្នុងកិច្ចការ នៃការកាត់បន្ថយសព្វាវុធនេះរួមជាមួយនឹងរាជរដ្ឋាភិបាលកម្ពុជា មជ្ឈមណ្ឌលសហប្រជាជាតិប្រចាំតំបន់ត្រៀមជួយកម្ពុជាបន្តទៅទៀត៕
ចែករំលែកព័តមាននេះ